Search form

ÉXODO 30

Inciensota rupachina altartamanta

(Ex 37.25-28)

1Inciensota rupachingapacca acacia caspimanta shuc altarta ruhuangui. 2Chaitaca sunimanpish, anchomanpish chuscu chunga pichca centimetrota ruhuangui. Cutin altomanca iscun chunga centimetrota ruhuangui. Altar chuscu esquinapi gachucunata altarhuan shuclla shinata ruhuangui. 3Chai altar jahuatapish, lado quingraitapish, gachucunatapish curihuan cahuingui. Chai altar jahua muyundita canzhaman yallichishpa curihuan ruhuangui. 4Chai yallichishca ucunicllapica ishcai ladomanta caspita churashpa, huandungapac ishcai curi argollata ruhuangui. 5Acacia caspimanta ishcai varata ruhuashpa, jahuata curihuan cahuingui. 6Chai altartaca ari nishca quillcata huacaichina Arca ucuta jarcachishca paño ñaupallapi churangui. Chaipimi ñucaca canhuan tupasha. 7Aarón lamparacunata allichicushpaca, cada tutamantami mishquilla ashnacuc inciensota altarpi rupachinga. 8Chashnallatac tutayacucta lamparacunata japichicushpapish inciensota rupachichun. Caitaca huiñaitami cancunapac huahua huahuacunaca Mandac Dios ñucapac ñaupapi rupachinga. 9Cai altarpica shuctac inciensotapish, tucuita rupachinatapish, grano ofrendatapish, vinotapish ama rupachinguichu. 10Cai altarca ñucapaclla chicanyachishcami canga. Chaimantami juchacunata perdonachunca, huatapi shuc cutin Aaronca animal yahuarta altar gachucunapi cahuinga. Shinallatac huatapi shuc cutinllami juchamantaca animal yahuarhuan cahuinga. Chaitaca huiñaitami ruhuana can» nirca.

Causaimanta paganamanta

11Mandac Diosca Moisestaca: 12«Tucui yupashca israelcunami causaimanta Mandac Dios ñucaman cullquita cuna can. Chashna paicunata yupacpica, mana huañui japingachu. 13Tucui yupashca israelcunami carpa huasipi tiyac valishca cullquita chaupi siclosta pezashpa cunga. (Siclosca 20 gerasmi). Chaupi siclos cullquica ñucaman alzashpa cunami canga. 14Chai yupashcacunaca ishcai chunga huatata charicmanta huichaimanca tucuimi ofrendata alzashpa ñucaman cuna can. 15Paicunapac causaimanta Mandac Dios ñucaman cushpaca, chayucpish chaupi siclos yalli cullquitaca mana cungachu, shinallatac huacchapish chaupi siclosmanta menostaca mana cungachu. 16Israelcuna paicunapac causaimanta cushca cullquita japishpaca, ñucahuan tupana huasipi ima illashcata ruhuangapac japingui. Cai cullquita cucpimi, israelcuna causaimanta Mandac Dios ñucapac ñaupapi animalcunata cucpica, paicunata yuyarasha» nirca.

Bronce pailamanta

17Cutinllatacmi Mandac Diosca Moisestaca:

18«Jahuangapac shuc pailatapish, tiyachinatapish broncemanta ruhuangui. Chaitaca ñucahuan carpa huasihuan, altarhuan chaupipi churashpa, yacuta jundachingui. 19Chai yacuhuanmi Aaronpish, paipac churicunapish chaquita, maquitapi jahuanga. 20Paicunaca ñucata servingapac, ñucahuan tupana huasiman yaicushpa, altarpi rupachingapac cuchuyangapacca, chai yacuhuanmi jahuaringa. Chashna jahuashpami, mana huañunga. 21Paicuna mana huañungapacca chaquitapish, maquitapish jahuarinami can. Caica, Aaronpish, paipac churicunapish huiñaita chashna ruhuachunmi mandashca» nirca.

Diospaclla aceitemanta

22Mandac Diosca Moisestaca:

23«Sumac mishquilla ashnacucta acllai: Sucta kilo alli mirrata, quimsa kilo mishquilla ashnacuc canelata shinallatac quimsa kilo mishquilla ashnacuc calomata, 24sucta kilo casiata japingui. Ñucapac carpa huasipi tiyac valishca cullqui shina pezashcami canga. Shinallatac quimsa litro chaupi aceite olivostapish japingui. 25Tucui chaicunahuanca cahuishpa, ñucapaclla chicanyachina aceiteta ruhuangui. Chaimi ñucapaclla cachun chicanyachingapac cahuina aceiteca canga. 26Chai aceitehuan ñucahuan tupana huasitapish, ari nishca quillcata huacaichina Arcatapish cahuingui. 27Chai aceitehuan mizatapish, tucui chaipi tiyaccunandi, candelerotapish, tucui chaipi tiyaccunandi, inciensota rupachina altartapish, 28tucui rupachina altartapish, tucui chaipi tiyaccunandi, shinallatac bronce pailatapish, chaita tiyachinandi cahuingui. 29Chashna ruhuashpami, ñucapaclla cachun chicanyachingui. Chaicunaca ñucapacllami tucunga. Chaipi ima tuparicpica, ñucapacllami tucunga.

30Aarontapish, paipac churicunatapish cura tucushpa, ñucata servichun, chai aceitehuan cahuishpa, ñucapaclla cachun chicanyachingui. 31Shinallatac israelcunataca: “Caimi tucui cancunapac huahua huahuacunapacpish, ñucapaclla cachun chicanyachina aceiteca canga. 32Cai aceitehuanca ama yanga runacunata cahuinguichu. Shinallatac shuctac cai shina aceitetapish ama ruhuanguichu. Cai aceiteca ñucapacllami. Chaimantami ñucapaclla cashcata yuyashpa, causana canguichic. 33Maijanpish cai aceite shinata ruhuacpish, cai aceiteta yanga runapi cahuicpish israelpuramanta anchuchishcami canga” ningui» nirca.

Mishquilla inciensomanta

34Cutinllatacmi Mandac Diosca Moisestaca: «Mishquilla ashnacuc resinata, shillulaya alajata ashnacuc yuramanta ashtahuan alli inciensotapish, mishquilla ashnacuc galbanotapish chai shinallatac pezashpa japingui. 35Chaicunahuanca inciensota ruhuac runa shinallatac ñucapaclla chicanyachishca mishquilla ashnacuc inciensota, cachita churashpa ruhuangui. 36Chaicunamanta ashata ñututa tacashpa, ari nishca quillcata huacaichina cajón ñaupapipish, ñucahuan tupana huasipipish churangui. Chaipimi ñucaca canhuan tupasha. Chai inciensoca pi mana tuparina, ñucapaclla chicanyachishcami canga. 37Caica ñucapaclla chicanyachishca inciensomi canga. Cai shina inciensota pipish ama ruhuachun. 38Maijanpish shuctac cai shina inciensota ruhuashpa, mutquicca israelcunapuramanta anchuchishcami canga» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index