Search form

ÉXODO 4

1Chaimantami Moisesca:

—Ñuca chashna nicpipish, paicuna mana crishpa, mana cazushpa: “Mandac Diosca, mana ricurishcangachu” nicpica, ¿imatatac nisha?— nirca.

2Shina nicpimi, Mandac Diosca:

—¿Imatatac maquipi charicungui?— nirca.

Shina nicpimi Moisesca:

—Shuc taunatami charicuni— nirca.

3Shina nicpica, Mandac Diosca:

—Pambaman shitai— nirca.

Chaita pambaman shitacpica, culebrami tucurca. Moisesca manchashpami, chaimanta anchurirca. 4Chaimantami Mandac Diosca Moisestaca:

—Maquihuan chupapi japiri— nirca.

Moisés maquihuan chupapi japiricpica, taunami tucurca.

5Shinallatac Mandac Diosca:

—Caita ruhuacpimi, Abrahampac, Isaacpac, Jacobopac Mandac Dios ricurishcata cringacuna— nirca.

6Cutinllatac Mandac Diosca:

—Cunanca, cambac maquita quinzhupi sati— nirca.

Chaipimi paica maquita quinzhupi satirca. Maquita quinzhumanta llucchicpica, sisu ungüihuan rasu shina yurac maquimi llucshirca. 7Chaimantami Mandac Diosca:

—Maquita quinzhupi cutin sati— nirca.

Paica cutinllatacmi quinzhupi satirca. Maquita quinzhumanta llucchicpica, mana ima tucushca, alli maquimi llucshirca.

8Cutinllatac Mandac Diosca:

—Cunan pi mana ruhuaipacta ruhuashpa ricuchishcata mana crishpa, mana cazushpaca quipata pi mana ruhuaipacta ruhuashpa ricuchicpimi cringacuna. 9Cai quipata ruhuashcata ricushpapish mana crishpa, mana cazucpica, jatun yacumanta yacuta huishishpa, allpapi tallingui. Shina tallicpica, yacuca yahuarmi tucunga— nirca.

10Chaimantami Moisesca Mandac Diostaca:

—Ñucata Mandac Dioslla, ñucaca alli rimacca jaicapi mana cashcanichu, cunanpish mana alli rimacchu cani. Ñucaca callu huataricunillami— nirca.

11Mandac Diosca:

—¿Pitac runamanca shimita curca? ¿Pitac mana rimactapish, ringri mana uyactapish, ñahui mana ricuctapish ruhuarca? ¿Manachu Mandac Dios ñucallatac ruhuarcani? 12Chaimanta cunanca ri. Ñucami canhuanca casha, imata rimana cacpipish, ñucallatacmi rimachisha— nirca.

13Chaimantami Moisesca:

—¡Ñucata Mandac Dioslla, ñucapac randica shucta cachai!— nirca.

14Shina nicpimi, Mandac Dios piñarishpa Moisestaca:

—Ñucaca levitapuramanta cambac huauqui Aarón alli rimac cashcataca, ¿manachu yachani? Paica ñami canhuan tupangapac llucshinga. Ña llucshishpaca, tucui shunguhuan cushicungami. 15Imata can ninataca paiman tucui huillangui. Ñucami can rimacpipish, pai rimacpipish imata rimanata yachachisha. 16Cambac randica, paimi can shina gentecunamanca rimanga. Canca ñucapac randimi paimanca rimangui. 17Cai taunata cambac maquipi apai, cai taunahuanmi mancharina ricuchinacunata ricuchingui.

Moisés Egiptoman cutishcamanta

18Moisesca paipac suegro Jetropacman cutishpaca:

—Ñuca huauquicunapacmanmi, paicuna causacushcata, mana causacushcata yachangapac Egiptoman cutirigrini— nirca.

Shina nicpimi Jetroca:

—Allilla ringui— nirca.

19Madianpi cacpimi, Mandac Diosca Moisestaca:

—Canta huañuchishun niccunaca tucuimi huañurca. Chaimanta Egiptoman cutishpa rilla— nirca.

20Moisesca paipac huarmitapish, huahuacunatapish burropi tiyachishpami Egiptoman cutirca. Dios cushca taunatapish apashpami cutirca. 21Mandac Diosca Moisestaca:

—Egiptoman cutishpa, Faraonpac ñaupapi tucui ñuca ruhuachun nishca ricuchinacunata ruhuashpa ricuchingui. Ashtahuanpish ñucaca paipac shunguta sinchiyachishami. Shina ruhuacpica, israelcunataca mana cacharingachu. 22Chaimanta Faraontaca: “Mandac Diosca: ‘Israelca ñuca punta churimi. 23Ñuca huahuacuna ñucata servingapac richun saqui. Mana richun saquicpica, punta cari huahuacunatami huañuchigrini’ ninmi” ningui— nirca.

24Moisés cutishpa, ñanpi samaricucpimi, Mandac Diosca shuc tuta tupangapac llucshishpa, paita huañuchisha nirca. 25Chaimantami Seforaca rumi cuchillota japishpa, paipac churita circuncisionta ruhuashpa, Moisespac chaquipi tupachirca. Chashna tupachishpaca: «Cunanca ñuca quiquin yahuar cusami cangui» nirca.

26Chaimantami Mandac Diosca Moisesta cacharca. Seforaca: «Circuncisionta ruhuashcamantami ñuca quiquin yahuar cusa cangui» nishca carca.

27Mandac Diosca Aarontaca:

—Shitashca pambapi Moisesta tupagri— nirca.

Aarón tupangapac rishpa, Mandac Diospac urcupi Moises-huan tupashpa mucharca. 28Chaipimi Moisesca Mandac Dios imata nishcatapish, mancharina ricuchinacunata ruhuashpa ricuchichun cachashcatapish tucui huillarca.

29Moisespish, Aaronpish rishpami, tucui israelcunata pushac yuyaccunata tandachirca. 30Chashna tandachishpami, Aaronca Mandac Dios Moisesta imata nishcata tucui huillarca. Shinallatac mancharina ricuchinacunatapish ruhuashpa ricuchina cashcata ricuchirca. 31Chai huillashcata uyashpaca, paicuna llaquita apacucta ricushpa, ayudangapac shamushcata yachashpami, israelcunaca crircacuna. Chaimantami Mandac Diostaca cumurishpa, allimari cangui nircacuna.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index