Search form

Oseas 1

Oseaspa warminmantawan churinkunamanta

1-----Judá nacionpi Uzías, Jotam, Acaz hinaspa Ezequías rey kachkaptinkum; chaynallataq Joaspa churin Jeroboampas Israelpi rey kachkaptinmi, Beeripa churin Oseasta Tayta Dios rimapayarqa.

2Kaymi Oseasman Tayta Diospa rimarisqan simikuna. Tayta Diosmi Oseasta nirqa:

Rispayki chuchumika warmiwan casarakamuy hinaspa chay warmipi churyamuy, “huchapakuy wawakuna”, nisqa kanankupaq. Israelmi Tayta Diosmanta sapaqchakuruspan chuchumika warmi hinaña rikurirun, nispa.

3Chaymi Diblaimpa churin Gomerta Oseas casararqa, hinaptinmi wiksayakuruspan qari wawata wachakurqa. 4-Chaymi Oseasta Tayta Dios nirqa:

Jezreelwan chay wawata sutichay, yawarta Jezreel llaqtapi chaqchusqanmantam rey Jehupa ayllunta chaylla castigasaq, chaynatam Israel nacionpa munaychakuyninta tukusaq. 5Chay punchawpim, Jezreel qechwapi Israelpa atiyninta pakisaq, nispa.

6Huktawan wiksayakuruspanmi warmi wawata Gomer wachakururqa. Chaymi Oseasta Tayta Dios nirqa:

+Lo-ruhama nispa sutichay, manañam huktawanqa Israel nacionta llakipayasaqñachu, nitaqmi pampachasaqñachu. 7Judá naciontam ichaqa llakipayaykuspay salvaykusaq, manam flechawanchu nitaqmi espadawanchu, manam guerrawanchu nitaqmi caballokunawanchu, manam caballopi silladakunawanchu, aswanqa Diosninku kasqayraykum, nispa.

8Lo-ruhamata anukaruspanmi Gomerqa huktawan wiksayakuruspan qari wawata wachakururqa. 9Hinaptinmi Oseasta Tayta Dios nirqa:

+Lo-ami nispa chay wawata sutichay, qamkunaqa manam llaqtayñachu kankichik, ñoqapas manataqmi Diosnikichikñachu kani, nispa.

Israelwan Judá huktawan hatarichisqa kanankumanta

10-Chaywanpas, Israelpa mirayninkunaqa

lamar qochapa patanpi mana yupay atina aqo hinañam kanqaku.

“Qamkunaqa manam llaqtanchu kankichik nisusqaykichik sitiopim”,

“qamkunaqa kawsaq Diospa llaqtanñam kankichik nispa” nisunkichik.

11Judapa chaynataq Israelpa mirayninkunam

hukllaman huñunakuspa kamachiqninkutapas chullallataña akllanqaku,

tukuy hinastinmantam Jerusalenman kutimunqaku,

Jezreelpa punchawninqa hatunmi kanqa.