Search form

GÉNESIS 10

Noepac huahua huahuacunamanta

(1 Cr 1.5-23)

1Noepac huahua huahuacunaca: Sem, Cam, Jafetmi carca. Paicunaca cai pachapi yacu juizhu tiyashca quipa charishca churicunami.

2Jafetpac churicunaca: Gomer, Magog, Madai, Javán, Tubal, Mesec Tirasmi carca. 3Gomerpac churicunaca: Askenaz, Rifat, Togarmami carca. 4Javanpac churicunaca: Elisa, Tarsis, Quitim, Dodanimmi carca. 5Paicunaca mama cucha lado llactacunapimi causarca. Paicunaca quiquin rimaita rimashpami, paicunapac aillucunapuralla causarca.

6Campac churicunaca: Cus, Mizraim, Fut, Canaanmi carca. 7Cuspac churicunaca: Seba, Havila, Sabta, Raama, Sabtecami carca. Raamapac churicunaca: Seba, Dedanmi carca. 8Cusca Nimrod churitami charirca. Paimi cai pachapica ñaupaca sinchi runa carca. 9Nimrodca Dios ayudacpi, sacha animalcunata japinata alli yachacmi carca. Chaimantami paitaca: «Nimrod shina sacha animalcunata japinata alli yachacmari» nincuna. 10Callaripica Nimrodca Sinar llacta Babel, Erec, Acad, Calne llactacunatami mandacurca. 11Cai llactamantaca Asiria llactaman rishpami, Nínive, Rehobot, Cala llactacunata shayachirca. 12Nínive llactahuan, Cala pueblohuan tupanacuipica Resén jatun llactatami shayachirca.

13Mizraimca Ludim, Anamim, Lehabim, Naftuhim, 14Patrusim, Caftorim, Casluhim churitami charirca. Casluhimmantami filisteocunaca mirarirca.

15Canaanca ishcai churitami charirca. Punta churica Sidón, quipa churica Hetmi carca. 16Shinallatac jebuseocunapish, amorreocunapish, gergeseocunapish, 17heveocunapish, araceocunapish, sineocunapish, 18arvadeocunapish, zemareocunapish, hamateocunapish Canaanpac huahua huahuacunapurallatacmi carca. Chai quipami cananeocunaca caita chaita rishpa, causai callarirca. 19Cananeocunapac llactaca Sidonmanta Gerar ladota rishpa, Gaza llactacamanmi carca. Shuc ladomanca Sodoma, Gomorra, Admacamanmi carca. Shinallatac Seboimantaca Lasa llactacamanmi carca. 20Caicunami Campac huahua huahuacunaca carca. Paicunaca aillupuralla quiquin rimaita rimashpa, quiquin allpapi, quiquin llactapimi causarca.

21Jafetpac punta huauqui Sempish churicunata charircami. Semca Heberpac huahua huahuacunapac punta taitami carca. 22Sempac churicunaca: Elam, Asur, Arfaxad, Lud, Arammi carca. 23Arampac churicunaca: Uz, Hul, Geter, Masmi carca. 24Arfaxadca Sala churitami charirca. Salaca Heber churitami charirca. 25Heberca ishcai churitami charirca. Punta churitaca chai punzhacunapi cai pachapi chicanyarinacui tiyashcamantami Pelegta shutichirca. Paipac huauquica Joctanmi carca. 26Joctanca Almodad, Selef, Hazar-mavet, Jera, 27Adoram, Uzal Dicla, 28Obal, Abimael, Seba, 29Ofir, Havila, Jobab churicunatami charirca. Tucui paicunami Joctanpac churicuna carca. 30Paicuna causana llactaca Mesa llactamanta Sefar llactaman, inti llucshina jatun urcucunacamanmi carca. 31Paicunami Sempac huahua huahuacunaca carca. Paicunaca aillupuralla quiquin rimaita rimashpa, quiquin allpapi, quiquin llactapimi causarca.

32Caicunami Noepac churicunapac aillucunaca carca. Paicunaca quiquin llactacunallapitac ima shina mirarishca shinallatacmi causarca. Paicunamantami cai pachapi yacu juizhu tucurishca quipaca caita chaita rishpa, llacta tucushpa causarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index