Search form

ÉXODO 28

Curacuna churarinamanta

(Ex 39.1-31)

1Israelcunapuramanta cambac huauqui Aarontapish, paipac churi Aarontapish, Nadabtapish, Abiutapish, Eleazartapish, Etamartapish ñucapac curacuna tucushpa, ñucata servichun cambac ñaupaman cayangui. 2Cambac huauqui Aaronman ñucapac chicanyachishca tucuimanta yalli sumac jagan nicuc churanata ruhuangui. 3Canmi Aaronman churanacunata ruhuachun alli yuyaiyuc, yachac espirituyuc runacunahuan parlana cangui. Chashna ruhuashpa churachicpimi, ñucapaclla chicanyachishca cura canga. 4Cai churanacunata ruhuangui: Pectoraltapish, efodtapish, tunicatapish, cuadrado churanatapish, mitratapish shinallatac chumbitapish ruhuangui. Cura tucushpa, ñucata servichun, cambac huauqui Aaronmanpish, paipac churicunamanpish ñucapaclla chicanyachishca churanacunata ruhuachingui. 5Chaicunataca curimanta, azul, morado, sani pucata, shinallatac lino puchcamantami ruhuanga.

6Efodtaca curimanta ruhuashpami, azul, morado sani puca puchcahuan, lino puchcahuanmi sumacta bordashpa ruhuanga. 7Efodca ishcai suni paño, ishcai lado hombros jahuata churashpa ñaupamanpish, huashamanpish tupanacuchishpa, chumbillinami canga. 8Efod jahuata huatallina chumbica efod ruhuashca puchcallamantatacmi canga. Chaica curihuan, azul, morado, sani puca, shinallatac lino puchcahuanmi ruhuashca canga.

9Ishcai ónice rumipi Israelpac huahuacunapac shuticunata quillcangui. 10Huacharishcata catishpa, shuc rumipica suctapac shuticunata, caishuc rumipica caishuc suctapac shuticunata quillcangui. 11Rumipi rallashpa quillcac runa, sellota churac runa shinallatac ishcai rumipi Israelpac huahuacunapac shutita quillcangui. Chai rumi muyundipica curi engastecunata churangui. 12Chai rumicunata sumacta ruhuashpa, Israelpac huahuacunata yuyaringapac, efod churashca ishcai hombros jahuapi churangui. Chashnami Aaronca Mandac Dios ñucapac ñaupapi Israelpac huahuacunapac shuticunata yuyaringapac paipac ishcai hombros jahuapi apanga. 13Curi engastecunata churashpa, 14curillamantatac ishcai huatucunata jimbashca shinata chaicunapi churangui.

15Chashnallatac allita ricushpa mandacucta ricuchic pectoraltapish sumacta bordashpa ruhuangui. Efodta ima shinami curihuan, azul morado, sani puca, lino puchcahuan ruhuarcangui, chashnallatac chaitapish ruhuangui. 16Chaica sunimanpish, anchomanpish shuc cuarta yalli shina, cuadradomi canga. Shinallatac patarishcami canga. 17Chai cuadropica chuscu fila sumac rumicunata churangui. Shucniqui filapica rubíes, topacio, berilo rumicunata, 18ishcainiqui filapica esmeralda, zafiro, shinallatac diamante rumicunata churangui. 19Quimsaniqui filapica jacinto, ágata, amatista rumicunata, 20chuscuniqui filapica crisólito, ónice shinallatac jaspe rumicunata churangui. Tucui chaicunataca curi engastecunapi churangui. 21Chai rumicunaca Israelpac huahuacunatami ricuchicunga. Chai rumicunaca Israelpac aillucuna shinallatacmi chunga ishcai rumi canga. Tucui rumicunami Israel aillucunapac shutiyuc, selloyuc canga.

