Search form

ÉXODO 40

Dios-huan tupana huasita Moisés shayachishcamanta

1Chai quipami Mandac Diosca Moisestaca:

2«Callari quilla, callari punzhapica ñucahuan tupana huasita shayachingui. 3Ñucahuan tupana huasipica ari nishca quillcata huacaichina Arcataca pañohuan catangui. 4Mizata ucuman yaicuchishpa, sumacta allichishpa churangui. Candelerotapish ucuman yaicuchishpa, lamparacunapi luzta japichishpa churangui. 5Dios ari nishca quillcata huacaichina Arca ñaupapica inciensota rupachina curi altarta churangui. Ñucahuan tupana huasiman yaicuna pungu ñaupapi pañocunata huarcungui. 6Chai quipaca ñucaman cushpa rupachina altartaca ñucahuan tupana huasi pungu yaicuna ñaupapi churangui. 7Chaimantaca jatun pailataca ñucahuan tupana huasi altar chaupipi churashpa, yacuta jundachingui. 8Ña tucuchishpaca, canzha pamba muyundita allichishpa, pañota canzha pambaman yaicunapi churangui.

9Chai quipaca cahuina aceiteta japishpa, ñucahuan tupana huasitapish, chaipi tiyaccunatapish aceitehuan cahuingui. Chashna ruhuashpami, tucui chaipi imalla tiyaccunatapish ñucapaclla cachun chicanyachingui. Chashnami ñucapaclla canga. 10Shinallatac tucuita rupachina altartapish, chaipi tucui ima tiyaccunatapish aceitehuan cahuishpa, ñucapaclla cachun chicanyachingui. Chashnami ñucapaclla canga. 11Pailatapish, pailata tiyachina basatapish, aceiteta tallishpa, ñucapaclla cachun chicanyachingui.

12Aarontapish, paipac churicunatapish ñucahuan tupana huasi punguman pushashpa, yacuhuan armachingui. 13Aarontaca ñucapaclla chicanyachishca churanacunata churachishpa, aceiteta tallishpa chicanyachingui. Chashna ruhuacpimi, ñucapaclla cura canga. 14Chai quipaca paipac churicunata pushamushpa, tunicata churachingui. 15Shinallatac Aaronta ima shinami aceitehuan cahuishca shinallatac, paipac churicunatapish ñucapaclla chicanyachishca curacuna cachun aceitehuan cahuingui. Chai aceitehuan cahuicpica, paicunapac huahua huahuacunapish huiñaitami ñucapaclla curacuna canga» nirca.

16Moisesca Mandac Dios mandashca shinallatacmi tucuita ruhuarca. 17Quipa huata, callari quilla, callari punzhapimi Dios-huan tupana huasitaca shayachirca. 18Chai punzhapimi Dios-huan tupana huasita shayachingapac Moisesca basacunata tiyachishpa, tablacunata shayachishpa, barracunata churarca. Shinallatac pilarcacunatapish shayachircami. 19Moisesca Mandac Dios mandashca shinami Dios-huan tupana huasita catarca. Chai jahuataca ashtahuan alli carpahuanmi catarca.

20Chai quipami ari nishca quillcata japishpa Arca ucupi churarca. Huanduna varacunatapish, Arca tapatapish churarcami. 21Quipaca Dios-huan tupana huasiman Arcata yaicuchishpami, Moisesca Mandac Dios mandashca shinallatac ari nishca quillcata huacaichina Arcataca shuc pañohuan taparca. 22Dios-huan tupana huasi ucupimi mizatami churarca. Chaitaca Diospaclla cac ucuta jarcashca paño jahua ladomanmi churarca. 23Moisesca Mandac Dios mandashca shinallatacmi chai miza jahuapica Diosman cuna tandata allichishpa churarca.

24Dios-huan tupana huasi ucupi churana candelerotaca paño ura lado miza ñaupapimi churarca. 25Moisesca Mandac Dios mandashca shinallatacmi lamparacunataca Diospac ñaupapi japichirca.

26Shinallatac Dios-huan tupana huasi ucupimi curi altartaca Diospaclla ucuta jarcashca paño ñaupapi churarca. 27Chai altarpica Mandac Dios Moisesta mandashca shinallatacmi mishquilla ashnacuc inciensota rupachirca.

28Chashnallatac Dios-huan tupana huasi yaicunapica pañotami churarca. 29Chaiman yaicuna pungupica tucuita rupachina altartami churarca. Chaimi Mandac Dios mandashca shinallatac animalcunatapish, ofrendacunatapish Diosman cushpa rupachirca.

30Dios-huan tupana huasihuan, altarhuan tupanacuipipimi pailapi maquita jahuaringapac yacuta jundachirca. 31Chai yacupimi Moisespish, Aaronpish, paipac churicunapish maquicunata, chaquicunata jahuac carca. 32Dios-huan tupana huasiman yaicungapac, altarman cuchuyangapacca Mandac Dios Moisesta mandashca shinallatacmi jahuarirca.

33Ña tucuchishpaca Dios-huan tupana huasi canzha pamba muyunditapish, altar canzha pamba muyunditapish jarcarcami. Canzha pambaman yaicuna pungupipish pañota churarcami. Chashnami Moisesca tucui ruhuana cashcata tucuchirca.

Mandac Dios-huan tupana huasipi

sumaimana achic nicuc jundashcamanta

(Num 9.15-23)

34Chai quipami Dios-huan tupana huasitaca puyu taparca. Shinallatac Dios-huan tupana huasipica Diospac sumaimana achicmi jundarca. 35Dios-huan tupana huasi jahuata puyu tapashcamantapish, Mandac Diospac sumaimana achiclla jundashcamantapishmi Moisesca mana chaiman yaicui pudirca.

36Dios-huan tupana huasi jahuamanta puyu anchuricpimi, israelcunaca puri callarirca. 37Ashtahuanpish puyu anchuringacamanmi paicunaca maiman mana cuyurircacuna. 38Dios-huan tupana huasi jahuapica punzhaca puyumi carca. Tutaca ninami achicyachishpa, tucui israelcunapac purinapi carca. Chashnami tucui ñanta pusharca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index