Search form

Eclesiastés 1

Tukuy imapas pasaruqlla kasqanmanta

1Kaykunam Predicadorpa rimarisqankuna. Payqa karqa Jerusalenpa reynin Davidpa churinmi. 2Predicadormi nirqa:

¡Tukuy imapas yanqallam!

¡Tukuy impas mana kaqllam!

¡Tukuy imapas tukuruqllam!

3¿Imatataq runa hurqokun

kay pachapi sapa punchaw llamkasqanmanta?

4Runaqa nacechkanraq wañuchkanraqmi,

allpa pacham ichaqa hina kaqlla.

5Intiqa lloqsimuspam seqaykun,

maymi kasqanman kutiykuspam

kasqallan lloqsimun.

6Wayraqa sur lawman pukuchkaspam

norte lawman muyurun,

muyurispa muyurispanmi

maymi kasqanman kutin.

7Mayukunaqa lamar qochamanmi rin,

lamar qocham ichaqa mana huntarinchu,

mayukunam maymantam hamusqanman kutirin,

chaymanta kasqallan kallpamunanpaq.

8Tukuy imam runata amichin,

rimaytapas manaña munanakama.

Ñawiqa manam qawasqanwan saksanchu,

nitaqmi rinripas uyarisqanwan aminchu.

9¿Imataq ñawpaqta pasakurqa?

hina chayllam huktawan pasakunqa;

¿Imataq ñawpaqta ruwasqa karqa?

hina chayllam ruwasqa kanqa.

Kay pachapiqa manam imapas musoqqa kanchu.

10Chaywanpas kanqam: “Kayqa musoqmi niqkuna”,

ichaqa manaraq nacechkaptinchikmi chaykunaqa karqaña.

11Imapas pasaq kaqkunaqa qonqasqañam,

chaynallataqmi qepa hamuqkunapas

qepaman pasakuqkunata qonqarunqaku.

Predicadorpa imamantapas yachaykuy munasqanmanta

12Ñoqa Predicadormi, Israel nacionpi rey kaspay Jerusalenmanta munaychakurqani. 13Hinaspam kay pachapi runakunapa tukuy ima ruwasqanta yachanaypaq tapukachakuspay sumaqta qatiparqani. Chay llasaq ruwaytam runakunaman Dios qoykurqa llamkanankupaq. 14Kay pachapi runakunapa tukuy ima ruwasqanta qawaykuspaymi yuyayta hapirqani, tukuy chaykunaqa yanqalla kasqanta, wayra qatikachay hinalla kasqanta.

15Qewisqa kaytaqa manam derechayta atichwanchu,

mana kaqtaqa manam yupayta atichwanchu.

16-Sonqoypim nirqani: “Llumpaytam hatunchakuruni, ñoqamanta ñawpaqta Jerusalenpi munaychakuqkunamantapas aswan yachayniyuqmi rikuriruni. Sonqoypas yachaytawan sinchi yuyayniyuq kaytam hayparun, nispay. 17Tukuy sonqoymantam yachayta maskaypi rirqani, mana yachayniyuq kaytawan mana yuyayniyuq kaytapas reqsirurqanim. Hinaspaymi chaykunapas yanqalla kasqanta yacharurqani.

18Achka yachayqa uma nanaytam apamun,

runaqa yachasqanman hinam aswan ñakarinqa.