Search form

ÉXODO 32

1Moisés urcumanta mana utca shamucpimi, israelcuna Aaronpacman cuchuyashpaca:

—Egiptomanta llucchicmuc Moisesca, imachari tucurca. Mana yachanchicchu. Jatari, ñucanchicta pushachun, shuc diosta ruhuai— nirca.

2Shina nicpimi Aaronca:

—Cancunapac huarmicuna, churicuna, ushicuna ringripi churashca curi zarcillocunata apamuichic— nirca.

3Shina nicpica, tucui israelcunami paicunapac ringrimanta curi zarcillocunata llucchishpa, Aaronman curca. 4Aarón chaicunata japishpa, yacuyachishpami, beci diosta ruhuarca. Shina ruhuacpimi paicunaca:

—¡Caimi, israelcunata Egiptomanta llucchic diosca!— nirca.

5Aarón chaita ricushpa, shuc altarta becipac ñaupapi ruhuashpaca:

—¡Cayaca, Mandac Diosmanmi shuc fiestata charishun!— nishpa caparirca.

6Cayandi tutamantaca utca jatarishpami, chai beciman animalta cushpa, tucui rupachirca. Shinallatac paihuan alli tucungapacpish ofrendata curcami. Chai quipaca israelcunaca micungapac, ubiangapacmi tiyarirca. Ña micushca quipaca cushicungapacmi jatarirca.

7Chaimantami Mandac Diosca Moisestaca:

—Cunanca utcashpa urai rilla. Egipto llactamanta can llucchimushca gentecunaca mana allitami ruhuacun. 8Paicunaca ñuca mandashca ñanmanta caruyashpami, shuc curi becita ruhuashpa alli nishpa, animalta cushpa rupachishpaca: “¡Caimi, israelcunata Egipto llactamanta llucchic diosca!” nishcacuna. 9Cai israelcuna sinchi shungu cashcatami yachani. 10Cunanca, paicunahuanca yallita piñarishpa, huañuchishpa tucuchichun saqui. Shina cacpipish, canmantaca shuc jatun llactatami ruhuasha— nirca.

11Shina nicpimi, Moisesca Mandac Diosta tucui shunguhuan mañashpaca:

—Mandac Dioslla, ¿ima nishpatac Egipto llactamanta cambac poderhuan llucchishca, can acllashca gentecunahuanca piñaringuiyari? 12Egipto runacunaca: “Israelcunapac Diosca urcucunapi huañuchishpa, cai pachamanta chingachingapacmi israelcunataca llucchishca” ningacunamari. Chaimanta ama ña ashtahuan piñarichu. Paicunata llaquichinataca cungarilla. 13Canta servic Abrahamman, Isaacman, taita Israelman: “Cancunapac huahua huahuacunataca jahua pachapi tiyac lucerocunata shinami mirachisha. Cancunapac huahua huahuacunaman cusha nishca cai llactapish cushami. Caica huiñaitami paicunapac canga” nishpa, cambac shutipi ari nishcataca yuyariyari— nirca.

14Chaimantami Mandac Diosca pai acllashca gentecunata llaquichisha nicushpapish mana llaquichishpa saquirca.

15Moisesca Dios cushca chunga mandashcacunata ishcai tabla rumipi quillcashpami urcumanta urai shamurca. Chai tabla rumicunapica ishcai ladomanmi quillcashca carca. 16Chai tabla rumicunapish, chaipi quillcashcapish Diosllatac quillcashcami carca.

17Josué israelcuna sinchita caparinacucta uyashpaca:

—¡Carpa huasipica macanacushpa caparinacuimari uyarin!— nishpami, Moisesman huillarca.

18Shina huillacpimi Moisesca:

—Cai caparishcaca mana macanacuita mishashpa cushicushpa caparishcachu, shinallatac mana macanacuita shuccuna atishcamanta llaquihuan caparishcachu. Ashtahuanpish ñucaca cantacuctami uyani— nirca.

