Search form

Hebreos 1

Churintakama Diospa rimapayawasqanchikmanta

1Ñawpaq tiempokunapim profetankunatakama achka kutita hinaspa tukuy imaymanapi ñawpaq taytanchikkunaman Dios rimapayarqa. 2Kay tukupay punchawkunapiñataqmi Churintakamaña rimapayawarqanchik. Paytam Dios churarqa tukuy ima herencia chaskiq kananpaq. Paywantaqmi hanaq pachatawan kay pachatapas unancharqa. 3Paymi Diospa rikchaynin kasqanrayku Diospa kanchariyninta qawachiwanchik. Paymi atiyniyuq palabranwan kamachispan tukuy imakunata takyachin. Payqa huchanchikkunata mayllaykuspanmi Diospa alleq lawninpi tiyaykurqa.

4Chaynapim Diospa Churinqa admirakuypaq sutita herenciapi chaskisqanrayku angelkunamantapas aswan munayniyuq kachkan. 5--¿Mayqannin angeltataq Diosqa nirqa:

Qanmi Churiy kanki, kunanmi ñoqa Taytayki kani, nispa?

Nirqataqmi:

Ñoqam paypaq Taytan kasaq. Payñataqmi ñoqapaq Churiy kanqa, nispapas.

6-Piwi Churinta kay pachaman kachamuspanmi nirqa:

Diospa llapallan angelninkunaqa paytayá yupaychachunku, nispa.

7-Angelkunamantañataqmi kaynata nin:

Diosqa angelninkunatam wayrata hina ruwan,

serviqninkunatañataqmi rawrachkaq ninata hina ruwan, nispa.

8Churinmantañataqmi kaynata nin:

Diosnilláy,

qamqa wiña-wiñaypaqmi munaychakunki,

mana pimanpas sayapakuspam munaychakunki.

9-Qamqa allin kaqtam kuyarqanki,

mana allin kaqtañataqmi cheqnirqanki,

chayraykum Diospas akllasurqanki,

qampa Diosnikim akllasurqanki,

wakinmantapas qam kaqtaraqmi akllasurqanki,

miski asnaq aceitewan tallichkaq hinam kusikuywan huntaykusurqanki.

10Nirqataqmi:

Señorlláy, kay pachatam qallariyninpi cimientarqanki,

hanaq pachatapas makikiwanmi ruwarqanki.

11Chaykuna puchukaruptinpas

qamqa wiñaypaqmi takyanki,

chaykunam ichaqa pacha hina mawkayarunqa.

12-Qamqa pachata hinam patararunki,

pachan cambiachichkaq hinam cambiarachinki.

Qanmi ichaqa hina kaqlla kanki,

wataykikunapas mana tukuqmi.

13-Manam mayqannin angelninkunatapas Diosqa nirqachu:

Enemigoykikunata vencenaykama

alleqniypi tiyaykuy,

enemigoykikunata saruchinaykama

alleqniypi tiyaykuy, nispaqa.

14Llapallan angelkunaqa Dios serviq espiritukunam, paykunaqa salvakunankupaq kaqkunata yanapanankupaqmi kachamusqa kachkanku.