Search form

ÉXODO 1

Egiptopi israelcuna llaquilla causashcamanta

1Jacobohuan Egiptoman yaicuc Israelpac churicunaca quiquin familiacunandi yaicurca. 2Paicunaca: Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad, Asermi carca. 5Jacobopac tucui aillucunaca canchis chungami carca. Joseca ñami Egiptopi causacurca.

6Josepish, paipac huauquicunapish, tucui paipac aillucunapish huañurcami. 7Ashtahuanpish israelcunaca mirarishpa achcayashpami, tucui llactacunapi jundashpa, sinchi tucurca.

8Quipataca Egiptopica mushuc mandacmi tiyarca. Paica Josetaca mana ricsircachu. Chaimantami chaipi causaccunataca: 9«Riquichic, israelcunaca ñucanchicta atishpa, ashtahuan achcami. Ñucanchicta yalli sinchicunami. 10Paicuna ama yalli mirarichunca, allita yuyarishpa imata ruhuanami canchic. Paicunaca ñucanchic macanacucucpi, ñucanchicta piñaccunahuan tucushpa, ñucanchicta atishpa, ringacunallami» nirca.

11Chaimantami paicunataca sinchita trabajachishpa llaquichichun, mandaccunata churarca. Shinami paicunaca sinchita trabajachishpa Pitón, Ramesés llactacunata shayachirca. Chai llactacunapimi Faraonca granota tandachirca. 12Chashna paicunata ashtahuan llaquichicca, ashtahuanmi mirashpa catirca. Chaimantami Egipto runacunaca israelcunata manchashpa, 13ashtahuan sinchita trabajachishpa llaquichirca. 14Chashnami ladrillota ruhuangapac turuta ruhuachishpa, shuctac trabajocunata ruhuachishpa, yallita llaquichirca. 15Shinallatac Egipto llactata jatun mandacca Israelmanta Sifra huarmi, Fúa comadronacunataca:

16—Ima horas cancuna Israel huarmicunata sajuarichicucpi, cari huahua huacharicpica huañuchinguichic. Cutin huarmi cacpica, saquinguichiclla— nirca.

17Shina mandacpipish, comadronacunaca Diosta manchashcamantami Egipto llactata jatun mandac nishcata mana ruhuashpa, cari huahuacunataca mana huañuchishpa saquircalla. 18Chaimantami Egipto llactata jatun mandacca comadronacunata cayachishpaca:

—¿Imamantatac cari huahuacunataca mana huañuchishpa saquircanguichic?— nishpa rimarca.

19Shina nicpimi, comadronacunaca Faraontaca:

—Israel huarmicunaca mana Egipto huarmicuna shinachu. Paicunaca sinchi huarmicunami. Chaimantami ñucanchic paicunapacman manarac chayacpi, paicunallatac sajuarincuna— nirca.

20Diosca comadronacunahuanmi carca. Israelcunaca ashtahuan achcayashpa, yallita sinchiyashpami catirca. 21Chai comadronacunaca Diosta manchacmi carca. Chaimantami paicunamanpish Diosca aillucunata curca.

22Shina cacpimi, Faraonca tucui llactapi causaccunata mandashpaca: «Cari huahua huacharicpica, Nilo yacupi shitaichic, cutin huarmi cacpica, saquinguichiclla» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index