19Carpa huasicunaman Moisés cuchuyashpaca, curimanta ruhuashca becitapish, israelcuna danzacuctapish ricushpami, yallita piñarishpa, pai charicushca ishcai tabla rumicunata urcu chaquipi ñuturicta shitarca. 20Chashna ruhuashpaca curimanta ruhuashca becita ninapi rupachishpa, ñutuchishpami polvota ruhuarca. Chai polvotaca yacupi churashpami, israelcunaman ubiachirca. 21Shinami Moisesca Aarontaca:

—Cai gentecunaca, ¿imatatac cantaca ruhuarcayari? ¿Ima nishpatac jatun juchata ruhuangacaman saquircanguiyari?— nirca.

22Shina nicpimi Aaronca:

—Ñuca amitolla, ama piñarichu. Cai gentecuna mana allita ruhuac cashcataca canllatac alli yachanguimi. 23Paicunallatacmi ñucataca: “Egipto llactamanta ñucanchicta llucchimuc Moisesca, ¡Imachari tucurca! Mana yachanchicchu. Ñucanchicta pushachun, diosta ruhuai” nirca. 24Shina nicpimi ñucaca: “Maijanpish curita chariccunaca apamuichic” nircani. Chaimantami curita ñucapacman apamucpica, ninapi shitarcani. Chashna shitacpica, becimi llucshirca— nirca.

25Aarón israelcuna millaita ruhuacucpi, mana jarcashpa, paicuna munashcata ruhuachun saquishcata shinallatac paita piñaccunapac chaupipi pingaichishcatami Moisesca ricurca. 26Chaimantami Moisesca carpa huasi yaicunapi shayarishpaca:

—¿Maijancunallatac Mandac Diospac cagringuichic? Ñucahuan tandanacuichic— nirca.

Shina nicpimi, Levipac churicunaca Moises-huan tandanacurca. 27Shina tandanacucpimi Moisesca:

—Mandac Dios israelcunataca: “Tucui cancunapac espadata japishpa, carpa huasicunaman cutichic. Ucuman yaicushpa, cancunapac huauquitapish, cancunapac ricsishcatapish cancunapac familiatapish huañuchichic” ninmi— nirca.

28Shina nicpica, Levipac churicunaca Moisés mandashca shinallatacmi ruhuarca. Chai punzhapica quimsa huaranga israelcunami huañurca. 29Chashna ruhuashca quipami Moisesca:

—Cunanmi, cancunaca Mandac Diospaclla tucushcanguichic. Cancunapac huahuacunatapish, huauquicunatapish mana llaquishpami, pai mandashcata pactachishcanguichic. Mandac Dios bendiciachunmi chashnaca ruhuashcanguichic— nirca.

30Cayandimi Moisesca israelcunataca:

—Cancunaca jatun juchatamari ruhuashcanguichic. Ñucaca Mandac Dios maipi cashcamanmi huichai rigrini. Cancunapac juchata perdonangapishchari— nirca.

31Chashna nishpa, Moisés Mandac Diospac ñaupaman rishpa mañashpaca:

—Israelcunaca curimanta diosta ruhuashpami, jatun juchata ruhuashca. 32Paicunapac juchata perdonachunmi mañac shamuni. Can mana perdonasha nishpaca, ñuca shutita cambac quillcashca libromanta anchuchingui— nirca.

33Shina nicpimi, Mandac Diosca Moisestaca:

—Maijanpish juchallishpa piñachiccunatami ñuca libromantaca anchuchisha. 34Cunanca, ñuca maimanmi pusharichun nishcaman israelcunataca pushai. Ashtahuanpish ñuca cachashca angelmi cambac ñaupata pushashpa ringa. Shina cacpipish, taripashpa llaquichina punzha chayamucpimi, paicunapac juchamantaca llaquichisha— nirca.

35Aaronta ruhuashca curi becita alli nishcamantami Mandac Diosca israelcunata ungüihuan llaquichirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index