Search form

ÉXODO 9

Animalcunata ungüihuan llaquichishcamanta

1Chaimantami Mandac Diosca Moisestaca:

—Faraonpacman rishpa: “Israelcunata Mandac Diosca: ‘Ñuca acllashcacuna, ñucata servingapac richun saqui. 2Jarcashpa, mana richun saquicpica, 3campopi tiyac animalcunatapish, caballocunatapish, burrocunatapish, camellocunatapish, vacacunatapish, ovejacunatapish, mancharina ungüihuanmi llaquichisha. 4Shina cacpipish, israelcunapac animalcunataca Egipto runacunapac animalcunamanta chicanyachishami. Israelcunapac animalcunaca shucllapish mana huañungachu’ ninmi” ningui— nirca.

5Mandac Diosca ima hora llaquichinata huillashpaca:

—Cayami chashnaca llaquichisha— nirca.

6Cayandi punzhaca Mandac Diosca pai nishca shinami ruhuarca. Egipto tiyac animalcunaca tucuimi huañurca. Ashtahuanpish israelcunapac animalcunaca shucllapish mana huañurcachu. 7Faraonca israelcunapac animalcuna huañushcata, mana huañushcata ricuchun cachacpica, shucllapish mana huañushcachu carca. Shina tucucpish, Faraonca sinchi shungu tucushpami, israelcunataca mana cacharirca.

Sisu ungüihuan llaquichishcamanta

8Mandac Diosca Moisestapish, Aarontapish rimashpaca:

—Moisés, hornomanta uchupata apashpa, Faraonpac ñaupapi huichaiman shic-huai. 9Shina ruhuacpica, chai uchupaca polvo tucushpami, tucui Egipto llactata shic-huarishpa, tucui chaipi causac gentecunatapish, animalcunatapish sisu ungüihuan llaquichinga— nirca.

10Chaimantami Moisesca hornomanta uchupata apamushpa, Faraonpac ñaupapi huichaiman shic-huarca. Chashna ruhuacpica, gentecunapish, animalcunapish caipi chaipi tucya tucya tucushpami sisurca. 11Chai brujocunapish Egipto runacuna shinallatac sisu ungüihuan cashpami, Moises-huanca mana ashtahuan chimbapurai pudirca. 12Mandac Diosca Moisesta nishca shinami Faraonpac shunguta sinchiyachirca. Chaimantami mana cazurca.

Runduhuan llaquichishcamanta

13Mandac Diosca Moisestaca:

—Tutamanta utca jatarishpa, Faraonpac ñaupaman rishpa: “Mandac Diosca israelcunata: ‘Ñuca acllashcacuna ñucata servingapac richun saqui. 14Cunanca, tucuilaya llaquicunahuanmi cantapish, can churashca mandaccunatapish, tucui cambac llactapi causaccunatapish yallita llaquichigrini. Chaimantami cai pachapica ñuca shina shuctac Dios mana tiyashcata chayangui. 15Ñucaca cantapish, cambac llactapi causaccunatapish mancharina llaquihuan llaquichicpica, ñami illanguichicman carca. 16Ashtahuanpish ñuca imatapish ruhuai pudic cashcata ricuchingapac, cai pachapi causaccunaman ñuca pi cashcata ricuchingapacmi mana chashna tucuchircani. 17¿Chashna cashca jahuachu ñuca acllashcacunataca jarcashpa mana cacharisha ningui? 18Caya cai horasllatacmi Egipto llacta callarishca punzhamanta cunancaman jaicapi mana tiyashca sinchi runduta tamyachigrini. 19Chaimanta cambac animalcunatapish, tucui pambapi tiyashcatapish tandachichun mandai. Rundu urmashpaca, mana tandachishca gentecunatapish, animalcunatapish tucuitami huañuchinga’ ninmi” ningui— nirca.

20Faraonta servicpuramanta maijan runaca Mandac Dios rimashcata manchashpami paicunata serviccunatapish, animalcunatapish huasi ucuman yaicuchirca. 21Cutin maijancunaca Mandac Dios nishcata mana crishpami, paicunapac serviccunatapish, animalcunatapish mana yaicuchircachu.

22Mandac Diosca Moisestaca:

—Tucui Egipto llactapi causac gentecunapi, animalcunapi shinallatac tucuilaya sacha yuracunapi rundu tamyachun, cambac maquita huichaiman alzai— nirca.

23Moisés varata huichaiman alzacpica, Mandac Diosca relampa ninahuan jaguin nichishpa, rayocunata urmachishpami runduta tamyachirca. 24Chashnami Egipto llacta callarishca punzhamanta pacha, jaicapi mana tiyashca, rundumi rayohuan tamyarca. 25Cai runduca tucui Egipto llactapimi canzhapi saquirishca gentecunatapish, animalcunatapish, tucuilaya quihuatapish, sacha yuratapish tucuita tucuchirca. 26Israelcuna causana Gosenllapica ima rundu, mana urmarca. 27Chaimantami Faraonca Moisestapish, Aarontapish cayachishpaca:

—Cunanca, juchallishcanimi, ñucapish, ñucapac gentecunapish mana allitachu ruhuashcanchic. Mandac Diosca cashcata ruhuacmi. 28Dios cachashca relampapish, rundupish anchurichun, Mandac Diosta mañaichic. Ñucaca ña mana ashtahuan jarcashachu, cancunaca ringuichicllami— nirca.

29Shina nicpimi Moisesca:

—Cai llactamanta llucchishcahuanmi maquita huichaiman alzashpa, Mandac Diosta mañasha. Chashna mañacpica, relampapish jarcaringami, rundupish mana urmangachu. Chashna tucucpimi, cai allpaca, Mandac Diospac cashcata yachangui. 30Canpish, canta serviccunapish Mandac Diosta manarac manchac cashcatami yachani— nirca.

31Runduca lino chagrata, cebada chagrata tucuimi tucuchirca. Cebada chagraca espigapi, cutin lino chagraca sisapimi carca. 32Ashtahuanpish trigopish, centenopish quipata pucuc cashcamantami mana ima tucurca.

33Moisés Faraonpacmanta rishpa, chaimanta llucchishpaca maquita alzashpami, Mandac Diosta mañarca. Shina mañacpica, relampapish, rundupish, tamyapish ña mana ashtahuan umarcachu. 34Faraonca chashna ña mana tamyacpi, rundupish, relampapish ña mana urmacpica, cutinllatacmi juchallirca. Paita serviccunapish sinchi shungumi tucurca. 35Mandac Dios Moisesta nishca shinallatacmi Faraonca sinchi shungu tucushpa, israelcunata mana cacharirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index