Search form

ÉXODO 11

Punta churicunata huañuchinata huillashcamanta

1Mandac Diosca Moisestaca:

—Faraontapish, Egiptopi causaccunatapish yallita llaquichinaracmi cani. Chashna llaquichicpimi cacharinga. Ashtahuanpish paillatacmi llucchishpa cachanga. 2Chaimanta israelcunataca vecinocunaman, vecinacunaman curimanta, cullquimanta ruhuashca alajacunata mañachun mandai— nirca.

3Mandac Diosca israelcuna mañashcata cuchunmi, Egipto runacunamanca cuyac shunguta curca. Moisespish tucui Egipto llactapi alli nishcami carca. Faraonta serviccunapacpish, tucui gentecunapacpish alli nishcami carca.

4Moisesca Faraontaca:

—Mandac Diosca: “Chaupi tuta shinatami Egipto llacta chaupita pasasha. 5Chashna pasacpica, Egipto llactapi tucui punta churicunami huañunga. Faraón tiyarinapi tiyac churimanta callarishpa, rumipi cutac huarmicunapac punta cari huahuacamanmi huañunga. Punta huacharishca animalcunapish huañungami. 6Chaimantami tucui Egipto llactapi causaccuna caparishpa huacanga. Chashna llaquica jaicapi mana tiyashcachu, shinallatac quipamanpish mana tiyangachu. 7Chashna cacpipish, israelcunapurapica allcullapish animalcunata, gentecunata sintishpa, mana ladrangachu. Chaica, Mandac Dios ñucaca Egipto runacunamanta israelcunata chicanyachic cashcata yachachunmi cashnaca tucunga” ninmi. 8Chaimantami tucui canta serviccunaca ñucapac ñaupapi cungurishpa: “Canpish, tucui canta caticcunapish llucshishpa richic” ninga. Chai quipaca ñucapish rishallami— nirca.

Shina nishpami, Moisesca yallita piñarishpa, Faraonpacmanta llucshirca. 9Chaimantami Mandac Diosca Moisestaca:

—Faraonca manatac uyangachu. Chaica, Egiptopi ñucaca ashtahuan mancharinacunata ruhuashpa ricuchichunmi cashnaca tucunga— nirca.

10Moisespish, Aaronpish Faraonpac ñaupapi mancharinacunatami ruhuashpa ricuchirca. Mandac Diosllatac Faraonpac shunguta sinchiyachicpimi, israelcunataca chai llactamanta mana cacharirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index