Search form

GÉNESIS 15

Mandac Dios Abramman shuc churita cusha nishcamanta

1Chai quipa, Mandac Dios Abramman muscuipi shina ricurishpaca:

—Abram ama manchaichu, ñucami escudo shina, canta jarcac cani. Sumac japinatami japingui— nirca.

2Shina nicpimi Abramca:

—Mandac Dioslla, ¿ñucamanca imatatac cugringuiyari? Ñucaca huahua illacllamari cani. Ñuca charishcacunataca Damasco llactamanta ñucata servic Eliezermi japinga. 3Ñucataca canllatacmi mana huahuayucta ruhuarcangui. Tucui ñuca charishcacunataca ñuca huasipi huacharishca ñucata servicmi japinga— nirca.

4Mandac Dios cutinllatac rimashpaca:

—Cambac charishcacunataca mana paichu japinga, ashtahuanpish cambac quiquin churimari japinga— nirca.

5Shina nishpa, Mandac Dios Abramta canzhaman pushashpa, jahua pachata ricuchishpaca:

—Lucerocunata yupanata pudishpaca yupai. Chashnami cambac huahua huahuacunaca canga— nirca.

6Abramca Mandac Dios nishcata crircami. Chaimantami Abramtaca: “Canca cashcata ruhuacmi cangui” nishpa chasquirca. 7Shina chashquishpaca:

—Ñucaca canta Mandac Diosmi cani. Ñucami cai allpata canman cungapac caldeocuna causana Ur llactamanta llucchircani— nirca.

8Shina nicpimi Abramca:

—Mandac Dioslla, ¿ima shinatac cai allpata ñucaman cuna cashcataca yachashayari?— nirca.

9Shina nicpimi, Mandac Diosca:

—Shuc quimsa huatayuc vaquillata, shuc quimsa huatayuc huarmi chivota, shuc quimsa huatayuc cari ovejata, shuc urpita, shuc huahua palomata apamui— nirca.

10Abramca Mandac Dios nishca shinami, animalcunata apamushpa chaupishpa, chimbapurachishpa churarca. Cutin volac animaltaca mana chaupircachu. 11Chai aichaman ullachucuna shamushpa, micusha nicpica, Abramca manchachishpami cachacurca. 12Ña inti tigrashca quipa, Abram yallita sueñucucpimi, yallita amsayashpa tutayarca. Chaimantami paica yalli mancharicurca.

13Mandac Diosca Abramtaca:

—Caitami alli yachana cangui. Cambac huahua huahuacunaca shuctac llactapimi causagringa. Chaipimi catushca shina servinga. Chai llactapica chuscu patsac huatatami llaquita causanga. 14Chai llactapi causaccuna llaquichishcamantaca paicunatapish ñucaca llaquichishami. Chai quipaca, tucui charishcacunandimi chai llactamanta llucshinga. 15Shina cacpipish, canca sumacta causashpami cushilla yuyacyashpa huañungui. Chashna huañucpimi, cantaca enterranga. Chashnami cambac ñaupa taitacunahuan tandarigringui. 16Cambac huahua huahuacunaca chuscu cutincaman huahua huahuacuna tucushca quipami, caiman cutimunga. Chaicamanca amorreocunaca manarac yalli millai tucungachu— nirca.

17Ña inti tigrashpa, amsa tuta tucucpimi, Abramca shuc hornomanta cushni llucshicuctapish, chaupishca animalcunapac chaupita nina jagan nishpa, pasacuctapish ricurca. 18Chai punzhapi Mandac Diosca Abramhuanca pactachingapac ari nishpaca:

—Cambac huahua huahuacunamanca allpataca cai Egipto jatun yacumanta Eufrates jatun yacucamanmi cusha. 19Cai ceneocunapac, cenezeocunapac, cadmoneocunapac, 20heteotacunapac, ferezeocunapac, refaitacunapac, 21amorreocunapac, cananeocunapac, gergeseocunapac, jebuseocunapac allpatami cambac huahua huahuacunamanca cusha— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index