Search form

Nahúm 1

Nínive llaqtapa contranpi Diospa piñakuyninmanta

1-Kaymi Elcos llaqtayuq Nahumpa visionpi imam rikusqanmanta qellqa. Paymi Nínive llaqtapa contranpi kaynata profetizarqa:

2Tayta Diosqa celosom hinaspa vengakuqmi,

Tayta Diosqa contranpi sayariqkunamanta vengakuqmi,

enemigonkunapa contranpi piñakuqmi.

3Tayta Diosqa mana chaylla piñakuruqmi,

payqa ancha hatun atiyniyuqmi,

huchayuq runataqa castiganqapunim;

para-wayrapi chaynataq vientokunapipas puriqmi,

puyukunapas purisqanpa polvonmi.

4Lamar qochapas mayukunapas qaqchaptinqa chakirunmi,

Basanpiwan Carmelo orqopi sachakunapas qawirunmi.

Líbano orqopi waytakunapas qawirunmi.

5Orqokunapas qayllanpiqa katkatatanmi,

moqokunapas qayllanpiqa chullurunmi.

Allpa pachapas, hawanpi kaqkunapas

paypa qayllanpiqa mancharikunmi.

6¿Pitaq pay piñakuruptin qayllanpi sayanman?

¿Pitaq sinchita piñakuruptin takyapakunman?

Piñakuyninqa nina hinaraqmi tallirikun,

qaqakunapas qayllanpiqa tuñinmi.

7Tayta Diosqa kuyapayakuqmi,

sasachakuy punchawpipas waqaychakuqmi,

payman hapipakuqtaqa pakaykunmi.

8Contranpi hatariqkunatam ichaqa

lloqlla hinaraq chinkarachin,

enemigonkunataqa tutayaypipas qatikachanmi.

9¿Imatataq Tayta Diospa contranpi piensachkankichik?

Payqa pasaypaqtam chinkarachisunkichik,

huk kutillatam enemigonkunamantapas vengakun.

10Kichka hina wankuy-wankuyña kaspankupas

sinkakuyninkupa nuyusqanña kaspankupas

chakisqa qopa hinam kañasqa kanqaku.

11Nínive llaqta, qanmantam lloqsimurqa

Tayta Diospa contranpi mana allinta tanteaq runa,

mana allinkunata umachakuq runa.

12Chayraykum llaqtanta Tukuy Atiyniyuq Tayta Dios kaynata nin:

Asiria llaqtaqa mayna kallpasapaña kaspapas,

achkallaña runayuq kaspapas,

purmachisqa kaspam pasaypaqta chinkanqa.

Judá llaqta, llumpaytam ñakarichirqayki,

manañam mastaqa ñakarichisqaykiñachu.

13Kunanmi hawaykipi llasasuqniki yugota pakirusaq,

chaqnasuqniki cadenatapas tipirusaqmi.

14Asiria llaqta,

Tayta Diosmi contraykipi kaynata kamachikun:

Sutikipas pasaypaq qonqasqam kanqa,

yupaychanayki wasimantapas

makikiwan ruwasqayki idoloykikunatam pasaypaqta chinkarachisaq,

millakuypaq kasqaykiraykum sepulturaykitapas chaypi ruwachisaq.

Nínive llaqta tuñichisqa kananmanta

15-Qawariychik allin willakuy apamuqta,

hawkayaymanta willakuy apamuqta,

orqokunapa hawanta hamusqanta.

Judá nación, fiestaykikunata ruway,

prometekusqaykikunata cumpliy,

manañam haykapipas mana allin runaqa hamusunkiñachu,

pasaypaqtañam chinkarun.