Search form

ÉXODO 27

Bronce altarmanta

(Ex 38.1-7)

1Acacia caspimanta shuc cuadrado altarta ruhuangui. Chai altarca sunimanpish, anchomanpish ishcai metro quimsa chunga centímetro, cutin altomanca ishcai metro quimsa chunga centimetromi canga. 2Chai altar chuscu esquinapica chuscu gachuta ruhuangui. Chai gachucunaca altarhuan shuc shinalla ruhuashcami canga. Chai altar jahuataca broncehuan cahuingui. 3Altarmanta uchupata pallana mangatapish, paletocunatapish, lavacaracunatapish, garfio fierrocunatapish, carbonta churana mangatapish broncellamanta ruhuangui. 4Shuc rejillatapish broncemanta ruhuangui. Chuscu esquina rejilla jahuapica broncemanta chuscu argollata ruhuangui. 5Chai rejillataca chaupi altarcamanlla churangui. Chai rejillaca altar chaupicamanllami chayanga.

6Altar huanduna varacunataca acacia caspimanta ruhuashpa, jahuataca broncehuan cahuingui. 7Chai varacunataca altar argollacunapi pasachishpa churangui. Chai varacunaca altarta huandungapac altarpac ishcai ladoman pasachishpa churangui. 8Chai altarca urcupi ñuca ricuchishca shina tablacunamanta chushac cajonmi canga.

Dios-huan tupana huasi canzha pambamanta

(Ex 38.9-20)

9Chashnallatac ñucahuan tupana huasi canzha pambatapish ruhuangui. Chai ura ladoca chuscu chunga pichca metromi canga. Lino puchcahuan ahuashca pañohuan jarcashcami canga. 10Ishcai chunga pilar caspitapish, ishcai chunga basatapish broncemanta ruhuangui. Ganchocunatapish, varillacunatapish cullquimanta ruhuangui. 11Jahua ladopi cac pañoca sunimanca chuscu chunga pichca metromi canga. Shinallatac ishcai chunga pilarcunahuan, ishcai chunga bronce basacunatami charinga. Ganchocunatapish, varillacunatapish cullquimanta ruhuangui. 12Inti tigrana lado canzha pambaca anchomanca ishcai chunga ishcai metro chaupimi canga. Chunga pilarcunahuan, chunga basacunahuan shayachishcami canga. 13Inti llucshina lado canzha pambapish ishcai chunga ishcai metro chaupimi canga. 14Chai huasi yaicuna pungu shuc ladoca canchis metromi canga. Shinallatac quimsa pilarhuan, quimsa basahuanmi canga. 15Caishuc ladomanpish canchis metromi canga. Quimsa pilarhuan, quimsa basahuanmi canga. 16Canzhaman yaicuna pungutaca azul, morado, sani puca lino puchcahuan bordashca, iscun metromi canga. Chaipish chuscu pilarhuan, chuscu basahuanmi canga. 17Tucui canzha pamba muyundi pilarcunaca cullquihuan jahuata cahuishca, cutin ganchocunaca cullquimanta, basacunaca broncemantami canga. 18Chai canzha pambaca sunimanca chuscu chunga pichca metro, anchomanca ishcai chunga metro chaupi, altomanca ishcai metro canchis chunga centimetromi canga. Chaica lino puchcahuan ahuashca pañohuanmi canga. Cutin basacunaca broncemantami canga. 19Ñucahuan tupana huasi ucupi ima tiyashcacunapish, carpa huasita charic ishtacacunapish, pañota charic canzha pamba ishtacacunapish broncemantami canga.

Lamparacunapi churana aceitemanta

(Lv 24.1-4)

20Lamparacunata punzhanta japichishpa charingapac olivosmanta ashtahuan alli aceiteta apamuchun mandangui. 21Chai lamparacunataca Aaronmi paipac churicunandi Mandac Dios ñucapac ñaupapi, ñucahuan tupana ucupi mandashcacunata huacaichishca paño canzhapi, chishimanta tutamantacaman japichishpa charinga. Caicunataca tucui israelcunapish, paicunapac huahua huahuacunapish huiñaita pactachichunmi, mandashpa quillcashca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index