Search form

ÉXODO 12

Pascua micuita ruhuashcamanta

1Mandac Dios Egiptopi Moisestapish, Aarontapish rimashpaca:

2—Cai quillami cancunapacca huata callari quilla canga. 3Tucui tandanacushca israelcunataca: “Cai quilla chunga punzhapica, tucui huasi familiacuna shuc maltón ovejata japichic. 4Maijan huasi familia ashalla cashpa, shuc ovejata mana tucui micui pudishpaca, cuchullapi causacmanmi chaupina can. Familiacuna mashnapura cashcata ricushpami, micuna pactaipacta cuna can. 5Chaitaca ovejamanta, mana cashpaca chivomanta cashpapish ima mana tucushca, shuc huatayuc cari animalta japichic. 6Chai animaltaca quilla chunga chuscu punzhacamanmi charicuna canguichic. Chai punzha chishipimi, tandanacushca israelcunaca chai animalta huañuchinga. 7Chai animalpac asha yahuarta japishpa, mai huasicunallapi chai aichata micugrin, chai huasi pungu ishcai caspicunapi, pungu umbralpi cahuichic. 8Chai tutallatac chai aichataca ninapi cusashpa, levadura illac tandahuan, jayac quihuahuan micunguichic. 9Chai aichataca chahuatapish, yacuhuan yanushcatapish mana micunachu, ashtahuanpish umacunandi, chaquicunandi, chunzhullindi ninapi cusashpami micuna canguichic. 10Cayapacca mana puchuchinachu. Imapish puchucpica, ninapi rupachinguichic. 11Cancunaca chai aichataca alli chumbillishpa, chaquipipish ushutata churarishpa, shinallatac tauna caspita maquipi apashpami, utcashpa micuna canguichic. Chai tutaca Mandac Dios ñucapac Pascuami canga. 12Chai tutallatacmi Egipto llactapi punta huacharishca cari huahuacunatapish, animalcunatapish huañuchishpa pasasha. Chai llactapi causaccunapac dioscunatapish tucuimi llaquichisha. Ñucaca Mandac Diosmi cani. 13Cancuna causacuc huasicunaca yahuarhuan cahuishpa señalashcami canga. Chaita ricushpaca, cancunapac huasita pasashallami. Egipto llactapi causaccunata huañuchishpapish cancunataca mana llaquichishachu. 14Chai punzhaca cancunapac yuyarinami canga. Chaimantami tucui cancunapac huahua huahuacunapish yuyarishpa, Mandac Diosman fiestata ruhuanga. Cai mandashcaca huiñaipacmi canga.

15Canchis punzhatami levadura illac tandata micuna canguichic. Chai callari punzhapica huasipica ima levadurata mana charinachu canguichic. Maijanpish chai callari punzhamanta tucuri punzhacaman levadurahuan micucca israelpuramanta anchuchishcami canga. 16Callari punzhapish, tucuri punzhapish Mandac Diospaclla tandanacuitami ruhuana canguichic. Chai punzhapica mana trabajanachu canguichic. Micunallatami ruhuana canguichic. 17Levadura illac tandata micuna fiestataca ruhuanami canguichic. Chai punzhami cancunataca Egiptomanta llucchircani. Chaimantami chai punzha chayamucpica, cancunapac huahua huahuacunapish huiñaita chai fiestata ruhuana can. 18Callari quilla, chunga chuscu punzha chishimanta ishcai chunga shuc punzha chishicamanmi levadura illac tandata micuna canguichic. 19Canchis punzhacamanmi cancunapac huasipica levaduraca mana tiyana can. Maijanpish micunata levadurahuan micucpica, cancunapura cacpipish, shuctac llactamanta shamushca cacpipish, israelpuramanta anchuchishcami canga. 20Imatapish levadurahuanca ama micunguichicchu. Maipi causashpapish levadura illac tandata micunguichic” ningui— nirca.

21Moisés tucui israelcunata pushac yuyaccunata tandachishpaca:

—Cancunapac huasi familiahuan Pascua fiestata ruhuashpa micungapac, shuc maltón ovejata apamushpa huañuchichic. 22Chai yahuarta bateacunapi churashpa, hisopo ramata yahuarpi satishpa, huasi pungu ishcai caspicunapi, pungu umbralpi cahuinguichic. Cancunapuramantaca achicyangacamanmi ucumantaca mana llucshina canguichic. 23Mandac Diosca Egipto runacunata huañuchishpa pasacushpaca, cancunapac huasi pungu ishcai caspicunapi, pungu umbralpi yahuar cahuishcata ricushpaca pasangallami. Shinallatac cancunapac huasicunapi huañuchic yaicushpa, llaquichichunpish mana saquingachu. 24Cai mandashcataca cancunapish, cancunapac huahua huahuacunapish tucui causaipimi cazuna canguichic. 25Mandac Dios cancunaman cusha nishca llactaman yaicushpaca, cai mandashcata pactachinguichic. 26Cancunapac huahuacunaca: “¿Imapactac caitaca ruhuanguichic?” nishpa tapucpica: 27“Mandac Dios Egipto runacunata huañuchicushpaca, israelcunapac huasicunamanca mana yaicushpami pasarcalla. Shina mana huañuchishpa, ñucanchicta quishpichishcamantami Pascua fiestata ruhuanchic” ninguichic— nirca.

