Search form

Lucas 15

Chinkaruq ovejamanta

(Mt 18.10-14)

1Impuesto cobraqkunawan huchasapakunam Jesusta uyarinankupaq asuykurqaku. 2-Chaymi fariseokunawan Diospa leynin yachachiqkuna rimakachaspanku nirqaku:

Kay runaqa huchasapakunawanmi hukllawakun hinaspam paykunawan mikun, nispanku.

3Hinaptinmi Jesusñataq kay rikchanachiyta nirqa:

4¿Mayqannikichiktaq qamkunamanta pachak ovejanmanta huknin chinkaruptin isqon chunka isqonniyuqta purunpi saqeykuspa, chay chinkaq ovejata tarimunankama mana maskamunmanchu? 5Tariramuspanñataqmi kusisqallaña hombrorikamunqa. 6Hinaspam wasinman chayaramuspan amistadninkunatawan vecinonkunata huñuruspan ninqa: “Ñoqawan kusikusunchik, chinkasqa ovejaytam tariramuni”, nispa. 7Nikichikmi, chayna hatun kusikuymi kanqa hanaq pachapipas, huk huchasapa runa wanakuspa Diosman kutirikamuptinqa, isqon chunka isqonniyuq mana huchayuq runakunamantaqa, paykunaqa manañam imamantapas wanakunankupaq kanñachu.

Chinkasqa qollqemanta

8¿Ima warmitaq chunka qollqenmanta huknin chinkaruptin achkitapas rataykachisparaq wasinta pichaspan tarirunankama mana maskanmanchu? 9Tariruspanqa amistadninkunatawan vecinankunata huñuykuspan ninqa: “Hamuychik ñoqawan kusikusunchik, chinkarachisqay qollqetam tariruni”, nispa. 10Chaynaqa, nikichikmi, chaynatam Diospa angelninkunapas kusikun huk huchasapa runa wanakuruptinqa, nispa.

Chinkasqanmantaña rikuriramuq churimanta

11Jesusqa nirqataqmi:

Huk runapam iskay churinkuna karqa. 12Sullka kaqmi taytanta nirqa: “Taytáy, tupawaqniytayá qoykuwayña”, nispa. Chaymi taytanñataq iskaynin churinkunaman qoykarirqa. 13Chaymanta as punchawllamanmi sullka kaq churinqa lliw kapuqninta rantikuruspan karu llaqtaman ripukurqa, hinaspanmi mana allin kawsayman qokuruspan qollqenta tukururqa.

14Maypacham tukuy kapuqninta tukuruptinmi, chay kasqan llaqtaman hatun muchuy chayaramurqa. Chaymi yarqaymanta kaspan, 15llamkayta maskaspan chay llaqtapi huk runaman asuykurqa, hinaptinmi chay runañataq kuchinta michimunanpaq haciendanman kacharqa.

16Yarqaymanta kaspanmi kuchikunapa mikusqan algarrobotaña mikuykuyta munarqa, ichaqa manam pipas qoykurqachu. 17Huk punchawmi yuyaymanaspan nirqa: “Taytaypa wasinpi llamkaqkunaqa allin mikusqam kachkanku, ñoqañataqmi kaypi yarqaymanta wañuruchkaniña.

18Chaynaqa, kutispayá taytayta nimusaq: Taytáy, Diospa contranpiwan qampa contraykipim huchallikuruni. 19Manañam churiymi niwanaykipaq hinañachu kani, hukkaqnin llamkapusuqnikita hinallañayá chaskiykullaway nispay”. 20Hinaspanmi hatarispan taytanpa kasqanman kutirqa.

Taytanñataqmi karullataraq hamuchkaqta rikuruspan sinchita paymanta llakirikuspan chaskiqnin kallparqa, hinaspam muchaykuspan abrazaykurqa. 21Churinñataqmi nirqa: “Taytáy, Diospa contranpiwan qampa contraykipim huchallikuruni. Manañam churiymi niwanaykipaq hinañachu kallani”, nispa.

22Taytanñataqmi serviqninkunata kamachirqa: “Allinnin pachawan chaylla pachachiychik, dedonmanpas anillota churaspa usutaykachiychik. 23Wiran malta torota pusamuspa nakaychik, kusikuymanta fiestata ruwaspa mikunanchikpaq. 24Kay churiyqa wañusqañam karqa, kunanmi ichaqa kawsariramun; chinkasqam karqa, kunanmi ichaqa tarisqaña”, nispa. Chaymi kusikuyllawanña fiesta ruwayta qallaykurqaku.

25Mayor churinñataqmi chakrapi kasqanmanta wasipa hichpantaña kutimuchkaspan takisqankutawan tususqankuta uyarirurqa.

26Chaymi hukkaqnin serviqninta qayaykuspan imaynampim chayna kasqanta tapurqa. 27Hinaptinmi chay serviqninñataq nirqa: “Wawqekim kutiramun, chaymi taytayki sanollata hinaspa allinllata chaskiykusqanmanta wiran malta torota nakarachispan fiestata ruwachichkan”, nispa.

28Chaymi llumpayta piñakuspan mana yaykuyta munarqachu. Hinaptinmi taytanña lloqsiykuspan yaykunanpaq ruegarqa. 29Ichaqa paymi taytanta nirqa: “Qamqa yachankim tukuypi kasukusqayta chaynataq kaychika wata servisqaytapas, aswanqa manam cabrachallatapas qoykuwarqankichu chaynapi amistadniykunawan kusikunaypaq. 30Qosqayki kapuqnikikunata, chuchumika warmikunawan tukuruspa kutiykaramuq churikipaqñataqmi wiran malta torotaraq nakarachipunki”, nispa.

31Taytanñataqmi nirqa: “Churilláy, qamqa tukuy tiempom ñoqawan kachkanki, tukuy imaypas qampam. 32Chaynaqa, ¿Imanasqataq kay wawqeki kutiramusqanmantaqa mana fiestata ruwaspa kusikuchwanchu? Kay wawqekiqa wañusqam karqa, kunanmi ichaqa kawsariramun; chinkasqam karqa, kunanmi ichaqa tarisqaña”, nispa.