Search form

GÉNESIS 21

Isaac huacharishcamanta

1Mandac Diosca pai nishca shinami Sarataca ricuc shamurca. Pai imata ruhuasha nishca shinallatacmi Saramanca pactachirca. 2Saraca yuyac cashpapish Abrahampacta huicsayuc tucushpami, Mandac Dios nishca punzhallapitac shuc cari huahuata charirca. 3Abrahamca Sarapi charishca huahuataca Isaactami shutichirca. 4Paipac churi Isaac pusac punzhata charicpica, Dios mandashca shinami circuncisionta ruhuarca. 5Paipac churi Isaac huacharicpica, Abrahamca patsac huatayucmi carca. 6Chaimantami Saraca: «Diosmari cushichishpa, ñucataca asichirca. Maijanpish caita uyashpaca, ñucahuan asingacunami. 7¿Pitac Abrahammanca paipac huarmi Saraca huahuacunata chuchuchingami nishpa huillanman carca? Pai yuyac cacpipish, shuc churitami Abrahammanca cushcani» nirca.

Agartapish, Ismaeltapish Abrahampac huasimanta llucchishpa cachashcamanta

8Isaac ña huiñacpica, chuchumanta raquircami. Chuchumanta raquishca punzhami Abrahamca jatun micuita ruhuarca. 9Saraca Egiptomanta Agar huarmipi Abraham charishca churi Sarapac huahua Isaacta burlacucta ricurca. 10Chaimantami Abrahamtaca: «Cai servic huarmitapish, cambac churitapish llucchishpa cachai. Cai servic huarmipac cari huahuaca ñuca huahua Isaacpac herenciata mana chaupinachu can» nirca.

11Paipac churi Ismaelta llucchishpa cachachun nishcaca Abrahammanca yalli llaquimi carca. 12Shina cacpimi, Diosca Abrahamtaca: «Canta servic huarmimantapish, churimantapish ama llaquirichu, Sara imata nishcata uyailla. Isaacpac huahua huahuacunallami cambac huahua huahuacunaca canga. 13Canta servic huarmipac cari huahuapac huahua huahuacunamantapish cambac huahua cashcamantaca jatun llactatami ruhuasha» nirca.

14Shina nicpimi, Abrahamca tutamanta utca jatarishpa micunatapish, shuc puru yacutapish Agarman curca. Shinallatac huahuatapish cushpami, caya minchacaman nishpa cacharca. Agarca Beerseba shitashca pambatami maiman chayanatapish mana yachashpa ricurcalla. 15Puru yacuca tucuricpica, paipac huahuataca shuc yura cuchupimi tiyachishpa saquirca. 16Paipac cari huahua huañucta mana ricungaraicumi caruman rishpa flecha maicaman chayac shinapi tiyarirca. Chai chimbapurapi mama tiyacucpimi, huahuaca sinchita huacai callarirca.

17Huahua huacashca Diosman uyaricpimi, Diospac ángel jahua pachamanta Agarta cayashpaca: «Agar, ¿imatac tucungui? Ama manchaichu, cambac huahua chaipi huacacuctaca Diosca uyarcami. 18Ñucami paimantaca shuc jatun llactata ruhuasha. Chaimanta jatarishpa, cambac huahuata maquipi japirishpa jatarichi» nirca.

19Chai quipami, Diosca Agarpac ñahuipi shuc yacu junduta ricuchirca. Chaita ricushpami, purupi yacuta jundachishpa, huahuaman ubiachirca. 20Chai huahuaca Dios ayudacpimi, shitashca pambapi huiñashpaca, arcohuan flechata shitanata alli yachac carca. 21Paica shitashca pamba Paranpimi causacurca. Paipac mamaca Egiptomanta huarmihuanmi cazarachirca.

Abrahampish, Abimelecpish ari nishcamanta

22Chai huatacunallatacmi jatun mandac Abimelecca paipac soldadocunata mandac Ficolhuan shamushpa Abrahamtaca:

—Tucui imata ruhuanapipish Diosca canhuanmi. 23Cunanca, ñucatapish, ñuca churitapish, ñuca nietocunatapish, can causacushca llactapi causaccunatapish mana llaquichishpa, ashtahuanpish ñuca canman allita ruhuashca shinallatac allita ruhuangapac cunanllatac Diospac shutipi ari ni— nirca.

24Shina nicpimi Abrahamca:

—Ari, Diospac shutipimi ari nini— nirca.

25Abrahamca Abimelecpac serviccuna yacu jutcuta quichushcamantami Abimelecta sinchita rimarirca. 26Chaimantami Abimelecca:

—Pi caita ruhuashcata mana yachanichu, canpish ñucamanca mana huillashcanguichu. Cunan punzhacaman caitaca mana yachashcanichu— nirca.

27Shina nicpimi, Abrahamca ovejacunatapish, vacacunatapish Abimelecman curca. Chai shina ruhuashpami, ishcaimanta mana piñanacungapac ari ninacurca. 28Abrahamca canchis malta ovejatami chicanyachirca. 29Shina ruhuacpimi, jatun mandac Abimelecca:

—Cai canchis malta ovejacunata chicanyachishpaca, ¿imatatac nisha nin?— nirca.

30Shina nicpimi Abrahamca:

—Cai canchis malta ovejataca yacu jundutaca ñuca allashcata ricuchichunmi, ñuca maquimanta japingui— nirca.

31Shina ishcaita chaipi ari nishcamantami chai allpataca Beersebata shutichirca.

32Shinami Beerseba llactapi ari ninacurca. Chai quipami Abimelecca paipac soldadocunata mandac Ficolhuan filisteocunapac llactaman cutimurca. 33Abrahamca Beerseba pambapimi tamarisco yurata tarpurca. Chaipimi huiñaita causac Mandac Diosta mañarca. 34Abrahamca achca punzhacunatami filisteocunapac llactapica causarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index