Search form

ÉXODO 5

Moisespish, Aaronpish Faraonpacman rishcamanta

1Chaimanta Moisespish, Aaronpish Faraonpacman yaicushpaca:

—Mandac Diosca Israeltaca: “Ñuca acllashca israelcuna shitashca pambapi ñucata jatunyachishpa cushicugrichun saqui” ninmi— nirca.

2Shina nicpimi Faraonca:

—Pai rimashcata uyashpa richun saquingapacca, ¿pitac Mandac Diosca? Mandac Dios nishcataca mana ricsinichu. Israelcuna richunpish mana saquishachu— nirca.

3Chashna nicpimi paicunaca:

—Israelcunapac Diosmi ñucanchicman ricurirca. Chaimantami cunanca quimsa punzhata purishpa, chai shitashca pambapi animalta rupachishpa, Mandac Diosman cugrinchic. Ñucanchic mana chaita ruhuacpica, ungüihuan, mana cashpaca espadahuan huañuchingami— nirca.

4Chaimantami Egipto llactata jatun mandacca:

—Moisespish, Aaronpish, ¿ima nishpatac alli trabajacuc gentecunata jarcachisha ninguichic? Cancunapac trabajollamantac catichic. 5Ari, cai llactapica gentecunaca achcami. Shina cacpipish, cancunaca cai gentecuna alli trabajacuctami jarcachisha ninguichic— nirca.

6Chai punzhallatacmi Faraonca paipac mayoralcunatapish, israelcunata trabajachiccunatapish rimashpaca:

7—Paicuna ladrillota ruhuachunca, ama utcapi cushca shina, ucshata cunguichicchu. Ashtahuanpish paicunallatacmi ucshata mashcagrina can. 8Utcaman mashna ladrillota ruhuac cashca shinallatacmi cunanpish ruhuana can. Quillamantami paicunaca: “Animalcunata rupachishpa, ñucanchic Diosta yuyaringapac jacuchic” nishpa caparicun. 9Paicunaman ashtahuan achca trabajota cuichic. Chashna ruhuacpimi, chai llullashpa rimashcataca mana uyangacuna— nirca.

10Shina nicpimi, Faraonpac mayoralcunapish, israelcunata trabajachiccunapish chaimanta llucshishpaca:

—Faraonca: “Ñucaca ña mana ucshata cugrinichu. 11Cunanca, cancunallatac mashcangapac richic. Shina cashpapish utcapi mashna ladrillota ruhuac cashca shinallatacmi ruhuana canguichic” ninmi— nirca.

12Chaimantami israelcunaca tucui Egipto llactata rishpa, ucshapac randica tamota mashcangapac rirca. 13Trabajachiccuna llaquichishpaca:

—Utcapi ucshata cucpi, mashna ladrillota ruhuac cashca shinallatacmi cunanpish ruhuana canguichic— nirca.

14Chaipac jahuapica, Faraonpac trabajachiccunaca, Israel mayoralcunataca:

—¿Ima nishpatac cainapish, cunanpish utcapi mashna ladrillota ruhuac cashca shinallatac mana ruhuanguichic?— nishpami macarca.

15Chaimantami Israel mayoralcuna Faraonpacman rishpaca:

—¿Ima nishpatac canta servic ñucanchictaca cashna llaquichinguiyari? 16Canta servic ñucanchicmanca ucshata mana cunchu. Shina cashpapish utcapi mashna ladrillota ruhuac cashca shinallatac, ¡cunanpish ruhuai nincunami! Chashnami canta servic ñucanchicta macashpa llaquichincuna. Chashna mana ucshata cushcamantaca cambac mandaccunallatacmi juchayuc— nirca.

17Shina nicpimi Faraonca:

—¡Cancunaca quilla gentecunami canguichic! Chashna cashpami: “Animalta rupachishpa, Mandac Diosman cugrishun” ninguichic. 18Utca ladrillota ruhuangapac richic. Ucshata mana cucpipish, ladrillotaca utcapi mashna ruhuac cashca shinallatac ruhuagrichic— nirca.

19Paicunata: “Utcapi mashna ladrillota ruhuac cashca shinallatac punzhanta ruhuaichic” nishpa mandacpimi, Israel mayoralcunaca llaquilla tucurca. 20Paicuna Faraonpacmanta llucshishpaca, Moises-huan, Aaronhuanmi tuparca. Paicunaca shayashpami shuyacurca. 21Shina tupashpaca:

—Cancunallatacmi ñucanchictaca Faraonpac ñaupapi millanata ruhuashcanguichic. Cancunallatacmi ñucanchicta huañuchichun, espadata paicunapac maquipi churac shina ruhuashcanguichic. Chaita ruhuashcamantaca Mandac Diosllatac ricushpa taripashpa llaquichichun— nirca.

Mandac Diosta Moisés mañashcamanta

22Chaimantami Moisesca Mandac Diostaca:

—Mandac Dioslla, ¿ima nishpatac israelcunataca cashna llaquichingui? ¿Imapactac ñucataca cacharcangui? 23Ñuca Faraonpacman rishpa, cambac shutipi huillacpica, israelcunataca yallitami llaquichi callarin. Shina cacpipish, can acllashcacunata cacharichichunca, canca imata mana ruhuanguichu— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index