Search form

ÉXODO 18

Jetro Moisesta ricungapac rishcamanta

1Moisespac suegro Jetroca Madianpimi cura carca. Paica Mandac Dios Moisestapish, Dios acllashca israelcunatapish imata ruhuashcata, shinallatac Egiptomanta israelcunata ima shina llucchishcatami yachac chayarca. 2Moisesca paipac huarmi Seforataca paipac taita Jetropacman cachacpimi, Jetroca cushilla Seforatapish, 3Moisespac ishcai churitapish chasquirca. Moisesca: «Cai llactapica pozashpallami causacuni» nishpami, shuc churitaca Gersonta shutichirca. 4Cutin Shuc churitaca: «Ñuca taitapac Diosmari Faraón espadahuan huañuchinamanta quishpichirca» nishpami Eliezerta shutichirca.

5Moisesca shitashca pambapimi Mandac Diospac urcu ladollapi carpata shayachishpa tiyacurca. Chaimanmi Moisespac suegro Jetroca Moisespac huarmindi, Moisespac churicunandi chayarca. 6Chaipimi Moisestaca: “Ñucaca cambac suegro Jetromi cani. Ñucami cambac huarmindi, cambac ishcai churicunandi cambacman shamunchic” nirca.

7Shina nicpimi, Moisesca paipac suegrota tupangapac llucshishpa, cumurishpa mucharca. Shinallatac caishuc chaishuc “Allillachu canguichic” ninacushpami, carpa huasiman yaicurca. 8Moisesca Mandac Dios israelcunaman allita ruhuashpa, Faraontapish, Egipto runacunatapish imata ruhuashcatapish, ñanpi llaquicunata apashcatapish, Mandac Dios ima shina Egiptomanta llucchishcatapish paipac suegroman tucui parlarcami. 9Jetroca Mandac Dios israelcunaman allitami ruhuashpa, Egiptomanta llucchishcata yachashpami yallita cushicurca. 10Chaimantami Jetroca:

—¡Mandac Diosca alli nishca cachun! Paimi cancunataca Egipto runacunapac maquimantapish, Faraonpac maquimantapish llucchirca. Paimi Egipto runacunapac maquimanta cacharichishca. 11Cunanmi, Mandac Diosca tucui dioscunamanta ashtahuan jatun cashcata yachani. Jatun tucushpa, cancunata llaquichiccunatami llaquichishca— nirca.

12Quipaca Moisespac suegro Jetroca animalta huañuchishpa, Diosman cushpa, tucui rupachishpami, shuctac ofrendatapish curca. Aaronpish, tucui israelcunata pushaccunapish Moisespac suegro Jetrohuan Diospac ñaupapi micungapacmi rirca.

Moisés juezcunata churashcamanta

(Dt 1.9-18)

13Cayandi punzhaca Moisesca israelcunapac llaquicunata allichingapacmi tiyarirca. Israelcunaca tutamantamanta chishicaman Moisespac ñaupapi shayacurca. 14Chashna Moisés israelcunahuan tucui imata ruhuacucta ricushpami, paipac suegroca:

—Cai tucui gentecunahuanca, ¿imatatac ruhuacungui? ¿Ima nishpatac canlla cai tucuita ruhuacungui? Cai tucui gentecunaca tutamantamanta chishicamanmi cambac ñaupapi shayacun— nirca.

15Chashna nicpimi, Moisesca paipac suegrotaca:

—Cai gentecunaca Diosman tapungapacmari ñucapacman shamun. 16Paicunaca ima llaquita charishpapish ñucaman huillangapacmi shamun. Chaimantami caishucman chaishucman Dios mandashcatapish, yachachishcatapish ricuchishpa, allichini— nirca.

17Shina nicpimi, Moisespac suegroca:

—Mana chashnachu ruhuana cangui. 18Canpish, canhuan cac gentecunapish shaicunguichicmi. Cai ruhuanacunaca canmanca achca sinchimi. Chaimanta mana canlla ruhuai pudinguichu. 19Ñuca cunashcata uyai. Diospish canta ayudangami. Canca israelcunamanta Dios-huan parlacmi cana cangui. Paicunapac ima llaquitaca Diosman huillai. 20Dios mandashcacunatapish, pai yachachishcacunatapish yachachishpa, ima shina causanata shinallatac imata ruhuanata yachachi. 21Israelcunapuramanta Diostapish manchac, cashcata ruhuac, cullquita japinata mana yalli munac runacunata acllai. Paicunamanta shuccunataca huaranga runata, shuccunataca patsac runata, shuccunataca pichca chunga runata, shuccunataca chunga runata ricuchun churai. 22Paicunami punzhanta ima mana alli tiyacpica allichinga. Ashtahuanpish jatun llaquicuna tiyacpimi, canman huillanga. 23Ñuca nishcata Dios ruhuachun nicpica, canpish samaringuimi, shinallatac israelcunapish cushicushpa paicunapac huasiman ringacunami— nirca.

24Moisesca paipac suegro nishcata uyashpami, pai nishca shinallatac tucuita ruhuarca. 25Moisesca israelcunapuramanta maijan allita ruhuac runacunata acllashpami, shuccunataca huarangata, shuccunataca patsacta, shuccunataca pichca chungata, shuccunataca chungata runata ricuchun churarca. 26Paicunami uchilla llaquicunataca punzhanta allichic carca. Cutin mana allichipac llaquicunatami Moisesman huillagric carca. Cutin uchilla llaquicunataca paicunallatacmi allichic carca. 27Moisés paita “Caya minchacaman” nicpimi, suegroca paipac llactaman cutirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index