Search form

ÉXODO 14

Israelcuna Puca Cuchata pasashcamanta

1Mandac Diosca Moisestaca:

2«Israelcunataca: “Cutishpa, Baal-zefón llacta chimbapurapi cac, mama cuchahuan Migdol llactahuan chaupipi cac Pi-hahirot llacta cuchupi carpa huasita shayachishpa tiyarichic. 3Faraonca israelcunamantaca: ‘Chai shitashca pambapimi chingarishpa, maita mana ri pudishpa puricunga’ ninga” ningui. 4Ñucami cancunata catichun, Faraonpac shunguta sinchiyachisha. Chaimantami Faraontapish, paipac tucui soldadocunatapish tucuchishpa, ñuca jatun cashcata ricuchisha. Shina ruhuacpimi, Egipto runacunaca ñucataca Mandac Dios cashcata yachanga» nirca.

Chashna nicpica, paicunaca chashnami ruhuarcacuna. 5Egipto llactata jatun mandacman israelcuna miticushpa rishcataca huillacpica, Faraonpish, paita serviccunapish shungupi piñarishpami: «¿Ima nishpatac israelcuna ñucanchicta servinata saquishpa richunca saquircanchic?» nirca. 6Chaimantami Faraonca tucui carretata caballocunapi aisachishpa, paipac soldadocunatapish tandachirca. 7Sucta patsac carretatami acllashpa tandachirca. Egiptopi tiyac tucui carretacunata tandachishpa, chaipi soldadocunata mandaccunata tiyachishpami pusharca. 8Mandac Dios Egipto llactata jatun mandac Faraonpac shunguta sinchiyachicpimi, israelcunata catirca. Ashtahuanpish israelcunaca imatapish mana manchashpami llucshirca.

9Egipto runacunaca tucui caballocunahuanmi catirca. Faraonpac carretacunahuanpish, caballopi ric soldadocunahuanpish catishpami, israelcunataca cucha ladopi cac Pi-hahirot llacta Baal-zefón chimba ladopi japirca.

10Jatun mandac Faraón ña cuchuyacucpimi, israelcunaca huichailla ricushpa, Egipto runacuna caticucta ricurca. Chaimantami mancharishpa Mandac Diosta caparishpa, 11Moisestaca:

—Cai shitashca pambapi ñucanchic huañungapacca, ¿manachu Egiptopi panteonca tiyarca? ¿Caita ruhuangapacchu Egiptomanta llucchimurcangui? 12¿Manachu Egiptopi cashparac ñucanchicca: “Caipi servishpa causachun saquilla” nircanchic? ¡Cai shitashca pambapi huañunapac randica, Egiptopi servishpa causanami alli canman carca!— nirca.

13Shina nicpimi, Moisesca israelcunataca:

—¡Ama manchaichicchu! Sinchiyashpa, Mandac Dios ima shina quishpichicta ricuichic. Cunanllami Egipto runacunata ricucunguichic. Cutinca manatac ricunguichicchu. 14Cancunaca chaillapi caichic. Mandac Diosmi cancunamanta macanacunga— nirca.

15Chaimantami Mandac Diosca Moisestaca:

—¿Ima nishpatac ñucata caparicungui? Israelcunataca richiclla ni. 16Israelcunaca cucha chaupita chaquishca allpata shina pasachun, cambac varata alzashpa, cuchata ishcaipi chaupi. 17Ñucami Egipto runacunapac shunguta sinchiyachisha. Chashna ruhuacpimi, cancunata catishpa, cuchaman yaicunga. Chashna yaicucpimi, Faraontapish, paipac soldadocunatapish, tucui paipac carretacunapi tiyaccunandi tucuchishpa, ñuca jatun cashcata ricuchisha. 18Chashna Faraontapish, carretacunatapish, caballopi ric soldadocunatapish tucuchicpimi, Egipto runacunaca ñucataca Mandac Dios cashcata yachangacuna— nirca.

19Tandanacushca israelcunapac ñaupata ric Diospac angelca ladoyashpami, paicunapac huashaman tucurca. Shinallatac israelcunapac ñaupata ric suni puyupish ladoyashpami huashaman tucurca. 20Shinami chai suni puyuca Egipto runacunapac shinallatac israelcunapac chaupita ricurca. Chai puyuca Egipto runacunamanca amsami ricurirca. Cutin israelcunamanca achicmi ricurirca. Chaimantami Egipto runacunaca israelcunapacman mana cuchuyai pudirca.

21Moisés maquita cucha jahuata chutacpica, Mandac Diosmi inti llucshina ladomanta sinchi huairata tucui tuta cachashpa, cuchataca ishcaipi chaupirca. Cuchaca ishcaipi chaupishpa, chaquishca allpa shina tucushpa saquirirca. 22Cucha allimanpish, lluquimanpish pircashca shina chaupiricpimi, israelcunaca chaupi cuchaman yaicurca.

23Egipto runacunapish, paicunapac tucui caballocunapish, carreta aisashcacunapish, caballopi ric soldadocunapish catishpami yaicurca. 24Tutamanta ña pacaricucpimi, Mandac Diosca Egipto runacunataca suni nina puyumanta ricushpa, tucuita muspachirca. 25Paicunapac carretacunamanta ruedacuna llucchishpa caticpimi, mana ri pudirca. Chaimantami Egipto runacunaca:

—¡Israelpac ñaupamanta callpashunchic, Mandac Diosmari paicunamanta ñucanchic-huan piñarishpa, macanacui callarin!— nirca.

26Mandac Diosca Moisestaca:

—Egipto runacunatapish, carretacunatapish, caballopi ric soldadocunatapish yacu tapachun, cambac maquita cucha jahuata chutai— nirca.

27Chaimantami Moisesca maquita cucha jahuata chutarca. Shina chutacpimi, pacaricucpi yacuca cutishpa, Egipto runacuna atishpa ricucpipish, tucui taparca. Chashnami Mandac Diosca Egipto runacunata chaupi yacupi ucuyachirca. 28Chashna catishpa ricucpimi, cutin yacu tandarishpa carretacunatapish, caballopi ric soldadocunatapish, Egipto runacunatapish tucui taparca. Paicunamantaca shucllapish mana saquirircachu. 29Ashtahuanpish israelcunaca chaquishca allpa shinatami, cucha chaupita pasarca. Yacuca allimanpish, lluquimanpish pirca shinami carca.

30Chashnami Mandac Diosca chai punzhapica israelcunata Egipto runacunapac maquimanta quishpichirca. Egipto runacuna yacu patapi huañushca siricuctami israelcunaca ricurca. 31Israelcunaca Mandac Dios Egipto runacunata tucuchishpa, jatun cashcata ricuchicpimi, Mandac Diostapish, paita servic Moisestapish crircacuna.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index