Search form

Tito 1

Cartapa qallariyninmanta

1Ñoqa Pablom Diospa serviqnin hinaspa Jesucristopa apostolnin kani. Paymi kamachiwarqa Diospa akllasqankunata iñichinaypaq hinaspa kay allin noticiaman hina Diospa cheqap kaqninkunata reqsichinaypaq, 2chaynapi wiñay kawsayta confianzawanña suyanankupaq. Chaytaqa manaraq kay pacha unanchasqa kachkaptinraqmi mana llullakuq Dios prometekurqaña, 3hinaspam imam tiemponpi, allin noticia willakuynintakama palabran willakusqa kananpaq, chayta willakunaypaqmi salvaqninchik Dios ñoqata kamachiwarqa.

4-Tito qamqa iñiypi churiymi kanki, Dios Taytanchikwan salvaqninchik Jesucristoyá kuyakuynintawan hawkayayninta qanman chaqchurimuchun.

Creta lawpi Titopa llamkananmanta

5Creta islapim qamtaqa saqemurqayki, mana ruway tukusqa kaqkunata tukunaykipaq hinaspa sapa llaqtapi kaq iglesiapi ancianokunata churanaykipaq. 6Ancianoqa mana pipapas anyananmi kanan, chullalla warmiyuq, churinkunapas Jesucristopi iñiqkuna, kasukuqkuna hinaspa mana pipapas acusananmi kananku. 7Iglesiapi nanachikuq ancianoqa Diospa mayordomon kasqanraykum kanan: Mana pipapas anyanan, mana hatun tukuq, mana piñakuq, upyaypi mana purikuq, mana piwanpas peleakuq, mana qollqella kuyaq. 8Payqa kanan: Wasinpi samaykachikuqmi, allin kaqkunata kuyaqmi, allin piensaqmi, allin arreglo ruwaqmi, Diosllapaqña sapaqchakuqmi hinaspa genionta controlakuqmi. 9-Payqa cheqap yachachikuykuna chaskisqaman hapipakuqmi kanan, chaynapi wakinkunatapas cheqap kaqkunata yachachispa kallpanchananpaq hinaspa chay yachachikuypa contranpi rimaqkunatapas upallachinanpaq.

10Achkam kachkanku mana kasukuqkuna, llutan rimaqkuna, pantachikuqkuna; aswanqa judiokunamanta kaqkunaraqmi chayna rimaqkunaqa kachkankupas. 11Chayna runakunataqa upallachinapunim, paykunaqa yanqamanta qollqella ganayta munaspankum pantaykunata yachachispanku achka ayllukunataña chaqwarunku.

12Paykunamanta hukkaqnin profetanmi kaynata nirqa:

“Cretamanta runakunaqa llullallañam kanku, purun animal hina hinaspa mikuysapa qellakunam”, nispa.

13Chaykuna nisqanqa cheqappunim. Chaynaqa, as allinta qaqchay iñiyninkupi allinta sayanankupaq, 14hinaspa judiokunapa cuentolla rimasqankuta amaña uyarinankupaq nitaq cheqap kaqmanta karunchakuqkunapa kamachikuyninkunatapas ama kasukunankupaq.

15Chuya sonqokunapaqqa tukuy ima kaqkunapas chuyam, qacha sonqoyuq hinaspa mana iñiqkunapaqmi ichaqa mana imapas chuyaqa kanchu, paykunapaqqa yuyaymanayninkupas, concienciankupas qanrachasqam kachkan. 16Paykunam ninku: “Diostam reqsiniku” nispanku, ruwasqankuwanmi ichaqa Diosta neganku. Paykunaqa chiqnikuqmi, mana kasukuqmi hinaspa allin kaqkuna mana ruway munaqmi kachkanku.