Search form

ÉXODO 25

Dios-huan tupana huasiman ofrendata apamushcamanta

(Ex 35.4-9)

1Mandac Diosca Moisestaca: 2«Israelcunataca ñucaman ofrendata cungapac maijanpish ñucaman tucui shunguhuan cuccunamanta japichun ni. 3Paicunamantaca curita, cullquita, bronceta, 4azul, sani puca, morado puchcata, yuranlla lino puchcata, chivo millmata, 5pucapi tiñishca oveja carata, delfín carata, acacia caspita japingui. 6Lámpara japichina aceiteta, cahuirina aceiteta, mishquilla ashnacucta, inciensota mishquillata ruhuactapish japingui. 7Efodpi, pectoralpi churangapac ónice rumicunatapish, engastecunatapish japingui. 8Cancunapac chaupipi ñuca causangapac ñucahuan tupana huasita shayachinguichic. 9Chai huasitapish, chaipi tiyaccunatapish ñuca nishca shina ruhuanguichic.

Arcamanta

(Ex 37.1-9)

10Chashnallatac acacia caspimanta shuc Arcata ruhuangui. Chaica sunimanca shuc metro yalli, cutin anchomanca canchis chunga centímetro, shinallatac altomanpish canchis chunga centimetromi canga. 11Chaitaca ucutapish, canzhatapish alli curihuan cahuingui. Shinallatac muyunditapish curihuan ruhuangui. 12Shinallatac curita nuyuchishpa, chuscu argollata ruhuashpa, chuscu esquinapi churangui. Shuc lado esquinapica ishcaita, caishuc lado esquinapica ishcaita churangui. 13Shinallatac acacia caspimanta varacunata ruhuashpa, jahuataca curihuan cahuingui. 14Chai varacunataca Arcata huandungapac argollacunapi churachingui. 15Chai varacunaca argollacunapi churachingui. Chaicunataca mana anchuchinachu cangui. 16Chai Arcapica ñuca mandashca quillcata churangui. Chaitaca ñucami cusha.

17Chai Arca tapataca curimanta ruhuangui. Chaica sunimanca shuc metro yalli, anchomanca canchis chunga centimetromi canga. 18Querubincunata curita martillohuan huactashpa, ruhuashpa ishcai ladopi churangui. 19Shuc querubintaca shuc ladoman, caishuc querubintaca caishuc ladoman churashpa, tapahuan shuclla shinata ruhuangui. 20Chai querubincunaca tapa jahuapimi alascunahuan tapata quillpashca ñahuipura ricushpa tiyacunga. Chai querubincunaca chimbapurashpami, tapata ricushpa tiyacunga. 21Arcataca tapahuan tapashpa, ucupica ñuca mandashca quillcata churangui. Chai mandashcataca ñucami cusha. 22Chaipimi ñucaca canhuan tupasha. Dios-huan ari nishca quillcata huacaichina Arca tapa jahuamanta, chai tapa jahuapi tiyacuc ishcai querubincunapac chaupimantami israelcunata imata ninata huillasha.

Mizata ruhuanamanta

(Ex 37.10-16)

23Acacia caspimanta shuc mizata ruhuangui. Chai mizaca sunimanca iscun chunga centímetro, anchomanca chuscu chunga pichca centímetro, altomanca canchis chunga centimetromi canga. 24Chai tucui miza jahuataca curihuan cahuingui. Muyunditaca curihuan ruhuangui. 25Miza muyunditaca curihuan canchis centímetro anchota churangui. 26Shinallatac chuscu argollatapish curimanta ruhuashpa, chuscu esquinacunapi churangui. 27Chai argollacunaca miza muyundita churashca caspicunapimi canga. Chaipimi varacunata satichishpa, mizata apanga. 28Mizata huanduna varacunataca acacia caspimanta ruhuashpa, jahuataca curihuan cahuingui. Chaihuanmi mizataca apangui. 29Shinallatac platocunatapish, jarrocunatapish, cucharacunatapish, vasocunatapish, alli curimanta ruhuangui. 30Chai miza jahuapica punzhanta ñucaman cushca tandata churangui. Ñucapac ñaupamantaca jaicapi mana illanachu can.

Curi candelerocunamanta

(Ex 37.17-24)

31Shuc candelerotapish alli curita martillohuan huactashpa ruhuangui. Chai candelerotaca chaquitapish, chaquipi cactapish, copacunatapish, manzanacunatapish, sisacunatapish shucllata ruhuangui. 32Candeleropac chaupi caspimantaca sucta rigracunami llucshinga. Shuc ladomanca quimsa, shuc ladomanca quimsami llucshinga. 33Shuc rigrapica quimsa almendro sisalaya vasocunami canga. Chaica, shuc manzanahuan shuc sisahuan canga. Cutin shuc lado rigrapica quimsa almendro sisalaya vasocunami canga. Chai manzanahuan shuc sisahuanmi canga. 34Candelero chaupi caspipica chuscu almendro sisalaya chuscu vasocunami manzanahuan, sisacunahuan tiyanga. 35Shinallatac ishcai rigra ucupitacmi manzanata charinga. Caishuc lado ishcai rigra ucupipish shuc manzanatami charinga. Chashnallatac shuctac ishcai rigracunapipish shuc manzanatami charinga. Chashnami candeleromanta llucshishca sucta maquipitac tiyanga. 36Chai manzanacunapish, rigracunapish mana pitishca shucllamanta martillohuan labrashca curillahuan ruhuashcami canga. 37Shinallatac canchis lamparacunata ruhuashpa, ñaupaman achicyachichun japichishpa churangui. 38Shinallatac mechacunata pitinatapish, uchupata tandanatapish alli curimanta ruhuangui. 39Chai candelerotapish, tucui chaipi imalla tiyaccunatapish quimsa chunga quimsa kilo curimantami ruhuana cangui. 40Tucui caicunataca urcupi ricuchishca shinallatac ruhuangui.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index