Search form

Cantares 1

1-Salomonpa qellqasqan sumaq taki.

Punta kaq taki

Warmim nin:

2¡Ay, imaynaraq simikiwan muchaykuwankiman!

kuyakuynikiqa vinomantapas aswan miskim.

3Perfumekikunapas miski-miski asnariqmi,

sutikipas tallisqa perfume hinaraqmi,

chayraykum sipaskuna kuyasunki.

4¡Hakuchik, chaylla pusakuway!

¡Reynilláy, cuartoykiman pusakuway!

Takiqkunam ninku:

Ñoqaykuqa sinchillatañam qanwan kusikusaqku,

vinomantapas mastaqa kuyakuynikitam yuyarisaqku.

Chayraykum sipaskuna anchata kuyasunki.

Warmim nin:

5Jerusalenpi warmikuna,

kuyaychallapaq yanacham kani,

Cedarpa carpankuna hina,

Salomonpa wasinpi cortinakuna hina.

6Amayá yanacha kasqaytachu qawaychikqa,

nitaq intipa yanayarachisqan aychaytachu.

Turiykunam ñoqapaq piñakuruspanku

uvas chakrata cuidachiwarqaku,

chaynapim kikiypa uvas huertaytaqa mana waqaycharqanichu.

7Ancha kuyakusqalláy, willaykullaway:

¿Maypitaq michinki ovejaykikunata?

¿Maypitaq chawpi punchawta samanki?

¿Imanasqataq michiqmasikikunapa ovejankunapa chawpinpi yanqa purisaq?

Takiqkunam ninku:

8Llapa warmikunamanta kuyayllapaq warmicha,

mana yachaspaykiqa, ovejakunapa yupinta qatipay;

michiqkunapa hatusninpa waqtampi cabrachaykikunata michiy.

Qarim nin:

9Ancha kuyakusqalláy, ñoqapaqqa qamqa kanki

Faraonpa carretan aysaq sumaq yeguacha kaqllam.

10¡Ima sumaqmi aretekikunapa chawpinpi uyaykipas!

¡Mayna kuyayllapaqmi collarnikikunapa chawpinpi kunkaykipas!

11Qorimanta alhajakunatam ruwapusqaykiku,

qollqewan adornasqatam ruwapusqaykiku.

Warmim nin:

12Mesanpi rey tiyaykuptinmi,

perfumenñataq miskillataña asnarirqa.

13Ñoqapaqqa kuyakusqayqa

ñuñuykunapa chawpinpi

mirra wayqacha hinaraqmi.

14Kuyakusqayqa ñoqapaqqa

En-gadi lawpi uvas huertakunapa chawpinpi

alheña waytacha kaqllaraqmi.

Qarim nin:

15¡Mayna kuyapam kanki kuyakusqalláy!

¡mayna kuyapam kanki!

ñawikikunapas iskay palomakuna hinaraqmi.

Warmim nin:

16Kuyakusqalláy,

¡mayna kuyapam kanki!

¡Mayna kuyayllapaqmi kanki!

Qarim nin:

Verde qorakunam puñunanchikpas.

17Wasinchikpa pilarninkunapas cedrokunam,

wasinchikpa qatanpas cipreskunam.