Search form

ÉXODO 31

Bezaleelta, Aholiabta cayashcamanta

(Ex 35.30—36.1)

1Mandac Diosca Moisestaca: 2«Riqui, ñucaca Judá aillupuramanta Uripac churi Urpac nieto Bezaleeltami acllarcani. 3Ñucami, ñuca Espirituhuan paitaca tucuipi yuyaisapata, alli yachacta, quiquin yuyaihuan imatapish allita ruhuacta ruhuarcani. 4Paitaca imatapish allita ruhuachunmi yachachircani. Paica broncemantapish, cullquimantapish, curimantapish tucuitami allita ruhuanga. 5Paitaca rumicunatapish, caspicunatapish sumacta allichishpa ruhuachun, ima trabajopipish allita ruhuachunmi acllarcani. 6Chashnallatac Dan aillupuramanta Ahisamacpac churi Aholiabtami Bezaleelta ayudachunca acllarcani. Tucui ñuca imata ruhuachun nishcacunata ruhuachunmi, tucui artesanocunaman yachai Espirituta curcani. 7Paicunami ñucahuan tupana huasitapish, ari nishca quillcata huacaichina Arcatapish, chaita tapanatapish, carpa huasipi tucui tiyaccunatapish ruhuanga. 8Mizatapish, chai jahuapi tiyaccunatapish, curi candelerotapish, chaipi tiyaccunatapish, inciensota rupachina altartapishmi ruhuanga. 9Ñucaman cushpa tucui rupachina altartapish, chaipi tiyaccunatapish, pailatapish, pailata churanatapish ruhuanga. 10Ñucata servingapac churanatapish, Aaronpish, paipac churicuna churarina ñucapaclla chicanyachishca churanatapish, 11ñucapaclla cachun chicanyachingapac cahuina aceitetapish, ñucapaclla carpa huasipi churana mishquilla ashnacuc inciensotapish paicunami ñuca ima shina mandashca shina ruhuanga» nirca.

Samana punzhamanta

12Mandac Diosca Moisestaca:

13«Israelcunataca: “Cancunaca samana punzhata huacaichinguichic. Chai punzhataca tucui huahua huahuacunami huacaichina can. Chashnami ñucataca Mandac Dios cashcatapish, chai punzha ñucapaclla cashcatapish yachangacuna. 14Chai punzhaca cancunapac jatun punzhami. Chaimantami huacaichina canguichic. Maijanpish chaita mana cazucca huañuchishcami canga. Chai punzhapi trabajacca israelpuramanta anchuchishcami canga. 15Sucta punzhatami trabajana. Ashtahuanpish canchisniqui punzhaca ñucapaclla chicanyachishca samana punzhami. Chaimantami chai punzhapica ñucata yuyarina canguichic. Maijanpish chai punzhapi imatapish ruhuacca huañuchishcami canga. 16Israelcunapish, paicunapac huahua huahuacunapish samana punzhataca ñucahuan ari nishcata yuyarishpami pactachinga. Chai samana punzhataca huiñaitami huacaichina can. 17Samana punzhaca ñucahuanpish, israelcunahuanpish shuc señalmi can. Mandac Dios ñucaca sucta punzhapimi jahua pachatapish, cai pachatapish ruhuarcani. Ashtahuanpish canchisniqui punzhapica imata mana ruhuashpami samarircani” ninmi ningui» nirca.

Israelcuna curi becita ruhuashcamanta

(Dt 9.6-29)

18Sinaí urcupi Mandac Dios Moises-huan parlanacushpaca, chunga mandashcacunatami paipac maqui dedohuan ishcai tabla rumipi quillcashpa, Moisesman curca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index