Search form

Jeremías 1

Jeremiasta Tayta Dios sapaqchasqanmanta

1Kaykunam Benjamín law Anatot llaqtapi yachaq sacerdotekunamanta kaq Hilciaspa churin Jeremiaspa rimarisqankunawan ruwasqankuna. 2-Judá nacionpi Amonpa churin rey Josías chunka kimsayuq wataña munaychakuchkaptinmi, Jeremiasta Tayta Dios rimapayarqa. 3--Rimapayarqataqmi Judá nacionpa reynin Joacimpa chaynataq Sedequiaspa tiemponpipas. Paykunaqa karqaku rey Josiaspa churinkunam. Rey Sedequiaspa chunka hukniyuq wata munaychakusqankamam rimapayarqa. Chay watapa pichqa kaq killanpim Jerusalén llaqtapi yachaqkuna Babilonia nacionman preso apasqa karqaku.

4Tayta Diosmi rimapayawaspan kaynata niwarqa:

5Mamaykipa wiksanpi manaraqpas

unanchachkaspaymi reqsirqaykiña,

manaraqpas nacechkaptikim

qamtaqa sapaqcharqaykiña;

nacionkunapa profetan

kanaykipaqmi akllarqaykiña.

6Ñoqañataqmi kaynata nirqani:

¡Ay, Señor, Dios Taytalláy,

ancha warmaraqmi kani,

manaraq rimay yachaqmi kani! nispay.

7Ichaqa Tayta Diosmi niwarqa:

Ama niychu ancha warmaraq kasqaykitaqa,

qamqa kamachisqaymanmi maymanpas rinki,

imam kamachisqaytam willakamunki.

8Amam pitapas manchakunkichu,

qanwanmi kachkani libranaypaq, nispa.

Ñoqa Tayta Diosmi chaynata niki.

9Hinaspanmi Tayta Diosqa makinta haywariykamuspan, simiyta llapchaykuspan niwarqa:

Kunanmi palabraykunata simikiman churani.

10Kunanmi nacionkunapa hawanman churayki,

reykunapa munaychakuyninpa hawanpim churayki,

rachunaykipaq chaynataq tuñichinaykipaq,

taqmanaykipaq chaynataq chinkachinaykipaq,

plantanaykipaq chaynataq hatarichinaykipaq.

11Tayta Diosmi tapuwarqa:

Jeremías ¿imatataq qawachkanki? nispa.

Chaymi ñoqa nirqani:

Almendras sachapa kallmantam, nispa.

12Hinaptinmi Tayta Dios niwarqa:

Allintam rikurunki,

nisqaykuna ruwayman churasqa kanantam qawachkani, nispa.

13Kaqmantam Tayta Dios tapuwarqa:

¿Imatataq qawachkanki? nispa.

Chaymi ñoqañataq nirqani:

Norte lawmanta timpuchkaq manka taqtakaykamuchkaqtam, nispa.

14Chaymi Tayta Dios niwarqa:

Norte lawmantam kay nacionpi yachaqkunapaq

sasachakuy hamunqa.

15Ñoqa Tayta Diosmi kaynata nini:

Norte lawpi nacionkunatam qayasaq,

reyninkunam hamuspa

Jerusalenpa punkunpi trononkuta churanqaku;

Jerusalenpi, Judá nacionpi yachaqkunatam atacaspanku presota apanqaku.

16Kay castigotam llaqtayman apamusaq

mana allinkunata ruwaspa saqeruwasqankumanta,

sapaq dioskunapaqña inciensota kañapusqankumanta,

kikinkupa ruwasqankutaña hatunchasqankumanta.

17Chaynaqa, weqawnikita allinta wataykuspa riy,

lliw kamachisqaykunata paykunaman willamuy.

Ama paykunataqa manchakuychu,

mana chayqa,

paykunapa qayllanpim katkatatarachisqayki.

18Murallasqa llaqtata hinam churayki,

fierromanta pilarta hinam churayki,

broncemanta murallata hinam churayki,

Judá nacionpi reykunapa contranpi,

kamachiqninkunapa contranpi,

sacerdotenkunapa contranpi,

llapa runakunapa contranpi.

19Contraykipi peleaspankupas manam vencesunkichu,

ñoqam qanwan kachkani libranaypaq, nispa.

Ñoqa Tayta Diosmi chaynata niki.