Search form

GÉNESIS 17

Circuncisionta ruhuashcamanta

1Abram iscun chunga iscun huatayuc cacpimi, Dios ricurishpaca:

—Ñucami tucui imatapish ruhuaclla Diosca cani. Imatapish allita ruhuashpa, ñuca ñaupapi purilla. 2Ñucaca canhuan ari nishcataca pactachishami. Canmantaca achcata mirachishami— nirca.

3Shina nicpimi, Abramca pambacaman cumurirca. Shina cumuricpimi, Diosca:

4—Riqui, caimi ñucahuan canhuan ari nishcaca. Canca achca gentecunapac taitami cagringui. 5Cantaca achca gentecunapac taita cachunmi churani. Chaimanta cunanca, ña mana Abram shutichu cangui, ashtahuanpish Abraham shutimi cangui. 6Canmantaca achcatami mirachisha. Canmantami jatun llactacunatapish ruhuasha, jatun mandaccunapish canmantami llucshinga. 7Canhuanpish, cambac huahua huahuacunahuanpishmi ari nishcata callarichisha. Cambacpish, cambac huahua huahuacunapacpish Dios cangapacmi, huiñaipac ari nisha. 8Can causacushca tucui Canaán llactatami canmanpish, cambac huahua huahuacunamanpish, cambac quipa miraicunamanpish huiñaipac cusha. Ñucaca paicunapac Diosmi casha— nirca.

9Cutinllatacmi Diosca Abrahamtaca:

—Cai ari nishcataca canpish, cambac huahua huahuacunapish pactachinami canguichic. 10Ñucahuan, cancunahuan, cambac huahua huahuacunahuan ari nishcaca caimi: Cancunapuramanta tucui caricunami circuncisionta ruhuana canguichic. 11Caricuna charishcamanta asha aicha carata pitishpami, circuncisiontaca ruhuana canguichic. Caimi ñucahuan cancunahuan ari nishcata ricuchinga. 12Huacharishcamanta pusac punzhapimi tucui cancunapuramanta cari huahuacunaca circuncisionta ruhuashca cana can. Huasipi huacharishca cashpapish, caru llactamanta randishca cashpapish, mana cancunapurapi mirashca huahuacuna cashpapish, caitaca ruhuashpami catina canguichic. 13Cambac huasipi huacharishca cashpapish, randishca cashpapish, circuncisionta ruhuanatacmi canguichic. Cancunapac aichapi caita ruhuashca cashpami, ñucahuan ari nishcata huiñai huiñaipac ricuchinguichic. 14Cancunapurapi maijan cari pai charishca asha carata pitishpa, circuncisionta mana ruhuashca cacpica, ñucahuan ari nishcata mana cazushcamantami cancunapuramanta anchuchishca canga— nirca.

15Diosca Abrahamtaca:

—Cambac huarmi Saraitaca ama ashtahuan Sarai nishpa cayanguichu, ashtahuanpish paica Sara shutimi canga. 16Paita bendiciashpami, paimanta cari huahuata canman cusha. Ari, paitaca bendiciashatacmi. Chashna bendiciashca cashpami, llactacunapac mama tucunga. Llactata jatun mandaccunapish paimantami llucshinga— nirca.

17Shina nicpimi, Abrahamca pambacaman cumurishpa, paipac shungupi asishpaca: «¿Patsac huatayuc runachu huahuata charisha? ¿Sarapish iscun chunga huatayuc huarmichu huicsayuc tucugrin?» nicurca. 18Abrahamca Diostaca:

—Ismaelca cambac ñaupapi alli causacushpami alli canman— nirca.

19Shina nicpimi Diosca:

—Ñucaca cashna cana cashcatatacmi nini. Cambac huarmi Saraca shuc cari huahuatami charinga. Chai huahuataca Isaactami shutichingui. Paihuanpish, paipac huahua huahuacunahuanpish ñuca ari nishcataca huiñaita pactachicushallami. 20Ismaelmantapish uyashcanimi. Riqui, paitapish bendiciashpa mirachishpa, achca gentecunatami ruhuasha. Chaimantami paica chunga ishcai mandaccunapac taita canga. Paimantaca shuc jatun llactatami ruhuasha. 21Ashtahuanpish ñuca ari nishcataca Isaac-huanmi callarichisha. Cambac huarmi Saraca shamuc huata, cai shina punzhapimi cari huahuata charinga— nirca.

22Dios Abrahamhuan tucui parlanacushpaca, paipac ñaupamanta huichaiman rircallami. 23Dios nishca shinami chai punzhallatac Abrahamca paipac churi Ismaeltapish, paipac huasipi huacharishca serviccunatapish, randishca serviccunatapish, tucui huasipi serviccunatapish paicuna charishca asha carata pitishpa, circuncisionta ruhuarca. 24Abrahamca iscun chunga iscun huatayuc cashpami, pai charishca asha carata pitishpa, circuncisionta ruhuarca. 25Cutin paipac churi Ismaelca chunga quimsa huatayuc cashpami, pai charishca asha carata pitishpa circuncisionta ruhuarca. 26Chai punzhallatacmi Abrahampish, Ismaelpish circuncisionta ruhuarca. 27Paipac huasipi huacharishca serviccunapish, carumanta cullquihuan randishca serviccunapish tucui caricunami paihuan pactami circuncisionta ruhuarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index