Search form

ÉXODO 8

Sapocunahuan llaquichishcamanta

1Mandac Diosca Moisestaca:

—Faraonpacman rishpa: “Mandac Diosca: ‘Ñuca acllashca israelcuna ñucata servingapac richun saqui. 2Can paicunata mana cacharicpica, ñucami cambac tucui llactacunata sapocunahuan llaquichisha. 3Jatun yacupica sapocunaca yallitami miranga. Chaimanta llucshishpami, can mandashpa tiyana huasimanpish, can sueñuna ucumanpish yaicunga. Cambac cama jahuapipish, canta serviccunapac huasipipish, hornocunapipish, tandata ruhuana bateacunapipishmi jundanga. 4Sapocunaca cambac, cambac gentecunapac, shinallatac tucui canta serviccunapac cuerpoman huichicushpami puringa’ ninmi” ningui— nirca.

5Mandac Diosca Moisestaca:

—Aarontaca yacu jahuata, cucha jahuata, tucyac yacu jahuata, paipac varata chutachun mandai. Chashna chutacpica, tucui Egipto llactapimi sapocunaca jundaringa— nirca.

6Chaimantami Aaronca tucui Egipto llacta yacucuna jahuata paipac varata chutarca. Shina ruhuacpica, sapocuna yacumanta llucshishpami, tucui Egipto llactapi jundarca. 7Brujocunaca paicuna ruhuac cashca shinallatacmi tucui Egipto llactapi sapocunata jundachirca. 8Shina ruhuacpimi, Faraonca Moisestapish, Aarontapish cayashpaca:

—Ñucamantapish, ñucapac gentecunamantapish sapocuna anchurichun, Mandac Diosta mañaichic. Shina ruhuacpica, cambac gentecuna animalta huañuchishpa, Diosman cugrichun saquishallami— nirca.

9Chaimantami Moisesca Faraontaca:

—Can mandashpa tiyana huasimantapish, canta serviccunamantapish, cambac gentecunamantapish sapocuna anchurishpa, yacullapi causachunca, ¿ima horatac mañachun ningui? Chaita huillailla— nirca.

10Shina nicpimi Faraonca:

—Cayallata mañashpa cui— nirca.

Shina nicpimi Moisesca:

—Ñucanchicta Mandac Diosca, pai shina pi shuctac mana tiyashcata yachachunca, can nishca shinallatacmi ruhuanga. 11Sapocunaca canmantapish, cambac huasimantapish, canta serviccunamantapish, cambac gentecunamantapish anchurishpa, jatun yacullapi saquiringa— nirca.

12Chai quipami Moisespish, Aaronpish Faraonpac ñaupamantaca llucshirca. Moisés llucshishpaca, Faraonta llaquichichun cachashca sapocunata anchuchichunmi, Mandac Diosta mañarca. 13Mandac Diosca Moisés mañashca shinallatacmi ruhuarca. Chaimantami huasi ucupipish, canzhapipish tucui sapocunaca huañurca. 14Chai huañushca sapocunataca tandashpami, caipi chaipi montonarca. Chai sapocunaca yallitami ashnacurca. 15Ña llaquicuna mana tiyacpica, cutinllatacmi Faraonca sinchi shungu tucurca. Chaimantami Moisestapish, Aarontapish Mandac Dios nishca shina, mana cazurca.

Piliscunahuan llaquichishcamanta

16Chaimantami Mandac Diosca Moisestaca:

—Aarontaca: “Tucui Egipto llactapi piliscuna jundachun, varahuan ñuto allpapi huactai” ningui— nirca.

17Moisés nicpica, Aaronca paipac varahuan ñuto allpapi huactarcami. Chaimantami ñuto allpaca piliscuna tucushpa gentecunapipish, animalcunapipish jundarca. 18Chaita ricushpaca, brujocunapish paicuna ruhuac cashca shinallatacmi piliscunata ruhuanata munarca. Ashtahuanpish chaita ruhuanataca mana pudircachu. Piliscunami gentecunapipish, animalcunapipish jundarca. 19Chaimantami brujocunaca Faraontaca:

—¡Caicunaca Dios ruhuashcami!— nirca.

Shina nicpipish, Faraonca Mandac Dios nishca shinallatacmi sinchi shungu tucushpa, mana cazurca.

Chuspicunahuan llaquichishcamanta

20Mandac Diosca Moisestaca:

—Tutamanta jatarishpa, Faraón yacuman llucshicpi, paihuan tupashpa: “Mandac Diosca: ‘Ñuca acllashcacuna ñucata servigrichun cachai. 21Ñuca acllashcacunata mana cacharicpica, cantapish, canta serviccunatapish, cambac gentecunatapish chuspicunahuanmi yallita llaquichisha. Chai chuspicunami cambac huasicunapipish, Egiptopi causac gentecunapac huasipipish, tucui llactacunapipish yallita jundanga. 22Chashna cacpipish, chai punzhallatacmi ñuca acllashcacuna causana Gosén llactata chicanyachishpa, chaimanca shuc chuspillapish mana yaicuchun saquisha. Chashna ruhuacpimi, cai llactapica Mandac Dios ñuca causacushcata yachanguichic. 23Ñuca acllashcacunataca cambac llactapi causaccunamanta chicanyachishami. Cayami chai ricuchinataca ricuchisha’ ninmi” ningui— nirca.

24Mandac Diosca chashnami ruhuarca. Chuspicunaca puyu shina shamushpami, Faraonpac, paita serviccunapac, tucui Egiptopi causaccunapac huasipipish jundarca. Chashnami tucui Egipto llactapi jundarca.

25Chaimantami Faraonca Moisestapish, Aarontapish cayashpaca:

—Cancunapac Diosman animalta huañuchishpa cungapac richiclla. Ashtahuanpish cai llactapi chaitaca ruhuanguichic— nirca.

26Shina nicpimi Moisesca:

—Mana chai shina ruhuanachu canchic. Chashna animalta huañuchishpa, Mandac Diosman cushpaca, Egipto runacunamanca millanatami ruhuashun. Chai shina paicunapac ñaupapi ruhuacpica, ¿manachu rumicunahuan shitashpa huañuchinga? 27Ñucanchicca quimsa punzhata purishpa, shitashca pambaman chayashpa, chaipimi Mandac Dios mandashca shina, paiman animalta huañuchishpa cushun— nirca.

28Shina nicpimi Faraonca:

—Mana yalli caruyana cashpaca, shitashca pambapi animalta huañuchishpa, cancunata Mandac Diosman cugrichiclla. Chashnallatac ñucamantapish mañanguichic— nirca.

29Shina nicpimi Moisesca:

—Ñucaca caimanta llucshishpami, Mandac Diostaca canmantapish, canta serviccunamantapish, tucui Egiptopi causaccunamantapish caya chuspicunata anchuchichun mañasha. Canca Mandac Diosman animalta cushpa, rupachigrichunca, mana jarcanachu cangui. Pacta llullashpa, ñucanchicta cashna nicunguiman— nirca.

30Chashna nishpami, Moisesca Faraonpacmanta rishpa, Mandac Diosta mañarca. 31Mandac Diosca Moisés mañashcata uyashpami, Faraonpac, paita serviccunapac, tucui Egiptopi causaccunapac huasicunamantapish shucllapish mana saquishpa, tucui chuspicunata anchuchirca. 32Chashna tucucpipish, Faraonca sinchi shungu tucushpami, cutinllatac Dios acllashcacuna richunca mana saquirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index