Search form

Éxodo 20

Chunkantin kamachikuykunamanta

1Diosmi tukuy kaykunata rimarispan nirqa:

2Ñoqa Tayta Diosmi, Diosnikiqa kani, Egipto nacionpi esclavo kaspa ñakarisqaykimanta hurqomuqnikim kani.

3Amam ñoqamanta sapaq dioskunaqa kapusunkichu.

4Amam imaman rikchakuq idolotapas ruwakunkichu, hanaq pachapi kaqman, kay pachapi kaqman, allpa ukupi kaqman nitaq yakupi kaqman rikchakuqtapas. 5-Chaykunapa ñawpaqninpiqa amam qonqorakunkichu, amataqmi yupaychankichu. Ñoqa Tayta Diosllam Diosnikiqa kani. Manam munanichu sapaq dioskuna yupaychanaykitaqa, cheqniwaqniy runataqa tayta-mamanmanta qallaykuspam willkanpa willkankama castigasaq. 6-Kamachikuyniyta kasukuspa kuyawaqniy runatam ichaqa waranqantin mirayninkama kuyasaq.

7-Ñoqa Tayta Diospa sutiytaqa amam yanqaqa rimankichu. Sutiyta yanqa rimaqtaqa castigasaqpunim.

8-Samana punchawtaqa amam qonqankichu ñoqapaq sapaqchasqa kasqanrayku. 9Soqta punchaw llamkaspaykim tukuy ruwaynikikunata ruwanki, 10-qanchis kaq punchawpim ichaqa samanki, chay punchawqa ñoqa Tayta Diospaq sapaqchasqa punchawmi. Chay punchawpiqa amam imatapas ruwankichu, qari churikipas, warmi churikipas, criadoykipas, criadaykipas, animalnikipas, nitaq qanwan yachaq huklaw llaqtayuqpas, amam imatapas ruwanqakuchu. 11-Soqta punchawpim cielokunata, kay pachata, lamar qochata chaynataq chaypi tukuy ima kaqkunatapas unancharqani. Qanchis punchawpiñataqmi samarqani, hinaspam chay punchawta bendecispay sapaqcharqani.

12--Tayta-mamaykitam respetanki, chaynapi ñoqa Tayta Diospa qonay allpapi unay wata kawsanaykipaq.

13-Amam pitapas wañuchinkichu.

14-Amam hukwanqa waqllikunkichu.

15-Amam suwakunkichu.

16-Amam runamasikipa contranpiqa llullakunata rimankichu.

17-Amam munapayankichu runamasikipa wasinta, warminta, criadanta, criadonta, toronta, asnonta nitaq ima kapuqnintapas, nispa.

Israelpa mirayninkuna Diosta manchakusqankumanta

18Llapallan runakunam rayokunata hinaspa trompetapa waqasqanta uyarirqaku, qawarqakutaqmi llipyakunatawan orqopa qosnisqantapas. Chaymi manchakuspanku karullapi sayarqaku. 19-Hinaspam Moisesta nirqaku:

Qamyá rimapayawaykuqa, ñoqaykuqa uyarisaqkum, Diosqa ama rimapayawachunkuchu, yanqañataqmi wañuruymanku, nispanku.

20Chaymi Moisés nirqa:

Ama manchakuychikchu. Diosqa pruebasunaykichikpaqmi hamurqa, chaynapi payta respetaspaykichik mana huchallikunaykichikpaq, nispa.

21Runakuna karullapi sayanankukamam Moisesñataq Diospa kasqan yana puyu ukuman asuykurqa.

Altarta ruwanankupaq kamachikuymanta

22Israelpa mirayninkunaman ninanpaqmi Moisesta Tayta Dios kaynata nirqa:

Qamkunaqa yachankichikñam cielomanta qamkunawan rimasqayta. 23Amam qorimanta qollqemanta idolokunata ruwankichikchu, ñoqata hina yupaychanaykichikpaqqa. 24Altarniytaqa allpamantam ruwanki, hinaspam animalkunata wañuchispayki chaypi lliwta kañanki, chaypitaqmi wañuchinki ovejaykikunatawan vacaykikunatapas chaynataq ñoqawan allinlla kasqaykimanta ofrendakunatapas. Ñoqam hamuspay sitiota akllasaq, sutiyta chaypi yuyarinaykichikpaq, hinaspaymi chaypi bendecisqaykichik. 25-Rumimanta altarta ruwapuwaspaykiqa, amam labrasqa rumimantaqa ruwankichu, herramientawan labraspaykiqa manam yupaychawanaykipaq hinachu ruwachkanki. 26Altarniypaqa manam gradasninqa kanqachu, seqaptiki chankayki ama rikukunanpaq.