Cai nishcacunata yuyarishpami, israelcunaca Mandac Diosta allimari cangui nishpa cumurirca. 28Chai quipaca israelcunaca Mandac Dios Moisestapish, Aarontapish mandashca shinallatacmi tucui ruhuarca.

Punta huacharishcacuna huañuchishcamanta

29Mandac Diosca Egipto llactapi punta huacharishca cari huahuacunataca chaupi tutami huañuchirca. Faraón mandashpa tiyana huasipi causacuc punta churimanta callarishpa, carcelpi tiyaccunapac punta churicunacamanmi huañuchirca. Shinallatac punta huacharishca cari animalcunatapish tucuimi huañuchirca. 30Chai tuta Faraonpish, tucui paita serviccunapish, shinallatac tucui Egipto runacunapish jataricpica, shuc huasillapipish huañuicunaca mana illarcachu. Chaimantami jatun huacanacui tiyarca. 31Chai tutami Faraón Moisestapish, Aarontapish cayachishpaca:

—¡Cancunapish, israelcunapish ñuca llacta chaupimanta llucshi richic! Cancuna nishca shina, Mandac Diosta servingapac richiclla. 32Cancuna nishca shina cancunapac ovejacunatapish, vacacunatapish apashpa richiclla. Shinallatac ñucamantapish mañanguichic— nirca.

33Tucui Egipto runacunaca: «Tucuimari huañugrinchic» nishpami, tucui israelcunata utca llucchishpa cacharca. 34Ashtahuanpish israelcunaca paicunapac tanda chapu manarac punguillicpimi, churanacunapi pillushpa, hombrospi churashpa aparca. 35Israelcunaca Moisés mandashca shinallatacmi, Egipto runacunaman cullquimanta, curimanta ruhuashca charinacunatapish, churanacunatapish mañarca. 36Mandac Dios pai acllashca israelcunata cuyachun, Egipto runacunata cuyac shunguta ruhuashcamantami israelcuna imata mañashcata curcacuna. Chashnami Egiptomanta quichushpa aparcacuna.

Egiptomanta israelcuna llucshishcamanta

37Israelcunaca Ramesesmantaca Sucotmanmi llucshirca. Paicunapac huahuacunata mana yupashpa, chaquillahuan riccunallami sucta patsac huaranga carca. 38Shuctac gentecunapish achcami paicunahuan llucshirca. Shinallatac ovejacunapish, huagracunapish achcami carca. 39Egiptomanta apashca, levadura illac chapucunatami tandata ruhuashpa cusashpa micurca. Egiptomanta utca llucchishpa cachacpimi, paicunaca micunatapish mana allichi pudirca.

40Israelcunaca Egiptopica chuscu patsac quimsa chunga huatatami causarca. 41Chuscu patsac quimsa chunga huata tucucpica, chai punzhallatacmi Mandac Diosca israelcunata tandachishpa, Egiptomanta llucchirca. 42Egiptomanta israelcunata llucchishcamantami chai tutaca Mandac Diosta yuyarina tuta can. Tucui israelcunapac huahua huahuacunami chai tutataca Mandac Diosta yuyarishpa, pactachina can.

43Mandac Dios Moisestapish, Aarontapish rimashpaca:

—Pascua punzhataca cashnami ruhuana canguichic. Pascua micuitaca shuctac llactamanta caccunaca mana micunachu can. 44Maijan cancunapac cullquihuan randishca serviccunaca circuncisionta ruhuashca quipaca micui pudinmi. 45Caru llactamanta caccunapish, chai llactapi trabajashpa causaccunapish mana micunachu can. 46Chai micunataca huasimanta mana llucchishpami huasillapi micuna canguichic. Shinallatac tullucunatapish mana paquinachu canguichic. 47Tucui tandanacushca israelcunami caitaca ruhuanga. 48Maijanpish shuctac llactamanta shamushpa, cancunahuan causacushpa, Mandac Diospac Pascua micuita micusha nishpaca, tucui caricunami circuncisionta ruhuana can. Chai quipami israelcunapura tucushpa, Pascua micuita micunga. Maijanpish mana circuncisionta ruhuashca cashpaca, mana micunachu can. 49Cai mandashcallatatacmi cai llactapi causaccunamanpish, shuctac llactamanta shamushpa, cancunahuan causaccunapish pactachina can— nirca.

50Israelcunaca Mandac Dios Moisestapish, Aarontapish mandashca shinallatacmi tucuita ruhuarca. 51Chai punzhallatacmi Mandac Diosca israelcunataca tandachishpa Egiptomanta llucchirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index