Search form

ÉXODO 7

1Chaimantami Mandac Diosca Moisestaca:

—Riqui, cantaca ñucapac randi Faraonhuan parlachunmi churani. Cutin cambac huauqui Aaronca canmanta huillacmi canga. 2Tucui ñuca mandashcacunataca cambac huauqui Aaronmanmi huillangui. Paimi israelcunata chai llactamanta llucchichun Faraonhuan parlanga. 3Ñucami Faraonpac shungutaca sinchiyachisha. Chaimantami Egiptopica mancharina ricuchinacunata ruhuashpa ricuchisha. 4Faraonca cancuna nishcataca mana uyangachu. Shina cacpipish, Egiptopi causaccunataca ñuca maquihuan llaquichishpami llucchisha. Ñuca acllashca israelcunataca sumacta tandachishpami llucchisha. 5Egiptopi causaccunapac chaupimanta israelcuna ñuca maquihuan llucchicpimi, Egipto runacunaca ñucataca Mandac Dios cashcata yachangacuna— nirca.

6Chashnami Moisespish, Aaronpish Mandac Dios mandashca shina ruhuarca. 7Faraonhuan parlanacui punzhapica Moisesca pusac chunga huatata, cutin Aaronca pusac chunga quimsa huatatami charirca.

Aaronpac varamanta

8Mandac Dios Moisestapish, Aarontapish rimashpaca:

9—Faraón: “Milagrocunata ruhuashpa ricuchi” nicpica, canca Aarontaca: “Culebra tucuchun, Faraonpac ñaupapi cambac varata shitai” ningui— nirca.

10Moisespish, Aaronpish Faraonpac ñaupaman rishpaca, Mandac Dios mandashca shinallatacmi ruhuarca. Chaipimi Aaronca Faraonpac, paita serviccunapac ñaupaman rishpa, paipac varata shitarca. Chaipica, varaca culebrami tucurca. 11Chaimantami Faraonpish Egiptopi causac yachaccunata, brujocunata cayarca. Paicunaca Egiptopi causac yachaccuna shinallatacmi ruhuarca. 12Paicunapac quiquin varata pambapi shitacpica, tucui varacunami culebra tucurca. Ashtahuanpish Aaronpac varaca paicunapac varacunata tucuimi micurca. 13Chaita ricushpapish Faraonca Mandac Dios nishca shinallatacmi mana uyasha nishpa, sinchi shungu tucurca.

Yacucunata yahuarta ruhuashcamanta

14Chaimantami Mandac Diosca Moisestaca:

—Faraonca sinchi shungu tucushpami, israelcunataca mana cacharin. 15Tutamanta Faraón yacuman ricpi, culebra tucushca cambac varata apashpa, Nilo yacu patapi tupagri. 16Paihuan tupashpaca: “Israelcunata Mandac Diosca: ‘Ñuca acllashca israelcunata shitashca pambapi ñucata servingapac richun saqui’ ninmi. Cunancamanca canca mana uyashcanguichu. 17Mandac Diosca: ‘Cunanmi ñuca pi cashcata yachangui’ ninmi. Ñuca maquipi charicuc varahuan yacupi huactacpica, yacuca yahuarmi tucunga. 18Shina ruhuacpica, chai yacupi tiyac tucui challuacunami huañunga. Chaimantami chai yacuca ashnanga. Tucui Egipto runacunaca millanayachishpami, chai yacutaca mana ubianga” ningui— nirca.

19Mandac Diosca Moisestaca:

—Aaronta: “Cambac varata japishpa, tucui Egiptopi tiyac yacucunapi, jatun yacucunapi, toma yacucunapi, jundu yacucunapi, cucha yacucunapi maquita jahuata chutangui. Shina ruhuacpica, yahuarmi tucunga. Tucui Egipto llacta yacucunapish, caspi vasocunapi shinallatac rumi vasocunapi tiyac yacucamanmi yahuar tucunga” ningui— nirca.

20Moisespish, Aaronpish Mandac Dios nishca shinallatacmi ruhuarca. Varata alzashpami, Faraonpac, paita serviccunapac ñaupaman rishpa, jatun yacupi huactarca. Shina ruhuacpica, tucui chaipi tiyac yacucunami yahuar tucurca. 21Yacupi tiyac challuacunapish tucui huañurcami. Yacupish ashnacucmi tucurca. Chaimantami tucui Egipto runacunaca mana ubiai pudircacuna. Tucui Egipto llactapimi yahuar tiyarca.

22Egiptopi causac brujocunapish paicuna yachac cashca shinallatacmi ruhuarca. Mandac Dios nishca shinallatacmi Faraonca mana uyasha nishpa, sinchi shungu catirca. 23Chaita mana uyasha nishpami, Faraonca paipac huasiman cutirca. 24Tucui Egipto runacunaca yacu yahuar tucushpa, mana ubiaipac cacpimi, yacu patacunapi junduta ruhuarca. 25Mandac Dios yacumanta yahuarta ruhuashcaca ñami canchis punzha tucurca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index