Search form

ÉXODO 13

Punta huahuacuna Diospacta ruhuana cashcamanta

1Mandac Dios cutin Moisesta rimashpaca:

2—Israelpurapi punta huacharishca cari huahuacunata ñucapacllata ruhuanguichic. Tucui punta huacharishca gentecunapish, animalcunapish ñucapacllami— nirca.

3Shina nicpimi, Moisesca israelcunataca:

—Egiptopi huatashca shina causacushcamanta Mandac Dios llucchishca punzhata yuyaringuichic. Chai llactamantaca paipac poderhuanmi llucchirca. Chaimanta chaita yuyarishpa, levadura illac tandata micunguichic. 4Cancunaca Abib quillami llucshinguichic. 5Mandac Dios cancunapac taitacunaman cushami nishca cananeocunapac, heteocunapac, amorreocunapac, heveocunapac, jebuseocunapac allpaman paillatac apacpica, chai punzhata yuyarishpa, levadura illac tandata micunguichic. Chai llactapica lechepish, mishquipish yacu shinami callpacun. 6Canchis punzhata levadura illac tandata micunguichic. Chai canchisniqui punzhaca Mandac Diospac fiestami canga. 7Canchis punzhatami levadura illac tandata micunguichic. Imatapish ama levadurahuan micunguichicchu. Tucui Israel llactapimi levaduraca mana tiyana can. 8Chai punzhapi huahuacunaman parlashpaca: “Caitaca Mandac Dios Egiptomanta llucchimushcata yuyarishpami ruhuanchic. 9Mandac Diosca paipac poderhuanmi Egiptomanta llucchirca. Chaimantami Mandac Diospac mandashcacunata punzhanta rimachunca maquipi, ñahuipi señal canga. 10Chaimantami cai fiestataca huatanta ruhuanchic” ninguichic.

11Mandac Dios cancunamanpish, cancunapac taitacunamanpish cusha nishca cananeocunapac allpaman pushacpi, chaipi cashpaca, 12punta huacharishca churicunatapish, animalcunatapish Mandac Diosman cunguichic. 13Punta huacharishca burropac randica, shuc ovejata cunguichic. Mana ovejata cushpaca, chai burrotaca huañuchinguichic. Punta huacharishca churimantapish imallata cunguichic. 14Quipa punzhapi cancunapac huahuacuna: “¿Imatac caica?” nishpa tapucpica: “Mandac Diosmi, paipac poderhuan Egiptopi huatashca shina, llaquita causacushcamanta llucchimurca. 15Faraón israelcunata mana cacharisha nishpa, shungu sinchiyacpimi, Mandac Diosca tucui punta huacharishca gentecunatapish, animalcunatapish huañuchirca. Chaimantami tucui punta huacharishca cari animalcunataca Mandac Diosman cunchic. Cutin punta cari huahuamantaca, punta huacharishca animaltami cunchic” ninguichic. 16Mandac Dios paipac poderhuan Egiptomanta llucchirca. Chaimantami caica cambac maquipipish, ñahuipipish yuyaringapac señal canga— nirca.

Puyu israelcunata pushashcamanta

17Faraón israelcunata cacharicpica, Mandac Diosca ñan cuchulla cacpipish mana filisteocunapac allpa chaupitachu pusharca. Chaica: «Macanacuicuna tiyacpi, manchashpa Egiptoman cutisha ningacunami» yuyashpami mana chaita pusharca. 18Chaimantami chai shitashca pamba ñanta rishpa, ashtahuan caruta muyushpa, Puca Cuchata pusharca.

Israelcuna Egiptomantaca allichirishpami llucshirca. 19Joseca israelcunataca: «Diosca cancunata ayudangapac shamungami. Cancuna cai llactamanta rishpaca, ñuca tullucunata apanguichic» nishpami ari nichishca carca. Chaimantami Moisesca Josepac tullucunatapish apashpa llucshirca.

20Sucotmanta israelcuna llucshishpaca, shitashca pamba cuchupi cac Etampimi saquirirca. 21Tutapish, punzhapish israelcuna purishpa catichunmi, Mandac Diosca punzhaca suni puyuhuan, tutaca suni ninahuan ñaupashpa achicyachishpa pusharca. 22Israelcunamantaca punzhaca suni puyu, cutin tutaca suni ninaca jaicapi mana anchurircachu.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index