Search form

ÉXODO 29

Aaronpish, paipac churicunapish

Diospaclla tucuna cashcamanta

(Lv 8.1-36)

1Ñucapaclla chicanyachishca cura cangapacca caicunatami ruhuana cangui: Ima mana tucushca shuc becita, ishcai cari ovejata, 2alli harinahuan, aceitehuan ruhuashca levadura illac tandata, tortata, levadura illac galletata aceitehuan cahuishpa apamungui. 3Chaicunataca shuc uchilla tazapi churashpa, ishcai cari ovejahuan, becihuan apamungui. 4Aarontapish, paipac churicunatapish ñucahuan tupana huasi yaicunaman pushashpa, armachishpa, 5Aaronmanca curacuna churana tunicata, efodta, pectoralta churachingui. Efodtaca chumbihuan huatachingui. 6Umapica ñucapacta ruhuac cura cashcata ricuchic quillcata mitrata churachingui. 7Quipaca aceitehuan Aaronpac umapi cahuingui. Chashna ruhuacpimi, ñucapaclla saquiringa. 8Aaronpac churicunata cayashpa, paicunamanpish tunicata churachingui. 9Aarontapish, paipac churicunatapish chumbihuan huatachishpa, mitrata churachingui. Chashna ruhuacpimi, huiñaita ñucapaclla cura cachun mandashca canga.

10Chaimantaca becita ñucahuan tupana huasi ñaupaman apamungui. Chaipimi Aaronpish, paipac churicunapish becipac umapi maquita churanga. 11Becitaca ñucahuan tupana huasi ñaupapi, Mandac Dios ñucapac ñaupapi huañuchingui. 12Yahuartaca cambac dedohuan altarpac gachucunapi cahuingui. Puchu yahuartaca altar chaquipi tallingui. 13Yana shunguta, chunzhullita tapashca huiratapish, ishcai riñón huiratapish llucchishpa, altar jahuapi rupachingui. 14Ashtahuanpish beci carata, aichata, huanutaca carpa huasimanta llucchishpa rupachingui. Chai ofrendaca juchamanta cushcami.

15Ishcaimanta shuc ovejata apamungui. Chashna apamucpimi, Aaronpish, paipac churicunapish oveja uma jahuapi maquita churangacuna. 16Chai oveja yahuartaca altar jahuapipish, quingraipipish chirapangui. 17Chai cari oveja aichata pitinacushpa, chunzhullita jahuashpa, chaqui maquihuan, umahuan chai pitinacushca jahuapi churangui. 18Chai oveja aichataca Altar jahuapi churashpa, ñucaman cushpa, rupachingui. Chashna rupachishcami ñucamanca mishquilla ashnanga.

19Quipaca shuctac cari ovejata apamungui. Chai oveja uma jahuapimi Aaronpish, paipac churicunapish maquita churangacuna. 20Ovejata huañuchishpaca, chai yahuarta japishpa Aarontapish, paipac churicunatapish alli lado ringri puntapi cahuingui. Shinallatac alli maqui mama dedopi, alli chaqui mama dedopi cahuingui. Chai puchu yahuartaca altar jahuapipish, quingraipipish chirapangui. 21Altar jahuapi cac yahuartapish, aceitetapish japishpa Aaronpac, paipac churicunapac jahuapi shinallatac paicunapac churanapi chirapangui. Shinami Aaronpish, paipac churicunapish ñucapaclla chicanyachishca canga.

22Chai ovejaca ñucapaclla cura cachun chicanyachingapac cushca ovejami, chaimanta oveja chupata, chunzhulli tapashca huirata, yana shungu huirata, ishcai riñón huirata, alli lado rigrata apamungui. 23Mandac Dios ñucapac ñaupapi tiyacuc tazamanta aceitehuan masashca levadura illac tandata, tortata, galletata apamungui. 24Chaitaca Aaronpac shinallatac paipac churicunapac maquipi churangui. Shina churacpimi, paicunaca cuyuchishpa ñucaman cunga. 25Quipataca paicunapac maquimanta japishpa, ñucaman cushca tucui rupacuc jahuapi churashpa rupachingui. Chashna rupachishcami Mandac Dios ñucamanca mishquilla ashnanga. Chaica ñucaman cushpa rupachishcami canga.

