Search form

Jonás 1

Jonaspa mana kasukusqanmanta

1-Amitaipa churin Jonasta rimapayaspanmi Tayta Dios kaynata nirqa:

2Nínive hatun llaqtaman rispa contranpi willakamuy, mana allin ruwayninkum qayllayman chayaramun, nispa.

3Jonasñataqmi mana kasukuspan Tayta Diosmanta lluptispan Tarsis lawman ayqekurqa, hinaspanmi Jope llaqtaman chayaruspan, Tarsis lawman lloqsiq barcota tariykuspan, pasajentapas pagaykuspa Tayta Diosmanta ayqekurqa. 4Ichaqa Tayta Diosmi lamar qochapi llumpa-llumpay wayrata hatarirachirqa, lamar qochapi wayra-para llumpayta hatariruptinmi barcopas pakikurunanpaq hinaña tarikurqa. 5Barcopi llamkaqkunapas mancharikuspankum diosninkuman sapakama qaparirqaku, hinaspankum barcopi cargakunatapas manaña llasananpaq yakuman wischurqaku. Jonasñataqmi barcopa uku lawninman yaykuruspan miskillataña puñukurqa. 6Chaymi barcopa capitannin asuykuspan Jonasta nirqa:

¿Imanasqataq qamqa puñukuchkanki? ¡Hatarispayki Diosnikita qayakuy! Ichapas llakipayariwaptinchik mana chinkaruchwanchu, nispa.

7Barcopi llamkaqkunañataqmi ninakurqaku:

Suerteta choqaspayá yachasunchik pipa huchanmantataq kay mana allinkuna hamuwasqanchikta, nispanku.

Chaynata ruwaptinkum Jonasman suerte tuparurqa. 8Chaymi Jonasta nirqaku:

Willawayku imanasqam kay sasachakuykuna hamuwasqanchikta ¿Imapitaq llamkanki? ¿Maymantataq hamuchkanki? ¿Maylawtaq llaqtayki? ¿Maylawtaq nacionniki? nispanku.

9Hinaptinmi Jonás willakurqa:

Ñoqaqa hebreo castam kani, lamar qochatapas chaynataq allpa pachatapas unanchaq Tayta Diostam yupaychani, nispan.

10Tayta Diosmanta Jonás ayqesqanta yachaykuspankum paykuna llumpayta mancharikurqaku, hinaspam nirqaku:

¿Imanasqataq kayta ruwarunki? nispanku.

11Lamar qocha astawanña piñarikuptinmi Jonasta paykuna tapurqaku:

Lamar qocha hawkayananpaqqa ¿imatataq qanwan ruwaymanku? nispanku.

12Chaymi Jonás nirqa:

Lamar qochaman wischuykuwaychik, hinaptinqa hawkayarunqam. Yachanim ñoqarayku kay wayra-para contraykichikpi hatarisqanta, nispa.

13Barcopi llamkaqkunam chaki allpaman kutimuyta munaspanku sasachakuyllawanña yakuta qachirqaku, ichaqa lamar qocha aswan kallpawanraq hoqarikuptinmi mana atirqakuchu. 14Chaymi Tayta Diosta qayakuspanku nirqaku:

Señor, amayá kay runapa vidanraykuqa ñoqaykupas wañurusaqkuchu; mana huchayuq kaptinqa amayá ñoqaykuchu paypa wañusqanmanta huchayuq kasaqku. Señor, qamqa imatapas ruwanki munasqaykiman hinam, nispanku.

15Chaynata nispankum Jonasta hoqarispa lamar qochaman wischuykurqaku, hinaptinmi lamar qocha hawkayarurqa. 16Chayta qawaykuspankum barcopi llamkaqkuna Tayta Diosta llumpayta manchakururqaku, chaymi Diosman sacrificiokunata qospanku yupaychanankupaqpas anchallataña prometekurqaku.

17-Ichaqa Tayta Diosmi hatu-hatun challwata alistarurqa Jonasta millpurunanpaq; chaynapim Jonasqa kimsa punchaw kimsa tuta challwapa wiksanpi karqa.