Search form

Lamentaciones 1

Jerusalén llaqtarayku llakikusqanmanta

1¡Ay, Jerusalén llaqtam,

achkallaña runayuq llaqtam, sapallanña qeparun!

¡Nacionkunapa ancha reqsisqan llaqtam,

viuda hinaña rikurirun!

¡Nacionkunapi munaychakuq llaqtam,

esclavoña rikurirun!

2Tutan tutanmi paray mayuta waqallachkan,

weqenkunapas yaku hinam uyanta paqchaykuchkan.

Kuyaqninkunamantapas manam hukllapas consuelaqnin kanchu,

amistadninkunapas qepancharuspam enemigonña rikurirun.

3Judá nacionmi presota aparachikun,

sasa llamkaykunapi ñakarichisqam tarikun,

nacionkunapi munaychakuq kachkaspam,

kunanqa manaña hawkayaypichu tarikun.

Qatikachaqnin enemigonkunam

hayparuspa ñakariyman churarun.

4¡Sionman rina ñankunam llakikuypaq kachkanku!

fiestakunaman hamuqpas manañam kanñachu;

punkukunapas tuñichisqam kachkan,

sacerdotekunam waqachkanku,

warmi wawakunam llakipi kachkanku

Jerusalenmi llakipa intusqan kachkan,

5Enemigonkunam paykunapi munaychakuchkan,

contranpi kaqkunam chaninchasqa kachkanku.

Tayta Diosmi llumpay huchanmanta ñakarichichkan,

wawankunam enemigonpa preso apasqan karqaku.

6Sionpa kuyayllapaq kayninpas chinkarunmi,

kamachiqninkunapas pastota mana tariq luwichukuna hinam kachkanku,

enemigonkunapa ñawpaqnintam

manaña kallpayuq lluptichkanku.

7Jerusalenmi humillachisqa kaspa llakipi purisqanta yuyarin,

ñawpaq watakunapi kapuqninkunatam yuyarin;

enemigonkuna venceruptinmi mana pipas yanapaykuqnin karqachu,

ñakariqta rikuspankum enemigonkuna asipayarqaku.

8Jerusalén llaqtam sinchita huchallikurun,

chayraykum penqaypi rikurirun,

haykam kuyaqninkunam penqayninta rikuspanku qepancharunku,

chayraykum penqakuymanta qepaman muyurispa waqachkan.

9Qachachakusqanpas sutillam pachanpi kachkan,

manam musyakurqachu imaynam tukuruytapas,

qonqaymantam wichiykun,

manam pipas consuelaqnin kanchu.

Dios Taytalláy,

sasachakuypi kallasqayta qawariway,

enemigoypa hatunchakusqanta qawariy.

10Jerusalenpa kapuqninkunatam

enemigonkuna lliwta apakunku,

llaqtapi runakunam huklaw nacionniyuq runakunata

santuarionman yaykusqanta rikurqaku.

Dios Taytalláy, qamqa manam munarqankichu

chayna runakuna wasikiman yaykunantaqa.

11Jerusalenpi yachaqkunam waqachkanku,

mikuyta maskaspam purichkanku;

kawsaytaraq munaspam

tukuy kapuqninkunawan mikuyta truekachkanku.

Dios Taytalláy,

¡sasachakuypi kasqayta qawariway!

12Ñanninta puriqkuna

qawariwaspa tanteariychik:

¿Manachu kay nanayniymanta imapas qokusunkichik?

¿Pitaq kaynaña nanaywan mana ñakariq kanman?

Tayta Diosmi piñakuyninpi

kaynaña ñakariyta kachaykamuwan.

13Tayta Diosmi

ninata kachaykamuspa tulluykunata kañarurqa,

purisqaypi toqllata churaruspanmi

qepamanraq kutirichiwarqa,

sapallayta saqeruwaptinmi

sapa punchaw ñakarirqani.

14Diosmi huchaykunata yugota hina wataruwarqa,

matankayman yugota wataruwaptinmi

kallpay tukurun;

enemigoykunaman Tayta Dios qoykuwaptinmi

manaña hatariytapas atiniñachu.

15Señormi wischururqa qari-qari soldadoykunata

akllasqa jovenniykunata tukurunanpaqmi

tropakunata contraypi huñuramurqa,

Señorqa uchkupi uvasta saruchkaq hinam

Judá nacionpi sipaskunatapas saruparurqa.

16Chayraykum waqachkani,

paray mayum weqellaypas suturichkan,

manam piniypas consuelawaqniy kanchu,

manam kallpanchaqniypas kanchu.

Enemigoykunam venceruwaspa

wawaykunata lliw wañurachin.

17Sión llaqtam qayakuspan makinkunata haywarin,

ichaqa manam pipas consuelaqnin kanchu;

Tayta Diosmi kamachikurqa,

Jacobta enemigonkuna muyurirunanpaq;

Jerusalenmi qayllankupi millakuypaq rikurirqa.

18Chaywanpas Tayta Diosqa allin ruwaqmi,

manam kamachikuyninkunata kasukurqanichu.

¡Llapallan runakuna, uyariwaychik!

¡Ñakarisqayta qawariychik!

Wawaykunatam joventa sipasta presota aparunku.

19Amigoykunatam yanapaykuwananpaq qayakurqani,

paykunam ichaqa qepancharuwanku.

Sacerdoteykunawan ancianoykunam

kawsanankupaq mikuyta maskachkaspanku

llaqtapi wañurunku.

20Dios Taytalláy, llakikuyniyta qawariway,

ukullaypa timpusqanta qawariway,

mana kasukuq kasqaymantam

sonqollaypas tukukuchkan.

Hawapim espadawan wawaykunata wañuchinku,

wasi ukupipas wañuymi munaychakuchkan.

21Runakunam ñakakusqayta uyarinku,

ichaqa manam pipas sonqollayta tiyaykachiq kanchu.

Enemigoykunam ñakarisqayta yacharurqaku,

chay ruwasqaykimantam paykuna kusikurqaku.

Nisqayki punchawta chayachimuyña,

ñoqa hina paykunapas ñakarinankupaq.

22Qampa qayllaykiman mana allin ruwasqanku chayamuchun;

huchankumanta paykunatapas castigay

ñoqata castigawasqaykita hina.

Llumpay waqasqaypim,

sonqollaypas wañunayachkanña.