Search form

GÉNESIS 22

Dios Abrahamta paipac churita rupachichun nishcamanta

1Chai quipaca, Diosca Abraham crishcata ricungapac cayashpaca:

—Abraham— nirca.

Shina cayacpimi Abrahamca:

—Caipimi cani— nirca.

2Shina nicpimi Diosca:

—Cambac cuyashca shuclla churi Isaacta Moriah llactaman aparishpa, ñucaman cushpa rupachi. Maijan urcupi rupachina cashcataca ñucami huillasha— nirca.

3Chai cayandi tutamanta utca jatarishpami, Abrahamca burrota parejashpa, paita ishcai serviccunatapish, paipac churi Isaactapish, rupachina yantatapish apashpa, Dios maiman richun nishcaman rirca. 4Ña quimsa punzha quipami, Abrahamca carumanta chai rupachina pushtutaca ricurca. 5Shina ricushpami paita serviccunataca:

—Cancunaca caillapi burrohuan saquirichic, ñucaca huambrahuanmi Diosta allimari cangui ningapac rigrini. Chai quipaca cutishallami— nirca.

6Abrahamca rupachina yantata paipac churi Isaaman apachishpami, paica cuchillotapish, ninatapish apashpa, ishcaita rirca. 7Isaacca taita Abrahamtaca:

—Ñuca Taitito— nirca.

Shina nicpimi Abrahamca:

—¿Imatac ningui huahua? Caipimi cani— nirca.

Shina nicpimi paica:

—Caipica ninahuan, yantallahuanmi charinchic. Ashtahuanpish, ¿Diosman cushpa rupachina ovejaca maipitacyari?— nirca.

8Shina nicpimi Abrahamca:

—Ñuca huahualla, Diosllatacmi rupachina ovejataca cunga— nirca.

Shina nishpaca, purishpa catircacunallami. 9Abrahamca maipimi Dios ricuchishcaman chayashpaca, shuc altarta ruhuashpami, chai jahuapi yantata churashpa, paipac churi Isaacta chacnashpa yanta jahuapi churarca. 10Shina churashpami Abrahamca cuchillota japishpa, paipac churita huañuchigrirca. 11Shina huañuchigricpimi, Mandac Diospac ángel jahua pachamanta cayashpaca:

—¡Abraham! ¡Abraham!— nirca.

Shina nicpimi Abrahamca:

—Caipimi cani— nirca.

12Shina nicpimi angelca:

—Huambrapac jahuapica ama maquita churaichu, ama imata ruhuaichu. Diosta manchashpa, cambac cuyashca shuclla churita mañacpi, mana misashcataca ña yachanimi— nirca.

13Abraham huichailla ricushpaca, gachusapa oveja zarza casha angupi gachucuna churarishca shayacuctami ricurca. Chai ovejatami paipac churipac randi Diosman cushpa rupachirca. 14Chaimantami Abrahamca chai urcutaca: «Mandac Diosca ima illashcata cunllami» nishpa shutichirca. Cunancamanmi chai urcutaca: «Mandac Diosca ima illashcata cunllami» nishpa cayancuna.

15Jahua pachamanta ángel Abrahamta cutin cayashpaca:

16—Mandac Diosca: “Cambac cuyashca shuclla churita mana misashcamantaca ñuca shutipi, 17yallita bendiciashpami, cambac huahua huahuacunataca jahua pacha lucerocuna shina, mama cucha tiyu shinata mirachisha. Chashnallatac paicunata piñaccunataca mishacungallami. 18Ñuca nishcata pactachishcamantaca canmantami tucui cai pachapi causaccuna bendiciashca canga” ninmi— nirca.

19Abrahamca paita serviccunapacman cutircami. Chai quipaca, tucui mashna jatarishpa, Beersebaman cutishpami, chaipi causangapac saquirirca.

20Chai quipami Abrahamtaca: «Cambac huauqui Nacorpac huarmi Milcapish huahuayucmi tucushca» nishpa huillarca. 21Punta huacharishca churica Uzmi. Uzpac quipaca Buzmi, Buzpac quipaca Quemuelmi. Paimi Arampac taita carca. 22Chai quipaca Quesed, Hazo, Pildas, Jidlaf, Betuelmi huacharirca. 23Betuelca Rebecapac taitami carca. Cai pusac huahuatami Milcaca Abrahampac huauqui Nacorpactaca charirca.

24Chaipac jahuapica Nacorca caishuc Reúma huarmipipish huahuacunata charircami. Paicunaca Teba, Gaham, Tahas, Maacami carca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index