26Aaronta ñucapaclla cachun chicanyachingapac cushca oveja pecho aichata japishpa, Mandac Dios ñucaman cuyuchishpa cungui. Chai aichaca cambacmi canga. 27Aaronta, paipac churicunata ñucapaclla cachun chicanyachingapac cuyuchishpa cushca pecho aichata, alzashpa cushca rigra aichata chicanyachingui. Chai aichaca Aaronman, paipac churicunamanmi canga. 28Chaicunaca israelcuna alzashpa ñucaman cushcami. Chaimantami chai aichaca Aaronman, paipac churicunaman cuna can. Chaitaca huiñaita ruhuachunmi mandashca canga. Chaica israelcuna ñucahuan alli tucungapac alzashpa cushca aichami.

29Ñucapaclla chicanyachishca Aaronpac churanaca pai huañushca quipaca churicunamanmi canga. Paicunami ñucata servingapac aceitehuan cahuishca cashpaca churaringa. 30Chai churanataca Aaronpac churicuna taitapac randi cura tucushpa, ñucahuan tupana huasiman ñucata servingapac yaicushpaca, canchis cutincamanmi churaringa.

31Ñucata servichun chicanyachishca cura cachun, cushca ovejataca ñucapaclla chicanyachishca ucupimi yanuna can. 32Chai aichataca Aaronmi paipac churicunahuan ñucahuan tupana huasi pungu tazapi tiyac tandahuan micunga. 33Tucui chaicunaca ñucapaclla tucuchun, juchamanta ñucaman cushca aichami. Chaimanta pipish mana micunachu, ashtahuanpish paicunallami micuna can. 34Cayandipac puchushca aichataca mana micunachu, ashtahuanpish rupachinami. Chaica ñucapaclla chicanyachishcami.

35Aarontapish, paipac churicunatapish ñuca nishca shina, tucuita ruhuangui. Chaicunataca canchis punzhapi ruhuangui. 36Punzhanta juchamanta shuc becita ñucaman cushpa huañuchingui. Chashnami ñucapaclla altar juchahuan mapayashcataca pichangui. Shinallatac aceitehuan cahuishpa ñucapacllata ruhuangui. 37Canchis punzhacaman altar jahuapi ñucaman cushpa rupachingui. Chashna ruhuacpimi, ñucapaclla chicanyachishca altar saquiringa. Pipish chai altarpi tuparicca ñucapaclla chicanyachishcami saquiringa.

Punzhanta ofrendata cunamanta

(Num 28.1-8)

38Altar jahuapica caicunatami punzhanta cuna cangui: Shuc huatayuc ishcai ovejatami ñucaman punzhanta cungui. 39Shuctaca tutamanta, shuctaca chishita cungui. 40Tutamantaca cada ovejahuan shuc litro yalli harinahuan, shinallatac shuc litrota chaupi olivos tacashca aceitehuan cungui. Ovejataca litrota chaupi vinohuan ñucaman cungui.

41Shuctac ovejataca chishitami cungui. Chai ovejataca tutamanta cushca shinallatac aceitehuan, vinohuan chapushpa rupachingui. Shina ruhuashcami ñucamanca mishquilla ashnanga.

42Cancunapac huahua huahuacunami ñucahuan tupana huasi yaicunapi ñucaman cushpa, ñucapac ñaupapi punzhanta rupachina can. Chaipimi ñucaca cancunahuan tupashpa rimasha. 43Chaillapitacmi israelcunahuanca tupasha. Chai pushtuca ñuca sumaimana achiclla cashcamantami ñucapaclla canga. 44Ñucahuan tupana huasipish, altarpish ñucapaclla cachunmi ruhuashca. Aarontapish, paipac churicunatapish ñucata serviccuna cachunmi, ñucapacllata ruhuashca. 45Ñucaca israelcunapac chaupipimi causasha, shinallatac ñucaca paicunapac Diosmi casha. 46Chashna ruhuacpimi, israelcunaca ñuca paicunapac chaupipi causangapac Egiptomanta llucchimushcata yachanga. Ñucaca paicunata Mandac Diosmi cani.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index