Search form

ÉXODO 36

1Mandac Diosmi Bezaleelmanpish, Aholiabmanpish, yachac runacunamanpish paihuan tupana huasita ruhuachun, alli yachaita, alli yuyaita curca. Paicunami Mandac Dios mandashcata tucuita ruhuanga» nirca.

Ofrendata ama ashtahuan apamuchun nishcamanta

2Moisesca Bezaleeltapish, Aholiabtapish, Mandac Dios alli yuyaita cushca runacunatapish, shungumanta Diospacta ruhuana munaita charic runacunatapishmi cayarca. 3Paicunami Dios-huan tupana huasita ruhuachun, israelcuna apamushca, ofrendataca Moisesmanta chasquirca.

Cada tutamanta israelcuna ofrendata apamushpa caticpimi, 4tucui chaipi trabajaccunaca quiquin ruhuaita saquishpa, 5Moisespacman rirca. Chashna rishpaca: «Israelcunaca Mandac Dios mandashcamanta yallitami ofrendataca apamucuncuna» nirca.

6Chaimantami Moisesca tucui carpa huasicunaman rishpa:

«Caricunapish, huarmicunapish Dios-huan tupana huasita ruhuangapac ama ashtahuan ofrendata apamuichicchu» nishpa jarcarca. Chashnami tucui israelcuna apamucucta jarcachirca. 7Dios-huan tupana huasita ruhuangapacca yalli yallitami charirca.

Dios-huan tupana huasita ruhuashcamanta

(Ex 26.1-37)

8Dios-huan tupana huasita ruhuac alli yuyaiyuc runacunaca lino puchcahuan, ahuashpa chunga morado puca pañohuanmi ruhuarca. Chaipica querubincunatami bordashpa ruhuarca. 9Chai pañoca sunimanca chunga ishcai metro chaupi, anchomanca ishcai metromi carca. Tucui pañocunami igual carca. 10Chai pañotaca pichca pañocunata tinguishpami ruhuarca. Chashnallatacmi caishuc pañotapish ruhuarca. 11Chai pañopica ishcai pañopitacmi azul puchcamanta ringricunata ruhuarca. 12Chai paño esquinacunapica pichca chunga ringritami punta pañopipish, quipa pañopipish ruhuarca. Chai ringricunataca ringripura chimbanacushcatami ruhuarca. 13Pichca chunga curi argollatapish ruhuarcami. Chaicunahuan tinguicpimi, shuclla shina Dios-huan tupana huasica saquirirca.

14Dios-huan tupana huasi jahuapi churangapacpish chivo millmamantami chunga shuc pañota ruhuarca. 15Chai pañoca sunimanca chunga quimsa metro, anchomanca ishcai metromi carca. Chai tucui pañocunaca igualmi carca. 16Shuc pañotaca pichca pañota tinguishpa, cutin caishuc pañotaca sucta pañota tinguishpami ruhuarca. 17Punta paño uraipipish, quipa paño uraipipish pichca chunga ringritami ruhuarca. 18Broncemanta pichca chunga argollata ruhuashpami, ishcai uraipi tinguirca. Chashnami chai pañoca shuclla jatun paño saquirirca.

19Chai huasi jahuata catangapacca oveja caratami pucapi tiñirca. Chai jahua catataca delfín caramantami ruhuarca. 20Chai huasita shayachingapacca acacia caspimantami tablacunata ruhuarca. 21Chai tablacunaca sunimanca chuscu metro chaupi, anchomanca sucta chunga centimetromi carca. 22Tucui tablacunami tablapura tupanacuchingapac ishcai espigayuc carca. Shinami chai huasita ruhuangapacca tucui tablacuna chai shinallatac carca. 23Chai huasimanta uraman churangapacca ishcai chunga tablatami ruhuarca. 24Chai tablacunata shayachingapacca cullquimantami chuscu chunga basata ruhuarca. Ishcai basataca shuc tabla ucupimi churarca. Chai basacunapimi tablapac ishcai espigata satichishpa shayachirca. 25Jahua lado quingraipi churangapacca ishcai chunga tablatami ruhuarca. 26Chai tablacunata shayachingapacpish chuscu chunga cullqui basatami ruhuarca. Chai basacunata cada tablapi ishcaita churangapacmi ruhuarca. 27Inti yaicuna ladopi churangapacca sucta tablatami ruhuarca. 28Ishcai lado esquinapica churangapacca ishcai tablatami ruhuarca. 29Chaicunaca uramanpish, jahuamanpish tupachinacushpa, alli churanallami carca. Chashnami ishcai tablataca ishcai esquinapacta ishcai ishcaita ruhuarca. 30Shinami pusac tablaca chunga sucta cullqui tablapi churashca carca. Cada shuc tablami ishcai basata charirca.

31Dios-huan tupana huasi tablacunata charichunca, pichca quingrai caspicunatami acacia caspimanta ruhuarca. 32Caishuc lado quingraiman cac tablacunata charichunpish, huashaiman cac tablacunata charichunpish, inti tigrana ladoman cac tablacunata charichunpish pichca caspitami quingraiman churangapac ruhuarca. 33Chaupi tabla quingraita ricuc caspitaca caishuc cuchumanta, chaishuc cuchumanmi churarca. 34Tablacunataca curihuanmi jahuata cahuirca. Quingrai caspicunata churana argollacunataca curimantami ruhuarca. Quingrai caspicunatapish curihuanmi cahuirca.

35Jarcachina pañotapish, azul, morado, sani puca pañota lino puchcamanta ahuashpami, chai jahuapica ishcai querubincunata bordarca. 36Chai telata huarcungapacca acacia caspimantami chuscu pilarta ruhuarca. Chai pilarcunatapish curihuanmi jahuata cahuirca. Chai pilarcunapi huarcungapacca curillamantatacmi capitelcunatapish ruhuarca. Chaicunata shayachingapacca cullquimantami chuscu basata ruhuarca.

37Huasi pungupi jarcachina pañotaca azul pañota, morado pañota, sani puca pañotami lino puchcamanta ahuashpa, sumacta bordashpa churarca. 38Pichca pilarcunatami ganchocunahuan ruhuarca. Chai pilarcunata shayachina basacunataca broncemantami ruhuarca. Chaicunataca curihuanmi pilar tucuritapish, capitelcunatapish cahuirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index