Search form

ÉXODO 33

Dios pushana cashcamanta

1Mandac Diosca Moisestaca:

—Egipto llactamanta llucchishca israelcunata ñuca cusha nishca llactaman pushai. Chai llactata cungapacmi Abrahamman, Isaacman, Jacobomanca: “Chai llactataca cancunapac huahua huahuacunamanmi cusha” nishpa, ari nircani. 2Ñuca angelta cambac ñaupata cachashpami, cancuna japina llactamantaca cananeocunatapish, amorreocunatapish, heteocunatapish, ferezeocunatapish, heveocunatapish, jebuseocunatapish llucchishpa cachasha. 3Lechepish, mishquipish yacu shina callpacuc llactaman richic. Cancuna yalli sinchi shungu cacpimi, ñucaca cancunahuanca mana risha. Ñuca cancunahuan rishpa, cancuna juchallicpica, tucuita chingachishami— nirca.

4Chai llaquita uyashpami, israelcunaca llaquilla tucurca. Chaimantami pipish sumac churanacunata mana churarirca. 5Mandac Diosca Moisestaca: «Israelcunataca: “Cancunaca yalli sinchi shungumi canguichic. Ñuca cancunapac chaupipi ashallatapish cashpaca, tucuitami huañuchishpa chingachiman. Cunanca churanacunata anchuchichic. Quipatami ñuca imata ruhuanataca yuyarisha” ninmi ningui» nirca.

6Israelcunaca Horeb urcumanta llucshishpaca, sumac churanacunataca ña mana ashtahuan churarircachu.

7Moisesca chai carpa huasitaca israelcunapac carpa huasimanta carupimi shayachirca. Chai huasitaca Dios-huan tupana huasitami shutichirca. Maijanpish Dios-huan tupasha nishpaca, chaimanta carupi shayachishca carpa huasimanmi rina carca. 8Moisés chai huasiman ricucpica, tucui israelcunami jatarishpa, Dios-huan tupana huasiman yaicuna pungu chaquipi Moisés carpa huasiman yaicungacaman chapashpa shayacurca. 9Moisés Dios-huan tupana huasiman yaicucpica, suni puyumi jahuamanta huasi punguman shamuc carca. Chaipimi Mandac Diosca Moises-huan parlac carca. 10Israelcunaca chai suni puyu, Dios-huan tupana huasi punguta tapacta ricushpaca, tucuimi cungurishpa, quiquin huasi pungucunapi Diosta allimari cangui nic carca.

11Mandac Diosca Moises-huanca alli ricsishcahuan parlanacuc shinami, ñahui ñahui parlac carca. Chai quipami Moisesca israelcunapac carpa huasicunaman cutic carca. Ashtahuanpish paita servic Nunpac churi Josueca carpa huasi chaupimanta maiman mana anchuricchu carca.

12Moisesca Mandac Diostaca:

—Riqui, canca ñucataca: “Israelcunata pushai” ninguimi. Shina cacpipish, ñucahuan pi rina cashcataca manamari huillanguica. Chashnallatac: “Ñucami cambac alli ricsishca cani. Canca, ñuca ñahuipica allimi ricurishcangui” nircanguimi. 13Chashna cambac ñahuipi alli ricurishca cacpica, can imata ruhuasha nicushcataca huillaiyari. Chashna huillacpimi, can ñucahuan cashcataca yachasha. Riqui, cai gentecunaca can acllashcacunami— nirca.

14Shina nicpimi, Mandac Diosca:

—Ñucallatacmi canta pushashpa, cancunata samachisha— nirca.

15Shina nicpimi Moisesca:

—Can ñucanchicta mana pushana cashpaca, ñucanchictaca caimanta ama llucchichu. 16Can mana ñucanchic-huan ricpica, ¿ima shinatac ñucapish, can acllashca gentecunapish cambac ñaupapi alli cashcataca yachashunyari? Ñucanchicca canhuan cashpamari cai allpapi causac shuctac gentecunamanta chican cashun— nirca.

17Shina nicpimi, Mandac Diosca Moisestaca:

—Ñucami cambac alli ricsishca cani. Ñuca ñahuipica allimi ricurishcangui. Ñuca nishcatapish canmanca ricuchishami— nirca.

18Shina nicpimi Moisesca:

—Shina cashpaca, cambac sumaimana achic nicucta ricuchiyari— nirca.

19Shina nicpimi, Mandac Diosca:

—Ñuca yallita cuyac cashcatami, canmanca ricuchigrini. Mandac Dios ñucaca mandac cashcatapishmi cambac ñaupapi huillasha. Maijanta yallita cuyasha nishpaca yallita cuyacmi cani. Maijanta llaquisha nishpaca llaquicmi cani. 20Shina cacpipish, ñucapac ñahuitaca mana ricui pudinguichu. Maijanpish ñucapac ñahuita ricushpaca, mana causangachu— nirca.

21Chashnallatac Mandac Diosca:

—Ñucapac cuchullapi shuc jatun rumi jahuapi shayari. 22Ñucapac sumaimana achiclla pasacpica, ñucaca cantaca jatun rumi jutcupi churashpami, ñuca pasangacaman maquihuan tapasha. 23Ña pasashca quipa, ñuca maquita anchuchicpica, ñuca ñahuitaca mana ricunguichu, ashtahuanpish ñucapac huashallatami ricungui— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index