Search form

Santiago 1

Cartapa qallariyninmanta

1-Ñoqa Santiago, Diospa hinaspa Señor Jesucristopa serviqninmi, llapallan kay pachapi cheqesqa Israelpa chunka iskayniyuq ayllunkunata rimaykamuykichik.

Sasachakuykuna hamuptin pacienciakunamanta

2Wawqe-panillaykuna, imaymana sasachakuykunapi tarikuspaykichikqa aswanraqyá kusikuychik. 3Yachasqaykichikpi hinapas iñisqaykichikmanta pruebasqa kaspaqa aswan pacienciayuq kaytam tarinkichik. 4Ichaqa qespichisqa kanaykichikkamayá aswanraq pacienciakuychik, chaynapi iñiypi wiñaspa mana imapa pisisqan kanaykichikpaq.

5Mayqannikichikpapas yachaynikichik pisilla kaptinqa, Diostayá mañakuychik, payqa lliw mañakuqninkunamanqa mana piñakuspam chaninninpi qoykunqa. 6Ichaqa ama iskayrayaspayá mañakuychik, iskayrayaspa mañakuqqa lamar qochapa kayman chayman wayrapa apasqan olankunamanmi rikchakun. 7Iskayrayaspa mañakuq runaqa amayá suyachunchu Señormanta imapas chaskiytaqa. 8Chayna iskayrayaq runaqa tukuy ima ruwasqanpipas allintaqa takyanchu.

Apumantawan wakchamanta

9Wakcha wawqe-panikunaqa Señorpa hatunchasqan kasqanpiyá hatunchakuchun, 10apu runañataq Señorpa uchuychasqanpi. Apu runaqa qorapa waytan hina chinkaruqllam. 11-Inti qespiramuspa ruparamuptinmi qoraqa chakirun, waytanñataqmi wichirun hinaptinmi sumaqllaña kayninpas tukurun, chaynapunim apu runapas qollqella huñuy munasqanpi wañurunqa.

Pruebakunamantawan tentasqa kaymanta

12Mayna kusisqam sasachakuykuna hamuptin pacienciakuq runaqa. Payqa chay sasachakuykunata venceruspanmi wiñay kawsay coronata chaskinqa. Chaytam Dios prometekurqa haykam kuyaqninkunaman qonanpaq. 13Pipas tentasqa kaspaqa ama piensachunchu: “Diosmi tentawachkan” nispaqa, Diosqa manam piwanpas tentachikunmanchu, nitaqmi pitapas tentanmanchu. 14Runaqa sonqonpa munasqankunawan apachikuspanmi tentachikunanpaq aysachikun. 15Chayna mana allin munaykunamantam huchakuna rikurimun; huchañataqmi llumpayta wiñaruspaqa wañuyta apamun.

16Kuyasqay wawqe-panillaykuna, amayá pantaruychikchu. 17Tukuy imapas allin kaqkunawan cheqap atiyqa cielopi kaq chaskakuna unanchaq Diosllamantam hamun. Diosqa hina kaqllam, payqa manam tikrakunchu, nitaqmi llantuy hinachu pasaruqlla. 18Paymi cheqap palabranta reqsiykachiwaspanchik musoqmanta nacechiwarqanchik, chaynapi lliw unanchasqankunamanta primicia hina kananchikpaq.

Diosta cheqap serviymanta

19Kuyasqay wawqe-panillaykuna, qamkunaqa chaylla uyariqyá kaychik, allinta tanteaspayá rimaychikpas, amataqyá piñakuqllañaqa kaychikchu. 20Piñasqa runaqa manam Diospa munasqanman hinachu ruwan. 21Tukuy mana allin ruwaykunata hinaspa millay munapayaykunata saqespa, Diospa palabranta llampu sonqolla chaskiychik. Paypa palabranqa almaykichikta salvaykunapaq atiyniyuqmi.

22Diospa palabranta ruwayman churaqyá kaychik, amayá uyariqllachu; chayna kaspaqa kikillaykichiktam engañakuchkankichik. 23Pipas uyariqlla kaspa mana ruwayman churaqqa, espejopi uyan qawakuqmanmi rikchakun, 24paymi qawapakusqanmanta muyuriykuspanqa imayna kasqantapas chaylla qonqakurun. 25Ichaqa librawaqninchik alli-allin ley uyarisqanta mana qonqaruspa chaypi yuyaymanaspa allinta takyaqqa chaynataq mana qonqaspa kasukuqqa mayna kusisqam kanqa tukuy ima ruwasqanpipas.

26Sichum pipas Dios yupaychaq kasqanpaq hapikuchkaspa, rimasqantañataq mana controlakuq runaqa, kikintam engañakuchkan, Diosta yupaychasqanpas yanqapaqmi kanqa. 27Dios Taytapa qayllanpi mana pantayniyuq cheqap religionqa kayna ruwanmi: Mana tayta-mamayuqkunaman watukuykuymi, viudakunata llakinkupi yanapaykuymi hinaspa kay pachapi mana allin ruwaykunaman mana chapukuspa waqaychakuymi.