Search form

GÉNESIS 23

Sara huarmita enterrashcamanta

1Saraca patsac ishcai chunga canchis huatatami causarca. 2Saraca Canaanpi tiyac Quiriat-arba nishca Ebrón llactapimi huañurca. Chashna huañucpimi, Abrahamca yallita llaquirishpa huacangapac shamurca. 3Chai quipami chai huañushcapac ladomanta jatarishpa, Hetpac churicunataca:

4—Ñucaca cancunapurapica caru llactamanta shamushcallami causacuni. Shina cacpipish, ñuca huarmi huañushcata enterrangapac asha allpata cui— nirca.

5Shina nicpimi, Hetpac churicunaca Abrahamtaca:

6—Riqui, ñucanchic mandaclla, canca ñucanchicpurapica Dios acllashcami cangui. Chaimanta huañushcataca ñucanchic panteonpi allita acllashpa enterrailla. Chashna enterracpica, ñucanchicpuramanta pipish mana misangachu, pipish imata mana ningachu— nirca.

7Chashna nicpica, Abrahamca chaipi causac Hetpac churicunapac ñaupapi cumurishpa, 8paicunahuan parlashpaca:

—Huañushca huarmita ñuca chaipi enterrachun munashpaca, Zoharpac churi Efronhuan ñucamanta parlaichic. 9Macpelapi cac cancunapac allpa ladopi tiyac enterrana jutcutami cuchun nini. Chai allpataca mashnapipish randishpami, cancunapac chaupipi enterrana jutcutaca charisha nini— nirca.

10Heteopuramanta Efronca Hetpac churicunahuanmi tiyacurca. Chaipimi Hetpac churicunapac ñaupapipish, chai llactacunapi yaicuccunapac ñaupapipish Abrahamtaca:

11—Uyai, ñuca mandaclla, ama chashna nichu. Ñuca llactapi causac churicunapac ñaupapimi cai allpatapish, enterrana jutcutapish yanga cuni. Huañushcataca chaipi enterrailla— nirca.

12Shina nicpimi, Abrahamca chai llactapi causaccunapac ñaupapi, 13tucui gentecunapac ñaupapi cumurishpa Efrontaca:

—Ñuca mañashcata uyaiyari. Chai allpa valishca cullquita japi. Chashna japicpica, ñuca huarmita enterrashallami— nirca.

14Shina nicpimi, Efronca Abrahamtaca:

15—Riqui, ñuca mandaclla, allpaca chuscu patsac siclos cullquillami valin. Cai cullquimantaca, ¿maitatac canpish, ñucapish caita chaita nicushunyari? Cambac huarmitaca enterrailla— nirca.

16Chashnami Abrahamca Efronhuan parlanacushpa, Efrón mañashca cullquita Hetpac churicunapac ñaupapi pezashpa pagarca. Randina, catuna cullquipimi chuscu patsac siclos cullquita Efronmanca curca. 17Efronpac allpaca Macpela pambamanta inti llucshina ladoman tiyac Mamre pambapimi carca. Abrahamca chai allpapi tiyac jutcundi shinallatac chai pambapi tiyac yuracunandimi muyundita japirca. 18Chashnami Abrahamca Efronpac allpataca Hetpac churicunapac ñaupapi, shinallatac chai llactaman yaicuc gentecunapac ñaupapi chasquirca.

19Chai quipaca, Abrahamca Macpela pambapi tiyac jutcupimi Sarataca enterrarca. Chai allpaca Canaanpi tiyac Hebrón nishca Mamremanta chimba ladomanmi carca. 20Chashnami chai allpataca chaipi tiyac jutcundi Hetpac churicunamantaca paipac panteón cachun randirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index