Search form

ÉXODO 6

1Shina nicpimi, Mandac Diosca Moisestaca:

—Cunanmi ñuca Faraonta imata ruhuacta ricungui. Ñuca poderhuan llaquichicpimi cacharinga. Sinchita llaquichicpimi, paipac llactamanta llucchishpa cachanga— nirca.

2Cutinllatac Diosca Moisestaca:

—Ñucaca Mandac Diosmi cani. 3Ñucami tucui imatapish ruhuaclla Dios cani. Ñucami Abrahammanpish, Isaacmanpish, Jacobomanpish ricurircani. Shina cashpapish, ñucaca Mandac Dios shuti cashcataca paicunamanca mana ricsichircanichu. 4Canaán llactata cusha nishpami, paicunahuan ari ninacurcani. Chai llactapimi paicunaca pozashpalla causarca. 5Shinallatac Egipto runacuna israelcunata achcata servichicpi, paicuna llaquihuan caparishcata uyarcanimi. Paicunahuan ari nishcatapish yuyarircanimi. 6Chaimanta israelcunataca: “Ñucami Mandac Dios cani. Ñucami Egiptomanta, shinallatac chaipi llaquita trabajacushcamanta llucchisha. Egipto gentecuna llaquichishpa charicushcamanta maquita alzashpa, mancharinacunata ricuchishpa llucchisha. 7Ñucapaclla acllashca llactata ruhuashpami, cancunapac Dios casha. Chaimantami Egiptopi sinchi trabajacushcamanta llucchic, shinallatac cancunata Mandac Dios cashcata yachac chayanguichic. 8Abrahammanpish, Isaacmanpish, Jacobomanpish cungapac, ñuca maquita alzashpa ari nishca llactamanmi cancunataca pushasha. Ñucaca Mandac Diosmi cani” ningui— nirca.

9Tucui chaitami Moisesca israelcunamanca huillarca. Shina huillacpipish sinchi trabajocunahuan llaquilla cashcamantami Moisés nishcataca mana uyashun nircacuna. 10Chaimantami Mandac Diosca Moisestaca:

11—Egipto llactata jatun mandac Faraonpacman rishpa, israelcunata chai llactamanta richun saqui nigri— nirca.

12Shina nicpimi, Moisesca Mandac Diostaca:

—Israelcunapish mana uyacpica, ¿ima shinatac Faraoncarin uyangayari? Ñucaca mana alli rimacchu cani— nirca.

13Shina cacpimi, Mandac Diosca israelcunata Egiptomanta llucchichun, Moisestapish, Aarontapish Egipto llactata jatun mandac Faraonta, israelcunata rimachun cunarca.

Moisespac, Aaronpac ñaupa taitacunamanta

14Caicunami ñaupa taitacunapac aillucunata mandaccunaca: Israelpac punta churi Rubenpac churicunaca: Hanoc, Falú, Hezrón, Carmimi carca. Paicunaca Rubenpac churicunami carca.

15Simeonpac churicunaca: Jemuel, Jamín, Ohad, Jaquín, Zohar, cananea huarmipac huahua Saulmi carca. Paicunaca Simeonpac churicunami carca.

16Levica patsac quimsa chunga canchis huatatami causarca. Levipac churicunaca punta churimanta quipa churicamanca: Gersón, Cohat, Merarimi carca.

17Gersonpac churicunaca: aillu ima shina cashca shina Libni, Simeimi carca.

18Cohatpac churicunaca: Amram, Izhar, Hebrón, Uzielmi carca. Cohatca patsac quimsa chunga quimsa huatatami causarca.

19Meraripac churicunaca: Mahli, Musimi carca.

Paicunami Levipac huahua huahuapura ima shina cashca shina yupashca carca.

20Amramca paipac tia Jocabedhuanmi cazararca. Chai huarmica Aarón, Moisés huahuacunatami charirca. Amramca patsac quimsa chunga canchis huatatami causarca.

21Izharpac churicunaca: Coré, Nefeg, Zicrimi carca.

22Uzielpac churicunaca: Misael, Elzafán, Sitrimi carca.

23Aaronca Aminadabpac ushi Elisabethuanmi cazararca. Elisabetca Naasonpac panimi carca. Chai huarmica Nadab, Abiú, Eleazar, Itamar huahuacunatami charirca.

24Corepac churicunaca: Asir, Elcana, Abiasafmi carca. Paicunaca coreíta aillumi carca.

25Aaronpac churi Eleazarca Futielpac ushicunamanta shuc huarmihuanmi cazararca. Chai huarmica Finees huahuatami charirca.

Paicunami levitacunapac huahuacuna ima shina cashca shinallatac mandashpa causarca.

26Mandac Dios Aarontapish, Moisestapish rimashpaca: «Cancunami israelcunataca Egiptomanta sumacta tandachishpa llucchimugringuichic» nirca. 27Paicunami Egiptomanta israelcunata llucchingapac, chai llactata jatun mandac Faraonhuan parlangapac rirca.

28Mandac Dios Egiptopi Moisesta rimashpaca:

29—Ñucami Mandac Dios cani. Tucui ñuca canman huillashcacunata Egipto llactata mandac Faraonman huillagri— nirca.

30Chashna nicpimi, Moisesca Mandac Diostaca:

—Ñucaca mana alli rimacchu cani. ¿Maitatac Faraonca ñuca nishcataca uyangayari?— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index