Search form

ÉXODO 2

Moisés huacharishcamanta

1Levipac aillupuramanta shuc runami paipac aillumanta shuc huarmihuan cazararca. 2Chai huarmica huicsayuc tucushpami, shuc cari huahuata charirca. Chai huahua sumac cacpimi, quimsa quillata pacashpa charirca. 3Ña mana ashtahuan pacashpa chari pudishpami, canashtata ruhuashpa, yacu ama yaicuchun breahuan, asfaltohuan jahuata cahuirca. Chaipi huahuata churashpami, Nilo yacupi tiyac carrizo ucupi churarca. 4Cutin chai huahuapac panica carullamantami huahua ima tucucta ricucurca.

5Chai yacumanmi Faraonpac ushica armangapac rirca. Pai chai yacupi armacucpica, paita servic solteracunaca yacu patapimi puricurca. Chashna armaricushpami, carrizo ucupi shuc canashtata ricurca. Chaimantami paita servic shuc solterata apamuchun cacharca. 6Faraonpac ushi chai canashtata pascashpaca, shuc huahua huacacuctami ricurca. Chaimantami chai huahuata llaquishpaca:

—Cai huahuaca israelpuramantami— nirca.

7Chaimantami huahuapac panica Faraonpac ushitaca:

—¿Chai huahuata huiñachichun, israelpuramanta shuc huarmita cayagrishachu?— nirca.

8Shina nicpimi, Faraonpac ushica:

—Rilla— nirca.

Shina nicpimi, chai soltera rishpaca, huahuapac mamata pushamurca. 9Faraonpac ushica chai huarmitaca:

—Cai huahuata apashpa huiñachigri. Can huiñachishcamantaca pagashallami— nirca.

Chashna nicpimi, chai huahuapac mamaca apashpa huiñachirca.

10Chai huahua huiñacpica, Faraonpac ushiman cungapacmi apamurca. Paica chai huahuataca quiquin huahua shinatami charirca. Paica: «Cai huahuataca yacumantami llucchircani» nishpami, Moisesta shutichirca.

Moisés Egiptomanta miticushpa rishcamanta

11Moisés ña jatun cashpami, paipac huauqui israelcunata ricungapac rirca. Paica israelcuna yallita sinchi ruhuaicunata ruhuacuctapish, shinallatac Egipto runa shuc Israel runata macacuctapish ricurca. 12Chaimantami paica caita chaita ricushpa, pi mana ricucucpica, Egipto runata huañuchishpa, tiyupi pacarca. 13Cayandi cutinllatac ricungapac llucshishpaca, israelcunapuramanta ishcai runacuna macanacucuctami ricurca. Shina ricushpami llaquichic runataca:

—¿Ima nishpatac cancunapuramanta runata macacungui?— nirca.

14Shina nicpimi, chai runaca:

—¿Pitac cantaca ñucanchicta mandac cachun, juez cachun churarca? ¿Ñucatapish Egipto runata shinatachu huañuchisha ningui?— nirca.

Chaimantami Moisesca: «Chai runata huañuchishcataca ñami yachac chayashca» nishpami, yalli manchaihuan carca.

15Faraonca chashna tucushcata yachashpami, Moisesta huañuchinata yuyarirca. Chaimantami Moisesca Faraonpac ñaupamanta miticushpa, Madián llactapi causangapac rirca. Chaipi causacushpami, yacu jundu ladopi tiyacurca.

16Madián llactapi causac curami canchis ushita charirca. Paicunaca yacuta llucchishpa, rumi bateacunapi jundachishpa, taitapac ovejacunaman ubiachingapacmi shamurca. 17Ashtahuanpish shuctac michiccuna shamushpami, paicunataca chaimanta catishpa cacharca. Chashna ruhuacpimi, Moisesca misashpa solteracunapac ovejacunaman yacuta ubiachirca.

18Chai solteracuna paipac taita Reuelpacman cutimucpi taitaca:

—¿Ima nishpatac utca cutimunguichic?— nirca.

19Shina nicpimi paicunaca:

—Shuc Egipto runami shuctac michiccunamanta misashpa, ñucanchic ovejacunamanrac yacuta llucchishpa ubiachishpa cachan— nirca.

20Chashna nicpimi, Reuelca paipac ushicunataca:

—¿Maipitac chai runaca? ¿Ima nishpatac mana pushamurcanguichic? Richic, micunata carangapac cayamugrichic— nirca.

21Moisés Reuelpac huasipi causangapac saquisha nicpimi, paica paipac ushi Seforahuar cazarachirca. 22Chai huarmica shuc cari huahuatami charirca. Chai huahuataca: «Shucpac llactapi pozashpa causacllami cani» nishpami, Gersonta shutichirca.

23Tauca huatacuna quipami Egipto llactata jatun mandacca huañurca. Israelcunaca sinchi ruhuaicunapi cashpami, caparishpa Diosta mañarca. Chashna caparishpa mañashcataca Diosca uyarcami. 24Diosca paicuna llaquilla cashpa, mañashcata uyashpami Abrahamhuan, Isaac-huan, Jacobohuan ari nishcata yuyarirca. 25Diosca paicuna ima shina causacushcata ricurcami. Chaimantami paicunata ayudasha nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index