Search form

ÉXODO 39

Curacunapac churanacunata ruhuashcamanta

(Ex 28.1-43)

1Dios-huan tupana huasipi serviccuna churarichunca azul, morado, sani puca puchcamantami sumacta ruhuarca. Mandac Dios Moisesta mandashca shinallatacmi Aaronmanca Diospaclla chicanyachishca churanacunata ruhuarca.

2Efodtaca curimanta, azul, morado, sani puca shinallatac caupushca lino puchcamantami ruhuarca. 3Curita martillohuan huactashpa, ñañu curi puchcata ruhuashpami azul, morado, sani puca, lino puchcahuan ahuashpa, bordashpa ruhuarca. 4Chai churanacunataca ishcai puntapi japishpa sirangapacca, ishcai hombreratami ruhuarca. 5Mandac Dios Moisesta mandashca shinallatacmi efodta huatallina curi puchcahuan, azul, morado, sani puca, lino puchcahuan ahuashpa, bordashca carca.

6Ónice rumita allichishpa, curihuan jahuata cahuishpa, engaste jahuapi sellota churac shinami, Israelpac churicunapac shuticunata fierrohuan aspishpa quillcarca. 7Chai rumicunataca efodpac hombreracunapimi israelcunata yuyarichun, Mandac Dios Moisesta mandashca shinallatac churarca.

8Pectoraltapish, efodta ruhuashca shinallatacmi curihuan, azul, morado, sani puca, lino puchcahuan ruhuarca. 9Chai pectoralca patarishcami carca. Cuarta ancho, cuarta sunimi carca. 10Chai pectoralpica chuscu filo rumicunatami churarca. Punta filopica sardio, topacio, carbunclo rumicunatami churarca. Chaimi punta callari filaca carca. 11Ishcainiqui filapica esmeralda, zafiro, diamante rumicunatami churarca. 12Quimsaniqui filapica jacinto, ágata, amatista rumicunatami churarca. 13Chuscuniqui filapica berilo, ónice, jaspe rumicunatami churarca. Tucui chai rumicunatami canichishpa, churana ruhuashca curi engastepi churarca. 14Chai rumicunaca Israelpac chunga ishcai aillucunata yuyaringapacmi chunga ishcai rumicunallatac carca. Chai rumipica Israelpac churicunapac shuticunata ima shina cashca shinallatac quillcashcami carca. Chaipica chunga ishcai aillucunapac shuticunami, cada rumipi sellota churac shina, quillcashca carca.

15Chai pectoral jahuapica caupushca cordón shinatami, alli curimanta cadenacunata ruhuarca. 16Ishcai engastetapish, ishcai argollatapish curimantami ruhuarca. Chaicunataca pectoralpac jahua lado ishcai esquinapimi churarca. 17Curimanta ruhuashca ishcai cadenataca pectoralpac jahua lado esquinacunapi churashca sortejascunapimi huatarca. 18Ishcai cadenapac puntacunapica hombrera jahuapi churashca huatanacunapimi huatarca. Efod churana ishcai engaste jahuapi churashca chumbillapitacmi ñaupa ladoman alli churarca. 19Curimanta ishcai sortejasta cutin ruhuashpami, pectoralpac ucu lado esquinapi churarca. Chaitaca efodpac ñaupa ucu ladopimi churarca. 20Cutinllatac ishcai sortejasta curimanta ruhuashpami, efodpac ishcai hombrera ñaupa ucu ladoman churarca. Chaitaca cintura jahua lado sirashca cuchupimi churarca. 21Mandac Dios Moisesta mandashca shinallatacmi pectoralpac sortejascunataca efodpac sortejascunapi azul puchcahuan huatarca. Chashna ruhuacpimi, pectoralca efodmanta mana chicanyashpa, chumbillina jahua ladollapitac carca.

22Efodpac jahuata churanataca azul puchcahuan alli ahuaccuna shinallatacmi ruhuarca. 23Chai churanaca cushmalayami carca. Chai cuello muyunditaca ama lliquirichunmi patarishca carca. 24Chai churana muyunditaca azul, morado, sani puca, lino puchcahuanmi granadata ruhuarca. 25Uchilla campanacunatapish curimanta ruhuashpami, jahuata churana filo muyundi granada chaupicunapi churarca. 26Mandac Dios Moisesta mandashca shinallatacmi paitaca servingapacca shuc campanilla, chai huashapica shuc granada, caishuc campanilla huashapica caishuc granadata churana filocunapi churarca.

27Aaronmanpish, paipac churicunamanpish lino puchcamantami alli ahuaccuna shinallatac tunicata ruhuarca. 28Mitratapish, umapi allichishpa churana tiaratapish, calzoncillocunatapish lino puchcamantami ruhuarca. 29Mandac Dios Moisesta mandashca shinallatacmi chumbitapish azul, morado, sani puca, lino puchcahuan alli bordac shinallatac ruhuarca.

30Shinallatac Mandac Diospac cura cashcata ricuchingapacca curimantami shuc latata ruhuashpa, chaipica «DIOSPACLLA CHICANYACHISHCAMI» nishpa, shuc sellota shina quillcarca. 31Mandac Dios Moisesta mandashca shinallatacmi chai latapica azul huatuta churashpa, mitra jahuapi churangapac chashna ruhuarca.

Dios-huan tupana huasita tucuchishcamanta

(Ex 35.10-19)

32Chashnami Dios-huan tupana huasita ruhuashpa tucuchirca. Mandac Dios Moisestaca mandashca shinallatacmi tucuita ruhuarca. 33Ganchocunatapish, tablacunatapish, barracunatapish, pilarcunatapish, basacunatapish apamurca. 34Jahuata catangapacca pucahuan tiñishca oveja caratapish, jahuata catana delfín caracunatapish, ñaupapi churana pañocunatapishmi apamurca. 35Dios ari nishca quillcata huacaichina Arcatapish, chaita huanduna varacunatapish, chai tapatapish apamurcami. 36Shinallatac Mizatapish, mizapi churana vasocunatapish, Diosman cuna tandatapish, 37alli curimanta ruhuashca candelerotapish, chaipi churana lamparacunatapish, chaipi imalla tiyaccunatapish, luzta japichina aceitetapish apamurcami. 38Curimanta ruhuashca altartapish, Diospaclla cachun cahuina aceitetapish, mishquilla ashnacuc inciensotapish, Dios-huan tupana huasi pungupi huarcuna pañotapish apamurcami. 39Broncemanta ruhuashca altar rejillacunatapish, altarta huanduna varacunatapish, chaipi tucui imalla tiyaccunatapish, maquita jahuarina jatun pailatapish, pailata tiyachina basatapish apamurcami. 40Canzha pamba muyundipi churana cortinatapish, shayachina caspicunatapish, basacunatapish, canzha pambaman yaicuna pungu cortinacunatapish, huascacunatapish, ishtacacunatapish, Diospac carpa huasipi servingapac tucui imalla minishtishcatapish apamurcami. 41Dios-huan tupana huasipi servingapac churanacunatapish, Aarón curapac sumac churanacunatapish, paipac churicuna servingapac churanacunatapish apamurcami.

42Mandac Dios Moisesta mandashca shinallatacmi israelcunaca tucuita ruhuarca. 43Mandac Dios mandashca shinallatac ruhuashcatami Moisesca ricurca. Chaita ricushpami bendiciarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index