Search form

ÉXODO 38

Bronce altartamanta

1Animalta cushpa, tucuita rupachina altartapish acacia caspimantami ruhuarca. Chai altartaca cuadrado, sunimanpish, anchomanpish ishcai metro yallimi carca. Altomanca shuc metro chaupimi carca. 2Altarpac chuscu esquinapica gachucunatami ruhuarca. Chai gachucunaca altarhuan shucllata ruhuashcami carca. Chai altar gachucunataca broncehuanmi jahuata cahuirca. 3Chashnallatac altarpi ima tiyaccunatapish broncemantami ruhuarca. Chaicunaca uchupata churana platocuna, garfiocuna, palacunami carca. 4Broncemanta rejillacunata ruhuashpami, altar muyundita chaupicaman churarca. 5Bronce rejillacunata ruhuashpami chuscu esquinapi huandungapac chuscu argollata ruhuarca. 6Chashnallatacmi acacia caspimanta varacunata ruhuashpa, jahuataca broncehuan cahuirca. 7Chai caspicunataca altar ladopi churashca argollacunapimi huandungapac churarca. Chai altarca tablacunamanta ruhuashca chushacllami carca.

8Shinallatac pailatapish, chaita tiyachinatapish broncemantami ruhuarca. Chaicunataca Mandac Dios-huan tupana huasi pungupi cac servic huarmicunapac espejocunamantami ruhuarca.

Carpa huasi canzha pambamanta

(Ex 27.9-19)

9Dios-huan tupana huasi canzha pambatapish ruhuarcami. Ura ladotaca lino puchcahuan ruhuashca pañohuanmi jarcarca. Chai pañoca sunimanca chuscu chunga pichca metromi carca. 10Chai pañota huarcungapacca ishcai chunga pilarcunatami broncemanta ruhuashca basacunapi shayachingapac ruhuarca. Pilar umacunapi churangapacca ganchocunatapish, anillocunatapish cullquimantami ruhuarca. 11Jahua ladoman cac pañopish chuscu chunga pichca metromi carca. Chai pañota huarcungapacpish ishcai chunga pilarcunatami broncemanta ruhuashca basapi shayachirca. Pilar umacunapi churangapac ganchocunatapish, anillocunatapish cullquimantami ruhuarca. 12Inti tigrana ladoman cac pañoca sunimanca ishcai chunga quimsa metromi carca. Chai pañota huarcungapacca chunga pilartami chunga basapi shayachirca. Chai pilar umacunapi churangapac ganchocunatapish, anillocunatapish cullquimantami ruhuarca. 13Inti llucshina ladoman cac pañopish ishcai chunga ishcai metro chaupimi carca. 14Pungu yaicuna shuc ladoman cac pañoca sucta metro canchis chunga pichca centimetromi carca. Chashnallatac pilarcunapish, basacunapish quimsami carca. 15Ucu pambaman yaicuna pungu caishuc ladoman cac pañopish sucta metro canchis chunga pichca centímetro sunimi carca. Chai pañota huarcungapacca quimsa pilarcunatami quimsa basacunapi shayachirca. 16Canzha pamba muyundi pañoca lino puchcahuan ruhuashcami carca. 17Pilarcunata shayachina basacunaca broncemantami carca. Chai pilarcunapi churashca ganchocunapish, anillocunapish cullquimantami carca. Canzha pambapi cac pilarcunapi churashca anillocunaca cullquimantami carca.

18Canzha pambaman yaicuna pungupi cac pañoca caupushca azul, morado, sani pucahuan sumacta bordashcami carca. Chai pañoca sunimanca iscun metro, anchomanca ishcai metro yallimi carca. Chaica canzha pambapi churashca paño shinallatacmi carca. 19Chaipica chuscu pilarpish, broncemanta ruhuashca chuscu basapishmi carca. Capitelcunaca cullquimantami carca. Capitelcunapish, molduracunapish jahuata cullquihuan cahuishcami carca. 20Carpa huasipi shayachishca tucui ishtacacunapish, canzha pamba muyundipi churashca ishtacacunapish broncemantami carca.

Dios-huan tupana huasi ruhuanapi imalla yaicushcamanta

21Moisés mandashcamantami Aaronpac churi Itamarca Dios-huan tupana huasi ruhuanapi, Dios-huan ari nishcata quillcata huacaichina ruhuanapi mashnalla yaicushcata levitacunata quillcachirca.

22Mandac Dios Moisesta mandashcataca Judá aillupuramanta Uripac churi, Urpac nieto Bezaleelmi ruhuarca. 23Paitaca Dan aillupuramanta Ahisamacpac churi Aholiabmi ayudarca. Paica fierrota huactashpa imatapish sumacta ruhuacpish, azul, morado, sani puca lino puchcamanta sumacta bordacpishmi carca.

Diospaclla huasi ruhuanapi imalla yaicushcamanta

24Dios-huan tupana huasipish, ima shuctac ruhuanacunapish yaicushca Diosman cushca curica iscun patsac sucta chunga pichca kilo, quimsa chunga gramosmi carca. Chaica Dios-huan tupana huasi ucupi tiyac pezashca cullqui shinami carca.

25Tandanacushca israelcunapac shuticunata quillcashpa, japishca cullquica quimsa huaranga quimsa patsac chunga iscun kilo, pichca patsac ishcai chunga gramosmi carca. Chaica, Dios-huan tupana huasipi cac pezashca cullqui shinami carca. 26Ishcai chunga huatamanta callarishpa, paicunapac shuticunata quillcashcaca sucta patsac quimsa huaranga pichca patsac pichca chunga gentemi carca. Tucui paicunami carpa huasipi pezashca shinallatac pichca gramo chaupi cullquita curca. 27Diospac carpa huasi pilarcunata shayachina basacunatapish, paño huarcuna pilarcunapac basacunatapish ruhuangapacca quimsa huaranga quimsa patsac kilo cullquitami yacuyachirca. Tucui cai cullquica patsac basapimi yaicurca. Chashnaca cada basapimi quimsa chunga quimsa kilo yaicurca. 28Huaranga canchis patsac canchis chunga pichca cullquihuanca pilarpi tiyac ganchocunata, capitelcunatami ruhuarca.

29Diosman cushca bronceca huaranga quimsa patsac quimsa chunga sucta kilo, chuscu patsac gramomi carca. 30Chai broncehuanca Dios-huan tupana huasiman yaicuna pungu broncemantami basacunatapish, altartapish, rejillacunatapish, altar jahuapi tucui tiyaccunatapish, 31canzha pamba muyundi basacunatapish, canzha pambaman yaicuna pungu basacunatapish, carpa huasipi shayachishca ishtacacunatapish, canzha pamba muyundi shayachishca tucui ishtacacunatapishmi ruhuarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index