Search form

ÉXODO 24

Sinaí urcupi Dios israelcunahuan ari nishcamanta

1Mandac Diosca Moisestaca:

—Ñuca maipi cashcaman Aaronhuan, Nadabhuan, Abiuhuan, canchis chunga israelcunata pushac yuyaccunahuan huichai shamushpa, carullapi cumuri. 2Shina cacpipish, can Moisesllami ñucapacman cuchuyana cangui. Paicunapish, israelcunapish mana cuchuyanachu can— nirca.

3Moisés cutishpaca, Mandac Dios nishcacunatapish, tucui mandashcacunatapishmi israelcunaman huillarca. Shina huillacpimi, israelcuna shuc shinalla tucushpaca:

—Mandac Dios tucui imata nishcacunataca pactachishunllami— nirca.

4Moisesca Mandac Dios tucui nishcacunata quillcashpami, cayandi tutamanta utca jatarishpa, urcu chaquipi shuc altarta ruhuarca. Chai altartaca chunga ishcai Israel aillucunata catishpami, chunga ishcai rumita japishpa shayachirca. 5Chai quipaca israelpuramanta maijan mosocunatami Mandac Dios-huan alli tucungapac shuc maltón huagrata huañuchishpa, rupachichun cacharca. 6Moisesca chai yahuarta japishpami, chaupitaca shuc lavacarapi churashpa, shuc chaupitaca altar jahuapi chiraparca. 7Chaimantaca Mandac Dios-huan ari nishca librota japishpami, tucui israelcunaman rezashpa uyachirca. Chaita uyashpami paicunaca:

—Mandac Dios tucui nishcacunata cazushpa pactachishunllami— nirca.

8Shina nicpimi, Moisesca yahuarta japishpa, tucui israelcunapac jahuapi chirapashpaca:

—Cai yahuarca Mandac Dios-huan ari nishcata ricuchicmi— nirca.

9Quipaca Moisespish, Aaronpish, Nadabpish, Abiupish, canchis chunga israelcunata pushac yuyaccunapish huichaiman rishpami, 10israelcunata Mandac Diosta ricurca. Paipac chaqui ucupica jahua pacha achic nicuc shina, zafiro rumihuan allichishcami carca. 11Shina israelcunata pushac yuyaccuna Diosta ricucpipish, Diosca mana llaquichircachu. Chaimantami paicunaca micushpapish, ubiashpapish carcacuna.

Moisesca Sinaí urcupi cashcamanta

12Mandac Diosca Moisestaca:

—Ñucahuan tupangapac urcuman shamushpa, chaipi shuyai. Chaipimi tabla rumipi ñuca mandashcacunatapish, israelcunata yachachishcacunatapish cusha— nirca.

13Chashna nicpimi, Moisesca paita ayudac Josuehuan Diospac urcuman huichai rirca. 14Chaimantami pushac yuyaccunataca:

—Ñucanchic cutingacaman cancunaca caillapi shuyacuichic. Aaronpish, Hurpish cancunahuanmi saquirin. Ima llaqui tiyacpica, paicunaman huillanguichic— nishpami saquirca.

15Shina nishpa, Moisés urcuman huichai ricpica, puyumi tucui chai urcutaca taparca. 16Mandac Diospac sumaimana achicmi Sinaí urcu jahuapi carca. Sucta punzhatami puyuca chai urcuta taparca. Canchisniqui punzhapimi Mandac Diosca Moisesta puyu chaupimanta cayarca. 17Mandac Diospac sumaimana achicca israelcunapac ñahuipica nina pillurishpa rupacuc shinami, urcu jahuapica ricurirca. 18Moisés puyu ucuman yacushpa, urcu jahuaman huichai rishpaca, chuscu chunga punzhata shinallatac chuscu chunga tutatami chaipi carca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index