Search form

GÉNESIS 14

Lotta prezu aparicucpi, Abram quichushcamanta

1Jatun mandac Amrafel Sinar llactata mandacui punzhacunapica jatun mandac Ariocca Elasar llactatami mandacurca. Jatun mandac Quedarlaomerca Elam llactatami mandacurca. Cutin jatun mandac Tidalca Goim llactatami mandacurca. 2Paicunami Sodomata jatun mandac Berahuan, Gomorra pueblota jatun mandac Birsahuan, Adma llactata jatun mandac Sinabhuan, Zeboim pueblota jatun mandac Semeberhuan, Zoar nishca Bela llactata jatun mandac-huan macanacurca. 3Tucui cai pichca jatun mandaccunami Sidim pambapi tandanacurca. Chai pambapimi Cachi yacu cuchaca can. 4Chai mandaccunami jatun mandac Quedarlaomertaca chunga ishcai huatata servishpa causarca. Shina cashpapish, chunga quimsa huatapica jatun mandac Quedarlaomerhuan macanacungapac jatarircami. 5Chunga chuscu huatapica jatun mandac Quedarlaomerca paihuan apanacuc jatun mandaccunahuan shamushpami, Astarot Karnaiam llactapi causac refaitacunatapish, Ham llactapi causac zuzitacunatapish, Save-quiriataim pueblopi causac emitacunatapish, 6Seir urcupi causac horeocunatapish shitashca pamba ladopi cac Parán pambacaman macashpa catirca. 7Paicunaca En-mispat nishca Cades llactamanmi catirca. Chashna cutishpami, amalecitacuna causana llactatapish, Hazezon-tamarpi causac amorreocunatapish tucuchirca.

8Shina cacpimi, Sodoma, Gomorra, Adma, Zeboim, Zoar nishca Bela llactacunamanta jatun mandaccuna llucshishpa, Sidim pambapi macanacungapac allichirirca. 9Paicunami Elam llactata jatun mandac Quedarlaomerhuan, Goim llactata jatun mandac Tidalhuan, Sinar llactata jatun mandac Amrafelhuan, Elasar llactata jatun mandac Arioc-huan macanacurca. Chashnami chai chuscu mandaccunaca caishuc pichca jatun mandaccunahuan macanacurca.

10Sidim pambapica asfalto llucchishca achca jutcumi tiyarca. Chai jutcucunapimi Gomorrata jatun mandacpish, Sodomata jatun mandacpish chai macanacuimanta miticushpa callpacushpaca urmarca. Shuctac mandaccunaca urcucunapimi miticurca.

11Chai macanacuita atishpaca, Sodomapi, Gomorrapi ima tiyashcacunatapish, micunatapish apashpami rircacuna. 12Abrampac sobrino Lotca Sodomapimi causarca. Chaipi cacpimi, paita prezushpa, pai ima charishcacunatapish apashpa rirca. 13Chai macanacuimanta miticushpa shamuc shuc runami Lotta prezushcata hebreopuramanta Abramman huillac shamurca. Abramca amorreopuramanta Mamrepac encina yuracuna tiyac pambapimi causarca. Mamreca Escolpac, Anerpac huauquimi carca. Paicunaca Abrampac yuyaitami charirca.

14Abramca paipac sobrinota prezushcata yachashpami, paipac huasipi huacharishca paita servic quimsa patsac chunga pusac runata tandachishpa, Lotta prezuccunataca Dan llactacaman catirca. 15Ña tuta cacpimi, Abrampish, paipac serviccunapish cungailla japishpa macarca. Cashna macashpami, Damascomanta jahuaman saquiric Hoba llactacaman catirca. 16Chashnami paipac familia Lottapish, paipac imalla charishcacunatapish, familiapac huarmicunatapish, shuctac runacunatapish tucui quichushpa apamurca.

Melquisedec Abramta bendiciashcamanta

17Abram Quedarlaomertapish, caishuc jatun mandaccunatapish atishpa macashpa cutimucpica, Sodomamanta jatun mandacca Save pambapimi tupangapac rirca. Chai pambataca jatun mandacpac pamba nincunami. 18Chaipimi Salem llactata jatun mandacpish, jahua pacha Diospacta ruhuac Melquisedec curapish tandata, vinota llucchishpa: 19llucchishpaca:

«Jahua pachata, cai pachata ruhuac

Dios canta bendiciachun.

20Canta piñaccunata cambac maquipi

churac, jahua pachapi causac Diosca

alli nishca cachun» nirca.

Chaimantami Abramca tucui quichushcacunamanta chungamanta shucta Melquisedecman curca. 21Chai quipami, Sodoma pueblota jatun mandacca Abramtaca:

—Gentecunata ñucaman cui, imata quichushcacunataca can apailla— nirca.

22Shina nicpimi, Abram Sodoma pueblota jatun mandactaca:

—Can: “Ñucami cantaca chayucyachini” ama nichunmi, jahua pachatapish, cai pachatapish ruhuac Mandac Diosman 23“Ñucaca shuc puchcallatapish, shuc ushuta huatanallatapish mana japishachu” nishpa ari nircani. 24Ñucaca, ñucahuan cac quipa huiñai huambracuna micushcallamantami imata mana cutichina cani. Aner, Escol, Mamremi paicuna japina cashcataca japinga— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index