22Chai pectoral jahuapi churangapacca alli curimanta jimbashpa huatucunata ruhuangui. 23Pectoral ishcai puntapi churangapacca curimanta ishcai argollata ruhuangui. 24Chai ishcai curimanta ruhuashca argollapica curimanta ruhuashca ishcai huatuta pasachingui. 25Chai ishcai huatucunataca curi ishcai engastecunahuan efod ishcai hombros jahuapi churashpa ñaupa ladoman huatangui. 26Shinallatac ishcai argollata curimanta ruhuangui. Chaicunataca efod jahuallapitac pectoral ucu lado ishcai lado esquinapi churangui. 27Curimanta ishcai argollatapish ruhuangui. Chaicunataca Efod churana ishcai hombros ucu ladoman churangui. Efodta tupanacuchishpa, chumbillichishca jahuapi churangui. 28Chashna pectoralpi churashca argollacunahuan, Efod churashca argollacunahuan azul puchcahuan huatangui. Chashna ruhuacpimi, pectoralca efodmanta mana chicanyashpa, chumbillina jahuapi canga. 29Chashnami Aaronca ñucapaclla carpa huasimanca allita ricushpa, mandacucta ricuchic pectotalpi Israelpac huahuacunapac shuticunata pechopi churashpa yaicunga. Chashnami ñucapac ñaupapi punzhanta yuyaringapac apashca canga. 30Allita ricushpa, mandacucta ricuchic pectoralpica Urimta, Tumimta churangui. Chashnami ñucapac ñaupaman Aarón yaicushpaca, paipac pechopi charinga. Chashnami Aaronca pechopi israelcunapac shuticunata apashpa, ñucapac ñaupapi punzhanta canga.

31Efodhuan churarina tunicata azul colorta ruhuangui. 32Chai túnica chaupipica uma yaicuna jutcuta ruhuangui. Chai jutcu muyunditaca ama lliquirichun patarishpa ahuangui. 33Chai túnica chaqui ladopica azul, morado, sani puca puchcahuan granadacunata huarcuchingui. Chai jahuapica muyundita curimanta ruhuashca campanillacunata churangui. 34Chai túnica chaqui muyunditami curi campanillata, quipaca shuc granadota, quipaca curi campanillata, quipaca granadota churangui. 35Aaronca ñucata servingapac yaicushpaca, chai churanahuanmi canga. Yaicushpapish, llucshishpapish chai uchilla campanacuna chilin nishpami, Mandac Dios ñucapac ñaupapica canga. Chashna uyaricpica, mana huañungachu.

36Chashnallatac alli curimanta shuc sisalaya placata ruhuangui. Chaipica fierrohuan aspishpa, Mandac Dios ñucapaclla chicanyachishcami nishpa sellota quillcangui. 37Chaitaca azul puchcahuan umapi churana mitra ñaupa ladoman churangui. 38Chashnami Aaronca chai placataca paipac frentepi apashpa puringa. Chaimi israelcuna ofrendata ñucaman cushpa rupachicushpa, ima pandarishcataca pai apanga. Shina paipac frentepi placata churashca cacpimi, ofrendataca chasquisha.

39Tunicatapish, mitratapish lino puchcahuan sumacta bordashpa ruhuangui. Chumbitapish chashnallatac sumacta ruhuangui. 40Aaronmanpish, paipac churicunamanpish tunicata, chumbita shinallatac mitratapish sumac jagan nicucta ruhuangui. 41Aaronmanpish, paipac churicunamanpish chai churanacunata churachingui. Chai quipaca ñucapaclla chicanyachishca cura, mandac cachunca aceiteta umapi churangui. 42Chashnallatac cinturamanta mucucaman lluchullata jarcarichun, lino puchcacunamanta calzonta ruhuangui. 43Chai churanahuanmi Aaronpish, paipac churicunapish ñucahuan tupana huasipi tandanacungapac, mana cashpaca altarpi servingapac yaicunga. Mana chashna yaicushpaca, juchallishpa huañungami. Cai mandashcacunami huiñaipac Aaronmanpish, quipa miraicunamanpish can.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index