Search form

ÉXODO 15

Moisés Mandac Diosta cantashcamanta

1Chaimanta Moisespish, israelcunapish Mandac Diosta cantashpaca:

«Mandac Diosca caballocunatapish,

caballopi ric soldadocunatapish,

cuchapi shitashpami

paipac poderta ricuchishca.

¡Chaimantami paita alli nisha!

2Mandac Diosca ñucata

sinchiyachicmi.

Ñuca cantana Diosmi.

Paimi ñucata quishpichirca.

¡Paimi ñuca Dios, paitami cantasha!

¡Paimi ñuca taitapac Dios!

¡Paitami jatunyachisha!

3Mandac Diosca jatun macanacucmi.

¡Paipac shutica Mandac Diosmi!

4Faraonpac alli soldadocunatapish,

carretacunatapish

cuchapi shitarcami.

Puca Cuchapi ucuyachircami.

5¡Rumi shinami cuchapi ucuyarca!

Achca ucu yacumi paicunata taparca.

6Mandac Dioslla, cambac alli maquica

jatun poderyuc sinchi maquimi.

Mandac Dioslla, cambac maquihuanmi

piñaccunataca tucuchircangui.

7Cambac poderhuanmi canta

piñaccunata tucuchircangui.

Can piñarishpaca chaquishca

pangata shinami tucuchircangui.

8Can pucushca samaihuanmi

yacuca ishcai ladoman tandarirca.

Huacyacuc mama cuchaca

mana cuyurishpami casilla saquirirca.

Ucu cuchaca rumi shinami saquirirca.

9Ñucanchicta piñaccunaca:

“Cati rishpa japishunmi,

paicunamanta quichushpa,

chaupinacushpa cushicushunmi.

Espadata llucchishpami, ñucanchic

maquihuan tucuchishun” nircami.

10Mama cuchata pucushpami,

paicunata tucuita taparcangui.

¡Llashac plomo shinami,

timbucuc yacupica ucuyarca!

11Mandac Dioslla,

¿pitac can shinaca tiyanyari?

Can shina jucha illac Dios shinaca,

¿pitac tiyanyari?

Mancharinacunata ruhuashcamanta

alli nina Diosca, ¿pitac tiyanyari?

Canca sumaimanata ruhuacmi cangui.

12Cambac alli maquita chutacpica,

allpapish millpurcami.

13Can llucchishca gentecunata

cuyaihuanmi pushangui.

Cambac jucha illac llactamanmi

cambac poderhuan pushangui.

14Gentecunaca chaita uyashpaca

chucchungami.

Filisteocunaca yallita manchangami.

15Edom llactata mandaccunaca

yuyai illacmi tucunga.

Sinchi Moab gentecunapish

manchaihuan chucchungami.

Canaanpi causaccunaca mancharishpami

imata mana ruhuai pudinga.

16Mandac Dioslla, paicunataca

manchaipish, chucchuipish japingami.

Cambac sinchi maquihuan ruhuashcata

ricushpa rumi shina upami saquiringa.

Chashnami can acllashcacuna

pasangacaman saquiringa.

17Mandac Dioslla, can cushca urcuman

chayachishpami, tarpuc shina churangui.

Can causangapac allichishca

llactamanmi chayachingui.

Cambac maquihuan shayachishca

sumac huasimanmi pushangui.

18Mandac Diosca huiñaita

mandacungallami» nirca.

Moisespac pani María cantashcamanta

19Jatun mandac Faraón carretacunahuan, caballopi ric soldadocunahuan yacuta pasacucpimi, Mandac Diosca cucha yacuta cutichimushpa, tucuita ucuyachirca. Cutin israelcunaca cucha chaupitami chaquishca allpata shina pasarca. 20Chaimantami Aaronpac pani, Dios ima nishcata huillac Mariaca panderota japishpa, huactai callarirca. Shina huactacpica, shuctac huarmicunapish cantashpa, danzashpami catirca. 21Chashna cantashpami Mariaca:

«¡Mandac Diosta cantaichic!

¡Paipac poderta ricuchishpami,

carretacunapish, caballocunapi

ric soldadocunatapish,

cuchapi ucuyachirca!» nirca.

Jayac yacumanta

22Moisés israelcunata Puca Cuchamanta pushacpica, shitashca Shur pambamanmi rirca. Chaipi quimsa punzhata, maipi yacuta mana tarishpa puricushpami, Mara pambaman chayarca. 23Chaiman chayashpapish Mara yacu jayac cashcamanta, mana ubiai pudishpami, Marata shutichirca.

24Chaimantami israelcuna piñarishpa, Moisestaca:

—¿Ima yacutatac ubiashun?— nishpa rimarirca.

25Chaimantami Moisesca Mandac Diosta caparishpa mañarca. Shina mañacpica, Mandac Diosca shuc yuratami ricuchirca. Moisés chai yurata yacupi shitacpica, yacuca mishquiyarcami.

Chaipimi Mandac Diosca pai mandashcacunatapish, quillcashcacunatapish curca. Shinallatac cazucta, mana cazuctapish ricurcami. 26Chaimantami paica:

—Cancunapac Mandac Dios ñuca nishcata alli uyashpa, ñucapac ñaupapi imatapish cashcata ruhuashpa, mandashcacunata tucui shunguhuan uyashpa, tucuita ruhuacpica, Egiptoman cachashca shina ungüitaca cancunapacmanca manatac cachashachu. Ñucaca cancunata jambic Mandac Diosmi cani— nirca.

27Chaimantaca Elim pambamanmi chayarca. Chaipica chunga ishcai tucyac yacupish, canchis chunga ramos yurapishmi tiyarca. Chai yacu ladopimi carpacunata shayachishpa tiyarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index