Search form

ÉXODO 35

Samana punzhamanta

1Moisés tucui tandanacushca israelcunata tandachishpaca: «Mandac Diosca: 2“Sucta punzhata trabajanguichic. Canchisniqui punzhaca Diospaclla chicanyachishca punzhami. Chai punzhaca samarina punzhami. Maijanpish chai punzhapi imata ruhuacca huañungami. 3Samana punzhapica mai huasipipish ninata mana japichinachu” nishpami mandan» nirca.

Dios-huan tupana huasita ruhuangapac ofrendata cunamanta

(Ex 25.1-9)

4Moisesca tandanacushca israelcunataca: «Mandac Diosca: 5“Mandac Dios ñucaman cungapacca cancunapurallamanta ofrendata tandachichic. Tucui alli shunguyuc gentecuna curita, cullquita, bronceta, 6azul, morado, sani puca puchcacunata, sumac lino puchcata, chivo millmata apamuichic. 7Pucahuan tiñishca carnero oveja caratapish, tejón caratapish, acacia caspitapish apamuichic. 8Lamparacunapi churana aceitetapish, ñucapaclla chicanyachishca cachun cahuina aceitetapish, inciensota ruhuangapac mishquilla ashnacuctapish apamuichic. 9Cura churana efodta, pectoralta ruhuangapac ónice rumicunatapish, shuctac sumac jagan nicuc rumicunatapish apamuichic.

Dios-huan tupana huasimanta

(Ex 39.32-43)

10Cancunapuramanta maijan artesanocuna Mandac Dios mandashcata ruhuangapac shamuichic. 11Paicunami Dios-huan tupana huasi cata carpatapish, chai catapi churana ganchocunatapish, tablacunatapish, quingraiman churana caspicunatapish, pilarcunatapish, basacunatapish, 12Arcatapish, chai tapatapish, huanduna varacunatapish, Arcata catana pañotapish, 13mizatapish, chaita huanduna varacunapish, chaipi imalla churanapish, Mandac Dios ñucapaclla churana tandapish ruhuanga. 14Achicyachic candelerotapish, lamparacunatapish, chaipi churana aceitetapish, chaipi imalla churanacunatapish, 15inciensota rupachina altartapish, huanduna varacunatapish, Diospaclla chicanyachishca cachun cahuina aceitetapish, mishquilla ashnacuc aceitetapish, ñucahuan tupana huasiman yaicuna pungu jarcachina pañotapish ruhuanga. 16Tucuita rupachina altartapish, bronce parrillacunatapish, huanduna varacunatapish, chaipi imalla tiyashcacunatapish, yacuta churana pailatapish, chaita churanatapish ruhuanga. 17Chashnallatac ñucahuan tupana huasi canzha muyundita jarcachina pañotapish, pañota huarcungapac shayachinacunatapish, basacunatapish, canzha pambaman yaicuna pungupi jarcachina pañotapish, 18ñucahuan tupana huasita catashca carpa huatana ishtacacunatapish, huasi canzha pañocunata huatana ishtacacunatapish, huascacunatapish ruhuanga. 19Chashnallatac ñucahuan tupana huasipi ñucapacta ruhuaccunami churanacunatapish, Aarón churanatapish, paipac churicuna churanacunatapish ruhuanga” ninmi» nirca.

Israelcuna ofrendata cushcamanta

20Chaita uyashpami, israelcunaca Moisespac ñaupamanta rircacuna. 21Shinami tucui alli shunguyuc gentecunaca ofrendata Diosman cuna yuyaihuan apamurca. Mandac Dios-huan tupana huasitapish, curacuna churarinata ruhuangapacpish apamurcami. 22Alli shunguyuc caricunapish, huarmicunapish tucui munaihuanmi cadenacunata, sortejascunata, brazaletecunata, zarcillocunata, curimanta ruhuashca tucuilaya sumaccunata apamurca. 23Azul, morado, sani puca, sumac lino puchcacunatapish, chivo millmatapish, pucahuan tiñishca oveja caratapish, delfín caratapish apamurca. 24Pipish bronce ofrendata, cullqui ofrendata Diosman cungapac ari nishpaca, chaitami apamurca. Acacia caspita chariccunaca imata ruhuana cashcata ruhuangapacmi apamurca. 25Puchcac huarmicunaca paicunapac maquihuan puchcashpami azul, morado, sani puca, sumac lino puchcacunata apamurca. 26Allita puchcac huarmicunami chivo millmata sumacta puchcarca. 27Israelcunata mandaccunaca cura churana efodta, pectoralta ruhuangapacmi onicetapish, shuctac sumac achic nicuc rumicunatapish apamurca. 28Mishquilla ashnacuctapish, lámpara achicyachichun aceitetapish, Diospaclla chicanyarishca cachun cahuina aceitetapish, mishquilla ashnacuc inciensota ruhuana mishquilla ashnacuccunatapish apamurcami.

29Mandac Dios Moisesta mandashca shina ruhuarichunca, tucui alli shunguyuc israelcunami caricunapish, huarmicunapish tucui munaihuan Mandac Diosman cungapac apamurca.

Dios-huan tupana huasita ruhuaccunamanta

(Ex 31.1-11)

30Moisesca israelcunataca: «Riquichic, Mandac Diosca Judá aillupuramanta Uripac churi Bezaleeltami cayarca. Urica Hurpac churimi carca. 31Paipac Espirituta cushpami, tucuipi alli yachachishpa, imata ruhuanapipish alli yuyaita cushpa, yuyaisapata ruhuashca. 32Paica curimanta, cullquimanta, broncemanta paipac yuyaihuan tucui imatapish sumacta ruhuachun, 33rumicunata sumacta allichishpa, imapipish churana caspicunatapish sumacta allichichunmi acllarca. 34Paitaca alli yachachic cachunmi, paipac shungupi alli yuyaita curca. Dan aillupuramanta Ahisamacpac churi Aholiabtapish alli yachachic cachunmi churarca. 35Paicunatami imatapish sumacta ruhuachun, alli yachac cachun churarca. Azul, morado, sani puca puchcamanta, alli lino puchcamanta ahuashpa, sumacta bordashpa, tucuilaya ruhuanacunata paicunapac yuyaihuan ruhuaccunatami churarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index