Search form

Efesios 1

Cartapa qallariyninmanta

1-Diospa munasqanman hina Cristo Jesuspa apostolnin ñoqa Pablom, Éfeso llaqtapi Jesucristoman iñispa payllapaqña sapaqchakuspa kawsaqkunamanmi qellqamuykichik. 2Dios Taytanchikwan Señorninchik Jesucristoyá kuyapayakuynintawan hawkayayninta qamkunaman chaqchurimuchun.

Jesucristopi Diospa bendicionninkunamanta

3Señorninchik Jesucristopa Dios Taytanyá qapaqchasqa kachun, paymi Cristowan huklla kasqanchikrayku hanaq pachamanta kaq espiritual bendicionkunata qoykuwanchik, hanaq pachapiñapas kachkachwanchik hina. 4Manaraqpas kay pacha unanchasqa kachkaptinmi Diosqa Cristorayku akllawarqanchikña, chaynapi paypa qayllanpi mana chikanpas huchayuq kaspa payllapaqña kawsananchikpaq. 5Kuyakuqllaña kaspanmi ancha munasqanman hina ñawpaqmantaraq akllawarqanchikña Jesucristorayku churinkuna kananchikpaq.

6Kaytaqa ruwarqa hatu-hatun kuyapayakuyninwan Churinrayku bendeciwasqanchikmanta Diosta sapa kuti yupaychananchikpaqmi.

7-Diosmi kuyawaspanchik Churin Jesucristopa yawarninwan huchanchikkunata pampachaykuwaspanchik librawarqanchik.

8Diosmi kuyakuyninta ñoqanchikman llimpariqta qowarqanchik, chaynapi yachayniyuq hinaspa allin yuyayniyuq kananchikpaq. 9Paymi munasqanman hina ñawpaqmantaraq pakasqa kaqkunata Cristontakama imam ruway munasqanta reqsichiwarqanchik.

10Chaykunata ruwananpaq tiempo chayaramuptinmi kay pachapi kaqkunatapas chaynataq hanaq pachapi kaqkunatapas llapallanta Dios hukllawanqa, chaykunata munaychakunanpaqmi Cristota churanqa.

11Tanteasqanman hina ruwaq Diosmi, Señorninchik Jesucristontakama munasqanman hina ñawpaqmantaraq akllawarqanchik, akllawarqanchikqa Cristowan huklla kaptinchik herenciata chaskinanchikpaqmi.

12Ñawpaqmantaraqmi Cristopi suyarqanchik, chaynapi ñoqanchiktakama hatun atiyniyuq Dios yupaychasqa kananpaq. 13Cheqap allin noticiata uyarispam Cristoman iñikurqankichik salvo kanaykichikpaq, chayraykum Diosllapaqña kanaykichikpaq prometekusqan Chuya Espirituwan sellasqa kachkankichik. 14Chuya Espirituqa herencia chaskinanchiktam garantizan llapallan rantisqankunata Dios libranankama, chaynapi hatun sumaq kancharichkaq kayninmanta yupaychananchikpaq.

Iñiqkunapaq Pablo mañakusqanmanta

15Chayraykum qamkunamanta uyarirqani Señorninchik Jesucristopi iñiyniyuq kasqaykichikta hinaspa llapallan iñiqmasinchikkuna kuyasqaykichikta.

16Chaymi mañakuyniykunapi tukuy tiempo qamkunamanta Diosman graciasta qoni. 17Señorninchik Jesucristopa Atiyniyuq Dios Taytantam mañakuchkani Espiritunwan yachayniyuq kay atiyta qosunaykichikpaq, chaynapi qamkunaman reqsichikuptin cheqapta reqsinaykichikpaq.

18Mañakuchkanitaqmi yuyaymanaynikichikta Diospuni kanchaykunanpaq, chaynapi qayasusqaykichikrayku confianzawan suyasqaykichikta yachanaykichikpaq hinaspa Diosllapaqña kawsaqkunawan chay kancharichkaq qosusqaykichik herenciamanta yachanaykichikpaq.

19Mañakuchkanitaqmi Diospa mana imawanpas tupachiy atina atiyninmanta yachanaykichikpaqpas, chay atiyninwanmi Diosqa iñiqkunata kallpanchawanchik, chay atiynintam Diosqa sinchi kallpanwan qawachikurqa. 20-Kay atiymi Cristota kawsarichispan alleqninpi hanaq pachapi tiyaykachirqa. 21Hinaspam hatuncharun gobiernaqkunapa, kamachikuqkunapa, atiyniyuqkunapa, munaychakuqkunapa. Chaynataq kunan tiempopi, hamuq tiempopi imaymana sutiyuqkunapa hawanpim hatuncharun.

22-Tukuy imatapas Cristowanmi saruchirqa. Hina Cristotam llapallan iglesiakunapa uman kananpaqpas churaykun. 23-Llapallan iglesiakunaqa Cristopa cuerponmi, cuerpowan umaqa hukllam, chaynam iñiqkunapas Cristowanqa huklla kachkanku, payllam lliwpi llimparichkan.