Search form

ÉXODO 10

Langostacunahuan llaquichishcamanta

1Mandac Diosca Moisestaca:

—Faraonpacman ri. Ñuca mancharinacunata ruhuaclla cashcata paicunaman ricuchingapacmi, paitapish, paita serviccunapac shunguta sinchiyachircani. 2Shinallatac cai Egiptopi imata ruhuashcata huahuacunamanpish, nietocunamanpish parlachunmi cashnaca ruhuarcani. Ñucaca Mandac Dios cashcata yachachunmi paicunapac chaupipi mancharinacunata ruhuashpa ricuchishcani— nirca.

3Chaimantami Moisespish, Aaronpish Faraonpacman rishpaca:

—Mandac Diosca israelcunataca: “¿Maicamantac ñuca ñaupapi mana cumurishpa, jatun tucugringui? Ñuca acllashcacuna ñucata servingapac richun saqui, ama jarcaichu. 4Paicunata mana cacharicpica, cayallatami langostacunata tucui cambac llactapi jundachisha. 5Cai langostacunami tucui allpata tapanga. Allpaca mana ricuringachu. Rundumanta puchushca asha granotapish, maijan saquirishca yuracunatapish tucuimi tucuchinga. 6Can mandashpa tiyana huasipipish, canta serviccunapac huasipipish, tucui Egipto runacunapac huasicunapipish jundangami. Cambac taitacuna, cambac ailucuna tiyai punzhamanta pacha cunancaman jaicapi mana ricushcatami ricunguichic” ninmi ningui— nirca.

Moisesca Faraonman chaita huillashcahuanmi muyurishpa, chai huasimanta rircalla. 7Chaita uyashpami, Faraonta serviccunaca:

—¿Ima horascamantac cai runaca ñucanchictaca llaquichishpa catigrin? Cai runacunata paicunapac Mandac Diosta servigrichun cachai. Tucui Egipto tucuricushcataca, ¿manachu ricungui?— nirca.

8Chaimantami Faraonca cutinllatac Moisestapish, Aarontapish cayachishpaca:

—Cancunata Mandac Diosta servingapac richic. Shina cacpipish, ¿maijancunallatac rigringuichic?— nirca.

9Shina nicpimi Moisesca:

—Ñucanchic Mandac Diosta cushichina jatun fiesta cashcamantaca huahuacunandi, yuyaccunandi, churicunandi, ushicunandimi rina canchic. Shinallatac ovejacunatapish, vacacunatapish tucuimi apana canchic— nirca.

10Shina nicpimi Faraonca:

—Mandac Dios cancunahuan cacpipish, ¿ima shinatac cancunataca huahuacunandi richun saquishayari? ¡Cancunaca mana allitami yuyarishcanguichic! 11¡Mana chai shinaca cangachu! Mandac Diosta servigrishun nishpaca, caricunalla richic— nirca.

Faraonca chashna nishpaca, paipac ñaupamanta llucchishpa, cachachunmi mandarca. 12Chaimantami Mandac Diosca Moisestaca:

—Egipto llactata tucui langostacuna llucshishpa tapachun, Egipto allpa jahuata cambac maquita alzai. Shina ruhuacpica, rundumanta puchushca granotapish, tucui yuracunatapish tucuimi tucuchinga— nirca.

13Shina nicpimi, Moisesca Egipto llacta jahuata maquita alzarca. Shina ruhuacpimi, Mandac Diosca inti llucshina ladomanta tucui tuta, tucui punzha huairata cacharca. Cayandi tutamantaca inti llucshina ladomanta shamuc huairaca langostacunatami apamurca. 14Chai langostacuna llucshishpami, tucui Egipto llactata taparca. Cashna langostacunaca jaicapi mana tiyashcachu, shinallatac manatac tiyangachu. 15Chashna tucui Egipto llactata tapacpimi, allpaca pura saquirirca. Chai langostacunaca rundumanta saquirishca quihuatapish, maijan yuracunapi saquirishca granotapish tucuimi tucuchirca. Egipto llactapica quihuapish, yurapish verdinllaca maipi mana saquirircachu.

16Chaimantami Faraonca utca Moisestapish, Aarontapish cayachishpaca:

—Ñucaca cancunata Mandac Dios-huanpish, cancunahuanpish juchallishcani. 17Ñuca juchallishcataca cai cutinllapish perdonaichic. Cai huañuchic llaquita anchurichun, cancunata Mandac Diosta mañaichic— nirca.

18Shina nicpimi, Moisesca Faraonpac ñaupamanta llucshishcahuan Mandac Diosta mañarca. 19Shinami Mandac Diosca inti yaicuna ladomanta huairata sinchita cachashpa, tucui langostacunata anchuchishpa, Puca Cuchapi shitarca. Shina ruhuacpica, shuc langostallapish Egipto llactapica mana saquirircachu. 20Shina cacpipish, Mandac Diosllatac Faraonpac shunguta sinchiyachicpimi, israelcunataca mana richun saquirca.

Punzhata tutayachishpa llaquichishcamanta

21Mandac Diosca Moisestaca:

—Tucui Egipto llactapi yalli pura tucuchun, maquita huichaiman alzai. Chai purataca maquihuanpish tuparinallami canga— nirca.

22Shina nicpimi, Moisesca maquita huichaiman alzarca. Shina alzacpica, tucui Egipto llactapimi quimsa punzhacaman yalli pura tucurca. 23Quimsa punzhacamanmi caishuc chaishucpish mana ricui pudircacuna. Shinallatac maiman mana cuyuri pudirca. Ashtahuanpish israelcunaca sumac achicpimi puricurca.

24Chaimantami Faraonca Moisesta cayachishpaca:

—Richic, cancunata Mandac Diosta servigrichic. Cancunapac huahuacunatapish pushashpa richic. Ashtahuanpish cancunapac ovejacunatapish, vacacunapish caipi saquinguichic— nirca.

25Shina nicpimi Moisesca:

—Ñucanchic Mandac Diosman animalta huañuchishpa rupachishpa cuchunca, canmi cuna cangui. 26¡Ñucanchicca animalcunatapish apanami canchic! Millmallatapish mana saquinachu canchic. Chai animalcunamantami maijanta cashpapish ñucanchicta Mandac Diosmanca cuna canchic. Ñucanchicta Mandac Diosman maijan animalcunallata huañuchishpa cunataca, chaiman chayashpami yachashun— nirca.

27Shina cacpipish, Mandac Diosllatac Faraonpac shunguta sinchiyachicpimi, israelcunataca mana cacharirca. 28Faraonca Moisestaca:

—¡Ñucapac ñaupamanta anchuri! Ima punzhami ñucapac ñaupaman cutin shamungui, chai punzhami huañungui. Chaimanta ñucapac ñaupamanca, pacta shamunguiman— nirca.

29Shina nicpimi Moisesca:

—Allitami nishcangui. Cunanmanta quipaca cambac ñahuitaca manatac ricushachu— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index