Search form

Filipenses 1

Cartapa qallariyninmanta

1-Jesucristo serviq ñoqa Pablom Timoteopiwan qellqamuykiku Filipos llaqtapi kaq llapallan iñiqkunaman, michiqkunaman hinaspa diaconokunaman, qamkunaqa Jesucristollapaqña sapaqchasqam kachkankichik. 2Dios Taytanchikwan Señorninchik Jesucristoyá kuyakuynintawan hawkayayninta qamkunaman chaqchurimusunkichik.

Iñiqkunapaq Pablo mañakusqanmanta

3Sapa kuti yuyarispaymi qamkunamanta Diosninchikman graciasta qoni. 4Orakuspaymi kusikuywan tukuy tiempo llapallaykichikpaq Diosta mañakuchkani, 5mañakuchkaniqa qallariyninmanta kunankama Cristomanta allin noticiata willakuptiy yanapawasqaykichikmantam. 6Yachanipunim, qamkunapi allinkuna qallariq Diosninchikqa Jesucristo kutimunankama chay qallarisqanta tukunanta.

7Qamkunamanta kayna piensayniyqa allinmi, qamkunatam sonqoypi apaykichik. Carcelpi kaptiypas, autoridadkunapa qayllanpi kaspay, allin noticiata willakusqay cheqap kasqanmanta valechiptiypas, ñoqawan kaspam yanapawarqankichik, chaywanmi Diospa kuyakuyninta qawaykachiwarqankichik. 8Jesucristopa kuyakuyninwan qamkunata imayna kuyasqaytapas Diosninchikmi yachan.

9Kaytam mañakuchkani, Diospa kuyakuynin qamkunapi aswan-aswan wiñananpaq chaynataq yachaytawan yuyayta qosunaykichikpaq, 10chaynapi allin kaqkunata reqsinaykichikpaq, chaymi Jesucristopa kutimunan punchawpaq mana huchayuq hinaspa mana pitapas urmachiq kankichik. 11Jesucristom yanapasuchkankichik allin ruruchkaq sacha hina allinkunata rurunaykichikpaq, chaynapi Diosta yupaychaspa hatunchanaykichikpaq.

Cristollapaqña kawsakuymanta

12Wawqe-panillaykuna, yachanaykichiktam munani, tukuy ima pasawasqanqa, Cristomanta allin noticia willakusqay wiñananpaqmi karqa. 13-Chayraykum palaciopi kaq lliw soldadokunapas chaynataq wakin runakunapas Jesucristorayku preso kasqayta yacharunku. 14Achkaq wawqe-panikunam preso kasqayta qawaspanku kallpanchakurqaku, mana manchakuspa Señorpi hapipakuspanku aswanraq Diospa palabranta willakunankupaq.

15Cheqaptapunipas wakinkunaqa envidiakuspa hinaspa cheqnikuspam Cristomanta willakunku, wakiqkunam ichaqa allin sonqowan willakunku. 16Wakiqkunam Cristomanta willakunku hatun kuyakuywan, paykunaqa yachankum allin noticia willakuyta defiendenaypaq preso kasqayta. 17Wakiqkunam ichaqa envidiakuspanku imapas chaskinankuraykulla willakunku, chaynapi preso kasqaypi astawanraq llakichiwayta munaspanku.

18Ichaqa manam imananchu, hinayá Cristomanta willakuchunku, allin sonqowanpas otaq mana allin sonqowanpas, kayqa llumpaytam kusichiwan, astawanraqmi kusikusaqpas.

19Ñoqaqa yachakunim Diosta mañapuwasqaykichikwan hinaspa Jesucristopa Espiritunpa yanapakuyninwan carcelmanta allinlla lloqsimunayta.

20Tukuy sonqoywanmi Diosman hapipakuchkani imamantapas mana penqachiwanankupaq hinaspa mana manchakuspa rimanaypaq, chaynapim ñawpaq tiempopi hina kunan tiempopipas, wañuptiypas otaq kawsaptiypas Jesucristoqa cuerpoypi hatunchasqa kanqa.

21Ñoqapa kawsakuyniyqa Cristom, wañukuyñataqmi aswan allinraq. 22Ichaqa kay pachapiraq kawsaspayqa Señorpaqmi imatapas allinta ruwayman, chaymi mayqan akllaytapas mana atinichu. 23Iskayninmanta mayqanpas akllayqa sasam, ichaqa munaymanmi wañukuspay Cristowanña kuska kayta, chay kaqmi ñoqapaqqa aswan allin kanman. 24Aswanqa qamkunaraykum kay pachapiraq kawsanay.

25Chayraykum kawsanaymantaqa seguro kachkani, llapallaykichikta yanapanaypaqmi kawsasaqraq chaynapi iñisqaykichikpi wiñanaykichikpaq hinaspa kusikunaykichikpaq.

26Chaynaqa, huktawan qamkunaman kutimuptiymi Jesucristota kusikuywan hatunchankichik. 27Jesucristomanta allin noticia uyarisqaykichikman hinayá vidaykichik kachun. Watukamuspay otaq maypiña kaspaypas qamkunamantam uyariyta munani huk sonqolla qaqa hina sayaspa vencesqaykichikmanta, iñisqaykichik allin noticiata willakunaykichikpaq kallpanchakusqaykichikmanta hinaspa 28contraykichikpi kaqkunatapas mana manchakusqaykichikmanta. Contraykichikpi kasqankuraykum yachanchik paykunapa puchukananta, qamkunañataq salvasqa kanaykichikta. Chayqa Diosmantam hamun.

29Diosmi qamkunaman qosurqankichik Cristopi hapipakuyta chaynataq payrayku ñakariytapas. 30-Chaynaqa, imaynam sasachakuypi karqani chaynam qamkunapas kankichik, ñawpaqta imayna ñakarisqaytawan kunan ñakarisqaytapas yachankichikmi.